काठमाडौं–नेपालका लागि अमेरिकी कार्यवाहक राजदूत म्यानी पी मिक्लरले नेपालको संसदबाट पारित भएको एमसीसीले यहाँको अर्थतन्त्रमा थप टेवा पुर्याउने बताएका छन्।
दूतावासले बिहीबार काठमाडौंमा गरेको ‘व्यापार तथा लगानी सहजीकरण कार्यशाला’ मा बोल्दै उनले आगामी पाँच वर्षमा अमेरिकी सहयोग १ अर्ब डलर पुग्ने पनि बताए।
‘नेपाल–अमेरिका व्यापार तथा आर्थिक सम्बन्धमा भर्खरै पारित भएको एमसीसीले नेपालको अर्थतन्त्रलाई टेवा पुर्याएको छ, नेपालीलाई यसले ठूलो अवसर प्रदान गरेको छ,’ मिक्लरले भने,‘अमेरिकाका सहयोग एजेन्सी र अमेरिकी सरकारको अन्य आर्थिक सहयोग नेपाललाई आगामी पाँच वर्षमा १ अर्ब डलर पुग्ने छ।’
उनले नेपालमा आर्थिक र प्राविधिक सहायता मात्र होइन अन्य प्रकारको सहयोग पनि गर्ने र यसका लागि निजी क्षेत्र तथा सरकारसँग सहकार्य गर्ने बताए।
उनले दिगो आर्थिक विकासका लागि एक्लै सम्भव नभएकाले त्यसकालागि विकास साझेदार आवश्यक पर्ने उल्लेख गर्दै नेपालको विकासका लागि अमेरिकी साझेदार र निजी क्षेत्र सधैँ तयार रहेको बताए। ‘अमेरिकी सरकार तथा यसका कम्पनीमार्फत् अमेरिकाले नेपालमा थप लगानी गर्न चाहेको छ। वैदेशिक लगानीले रोजगारी सिर्जना गर्छ र आर्थिक अवसर सिर्जना गर्न मद्दत गर्छ,’ मिक्लरले भने,‘यसले अमेरिका र नेपाल दुवैलाई फाइदा पुग्छ। मलाई आशा छ कि आजका कार्यक्रमहरूले यी प्रक्रियालाई अगाडि बढाउन मद्दत गर्नेछ।’
कार्यक्रममा नेपाल राष्ट्र बैंकका गर्भनर महाप्रसाद अधिकारीले ७५ वर्षे लामो दौत्य सम्बन्धका क्रममा अमेरिकाले नेपालको आर्थिक विकासमा महत्वपूर्ण सहयोग पुर्याएको बताए।
‘अमेरिकाले नेपाललाई निरन्तर रुपमा वित्तिय तथा आर्थिक सहयोगमार्फत् नेपालको स्वास्थ्य, पूर्वाधार र दिगो विकासमा सहयोग पुर्याउँदै आएको छ,,’ गर्भनर अधिकारीले भने।
उनले पछिल्लो समय नेपालको अर्थतन्त्रमा समस्याहरू देखा परेकाले अमेरिकी सरकार र त्यहाँका निजी क्षेत्रले नेपालमा लगानी बढाउनेमा पनि विश्वास व्यक्त गरे। त्यसका लागि राष्ट्रबैंक सहजीकरण गर्न तयार रहेको पनि उनले बताए।
‘हाम्रो अर्थतन्त्र कोभिडपछि समस्यामा परेको थियो। अहिले उच्च मुद्रास्फीतीले समस्याग्रस्त बनाएको अवस्थामा नेपालमा विदेशी लगानी आवश्यक छ,’ गर्भनर अधिकारीले भने,‘यद्यपि सरकारको पछिल्लो वित्तिय तथा मौद्रिक नीतिका कारण अहिले अर्थतन्त्रमा केही सुधारका संकेत देखिएका छन्। नेपाल सरकार तथा नेपाल राष्ट्रबैंक अमेरिकी लगानीलाई स्वागत गर्छ। र त्यसका लागि सहजीकरण पनि गर्दछ।’
गर्भनर अधिकारीले नेपालमा पूर्वाधार, विद्युतीय तथा पर्यटनमा लगानीको अवसर रहेको पनि बताए।
कार्यक्रममा उद्योग, वाणिज्य तथा आपूर्ति मन्त्रालयका सचिव अर्जुनप्रसाद पोखरेलले स्वदेशी तथा विदेशी लगानीकर्तामा नेपालले कुनै फरक नगरेकाले अ्मेरिकी सरकार तथा निजी क्षेत्रलाई नेपालमा लगानी गर्न आग्रह गरे। वैदेशिक लगानीलाई अवरोध गर्ने कानुनहरूको पुनरवलोकन तथा संसोधन गरेकाले नेपालमा लगानी बढ्नेमा आफू विश्वस्त रहेको पनि उनले बताए।
एक दिने उक्त कार्यशालाको समापनमा बिहीबार मात्र नेपाल आईपुगेका अमेरिकी सहायक विदेशमन्त्री डोनाल्ड लूले नेपालस्थित अमेरिकी निर्माण कम्पनी पूर्णालाई ‘अवार्ड फर कर्पोरेट एक्सिलेन्स’ प्रदान गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
