काठमाडौं– विश्व फुटबल महासंघ (फिफा)बाट भष्ट्राचारी ठहर भएर प्रतिबन्धमा परेका एन्फा पूर्वअध्यक्ष गणेश थापाका छोरा गौरवले एन्फामा नियुक्ति लिन अध्यक्ष र महासचिवले नै आफूहरुलाई प्रस्ताव गरेको दाबी गरेका छन्।
निर्वाचनमा सहयोग गरेवापत् थापाले वर्तमान अध्यक्ष पंकजविक्रम नेम्वाङलाई छोरा गौरवलाई एन्फाको सीईओ वा सहमहासचिव बनाउन दबाब दिएको आरोप एन्फा नेतृत्वले पछिल्लो समय लगाउँदै आएको छ।
एन्फा नेतृत्वले भने गौरवलाई एन्फाको कुनै पदमा नियुक्त गर्दा फिफा तथा एएफसीले नेपाललाई कारबाही गर्ने सम्भावना रहेको भन्दै टार्दै आएको छ। तर, बुधबार गौरवले एक वक्तव्य जारी गर्दै आफूले पद नखोजेको बरु एन्फाका वर्तमान अध्यक्ष नेम्वाङ र महासचिव किरण राईले नै आफूहरुलाई सहयोग गर्ने शर्तमा पदको अफर गरेको दाबी गरेका छन्।
‘फिफा र एएफसीलाई अमान्य हुने गरि मैले एन्फामा कुनै पनि भूमिका चाहेको छैन। मैले कहिल्यै पनि एन्फामा कुनै पदका लागि कसैलाई अनुरोध वा दबाब दिएको छैन। बरु वर्तमान अध्यक्ष र महासचिवले नै उहाँहरुलाई सहयोग गर्न भनेर मेरो नाम प्रस्ताव गर्नुभएको हो। वर्तमान अध्यक्ष, महासचिव र कार्यसमितिका पदाधिकारी र सदस्यहरुसँग मेरो थुप्रै पटक यस विषयमा छलफल भएको छ। उहाँहरुले प्रत्येक पटक बजारमा प्रचार गरिएजस्तो कुनै समस्या नरहेको बताउँदै आउनुभएको छ,’ उनले भनेका छन्।
सन् २०१३ देखि २०१८ सम्म एन्फाको विभिन्न पदमा रहेर काम गरेको प्रष्ट पार्दै उनले सो समयमा आफ्नो नियुक्ति फिफा, एएफसी र नेपालको कानून विपरीत नभएको बताएका छन्।
‘मैले २०१३ देखि २०१८ को बीचमा पटक पटक एन्फामा काम गरिसकेको छु। सबैभन्दा पछिलो पटक २०१७ मा नरेन्द्र श्रेष्ठ अध्यक्ष हुँदा अन्तर्राष्ट्रिय सम्बन्ध प्रमुखको रुपमा काम गरेको थिएँ,’ उनले भनेका छन्,‘वर्तमान अध्यक्ष र महासचिव मैले एन्फामा काम गरेको त्यो समयमा कार्यसमितिको सदस्य र उपमहासचिव हुनुहुन्थ्यो। उहाँहरु सबैलाई मेरो नियुक्तिमा फिफा र एएफसीलाई कुनै समस्या नरहेको प्रष्ट पारिइसकेको छ। महासचिव साफको बैठकका लागि बंगलादेश जाँदा एएफसीका केही अधिकारीहरुसँग भेट भएको थियो। त्यहाँ उहाँलाई यो विषयले कुनै फरक नपार्ने स्पष्ट जानकारी गराइएको थियो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
