काठमाडौं- प्रिमियर लिग क्लब म्यानचेस्टर युनाइटेडले पोर्चुगिज फरवार्ड क्रिस्टियानो रोनाल्डोलाई शर्त पूरा गरे क्लब छाड्न अनुमति दिने भएको छ।
यो सिजन युनाइटेडमा रहेर च्याम्पियन्स लिग खेल्न नपाउने भएकाले ३७ वर्षीय रोनाल्डोले क्लब छाड्ने चाहना राखेका हुन्। तर, युनाइटेडसँग रोनाल्डोको सम्झौता सन् २०२३ को जुनसम्म छ।
यद्यपि, युनाइटेडले क्लब छाड्नका लागि स्वीकृति दिन रोनाल्डो सामू नयाँ शर्त राखेको छ। नयाँ शर्तअनुसार रोनाल्डोले क्लबसँग सम्झौता नवीकरण गरेको खण्डमा मात्र युनाइटेडले उनलाई लोनमा क्लब छाड्न दिनेछ।
खेलसँग सम्बन्धित अनलाइन मिररका अनुसार युनाइटेड रोनाल्डोको सम्झौता सन् २०२४ सम्म लम्ब्याउन चाहन्छ। तर, रोनाल्डो र उनका एजेन्टले भने यस प्रस्ताव अस्वीकार गरेका छैनन्। युनाइटेड थाइल्यान्ड र अष्ट्रेलिया टुरमा रहँदा रोनाल्डोले पारिवारिक कारण देखाउँदै सामेल छैनन्।
रोनाल्डोका एजेन्ट जोर्गे मेन्डेसलगायत प्रतिनिधि विगत केही सातायता च्याम्पियन्स लिगमा खेल्न सक्ने टोलीको खोजीमा छन्। स्पेनिस क्लब एट्लेटिको मड्रिडलाई उनको सम्भावित गन्तव्यको रूपमा औंल्याइएको छ।
तर, उनको निकास त्यति सहज भने छैन। स्पेनिस समाचारमाध्यमहरुका अनुसार रोनाल्डोले हप्तामा ४३५,००० युरो पारिश्रमिक पाउँछन्, जुन रकम धेरै टोलीका लागि खर्च गर्न गाह्रो छ। यद्यपि, रोनाल्डो एट्लेटिकोमा सामेल हुन आफ्नो तलब ३० प्रतिशतसम्म घटाउन इच्छुक रहेको समाचारहरु पनि प्रकाशित भइरहेका छन्।
रोनाल्डो च्याम्पियन्स लिगका सर्वाधिक गोलकर्ता हुन्। पाँच पटक च्याम्पियन्स लिगको उपाधि जितिसकेका रोनाल्डो अर्को सिजन पनि युरोपको यस शीर्ष प्रतियोगिता खेल्न चाहन्छन्। तर, उनको क्लब युरोपा लिगमा छ। त्यसैले रोनाल्डोले गत सिजन सकिएलगत्तै आफ्नो लागि अन्य विकल्प खोज्न आफ्नो टिमलाई भनेका थिए।
ट्रान्सफर विन्डो सुरुआतसँगै चेल्सीले रोनाल्डो अनुबन्ध गर्ने इच्छा जाहेर गरेको थियो। तर, अन्त्यमा मुख्य प्रशिक्षक थोमस टुचेलले रोनाल्डो आफ्नो योजनामा अटाउन नसक्ने बताएपछि चेल्सी पछि हटेको थियो।
यता, जर्मन क्लब बायर्न म्युनिखको बोर्ड पनि रोनाल्डो अनुबन्ध गर्नु क्लबको पद्दति अनुसार नहुने भन्दै पछि हटेको थियो।
यसै साता पूर्वक्लब रियल मड्रिडका अध्यक्ष फ्लोरेन्टिनो पेरेज र रोनाल्डोबीच क्लब फर्कनेबारे छलफल भएको थियो। तर, रोनाल्डो नभित्र्याउने योजनामा पेरेज रहेको बताइन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
