काबुल–सामाजिक सञ्जाल फेसबुक तालिबानविरोधी नीतिमा दृढ देखिएको छ। फेसबुकले अफगानिस्तानका तालिबाननियन्त्रित राष्ट्रिय टेलिभिजन र बख्तर न्यूज एजेन्सीका पेज निलम्बन गरी तालिबानविरोधी आफ्नो नीतिलाई पुष्टि गरेको हो।
‘अफगानिस्तान नेशनल टेलिभिजन र बख्तर न्यूज एजेन्सीका पेजहरूले अब फेसबुकमा पहुँच पाउने छैनन्,' अफगानी खामा प्रेसले आफ्नो समाचारमा लेखेको छ।
समाचारमा लेखिएको छ, ‘तालिबानले सत्तारोहणसँगै अफगानिस्तान राष्ट्रिय टेलिभिजनको सञ्चार केन्द्रको नियन्त्रण जफत गरेदेखि उनीहरूले यसको प्रयोग गरी आफ्नो पक्षमा व्यापक गतिविधिहरू सञ्चालन गरेका थिए । तथापि, यस केन्द्र र बख्तर समाचार एजेन्सीका पेजहरू हाल पहुँच योग्य छैनन्।'
अफगानिस्तान नेशनल टेलिभिजनका प्रमुख अहमदुल्ला वासिकका अनुसार फेसबुकले यी सञ्चारमाध्यमले चलाएका पश्तो र दरी पेजमा प्रतिबन्ध लगाएको छ।
फेसबुकको प्लेटफर्मले तालिबानलाई ‘आतंकवादी संगठन’को रूपमा मान्यता दिन्छ र आफ्नो प्लेटफर्ममा यस संगठनद्वारा सिर्जना गरिएको वा समर्थन गर्ने कुनै पनि सामग्रीको प्रकाशनमा प्रतिबन्ध लगाएको छ।
फेसबुकका एक प्रवक्ताले फेसबुकले आफ्नो सबै प्लेटफर्ममा तालिवानविरोधी नीति लागू गरेको जनाएका छन्। यसका साथै इन्स्टाग्राम र ह्वाट्सएपले पनि यो नीति लागू गरेको छ ।
तालिबानका अधिकारी तथा प्रवक्ताहरू ट्वीटरमा पनि सक्रिय छन्। अफगानिस्तानमा तालिबान समूह सत्तामा आएपछि विशेष गरी महिला, किशोरकिशोरीसहित हजारौं पत्रकार तथा सञ्चारकर्मीहरू रोजगारीबाट बञ्चित भएका छन्।
आईएफजे–सहयोगी अफगानिस्तान राष्ट्रिय पत्रकार संघ (एन्जु) ले ३३ वटा प्रान्तमा गरेको सर्वेक्षणले १५ अगस्ट २०२१ देखि ३१८ वटा सञ्चार माध्यम बन्द भएको देखाएको छ। यस संकटले अखबारहरूलाई सबैभन्दा असर पारेको छ र ११४ मध्ये २० वटामात्र प्रकाशित भएका छन्। आइएफजेका लागि संकलित प्रतिवेदन अनुसार अफगानिस्तानमा तालिवान सत्तामा आएपछि ५१ टिभी स्टेशन, १३२ वटा रेडियो स्टेशन र ४९ वटा अनलाइन पत्रिका बन्द भएका छन्।
रोजगारी गुमाएकामध्ये ७२ प्रतिशत महिला रहेको आईएफजेले विज्ञप्तिमा उल्लेख गरेको छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
