काठमाडाैं-त्रिभुवन विमानस्थल भन्सार कार्यालयले आर्थिक वर्ष २०७८/७९ का लागि तोकिएको राजस्व लक्ष्यभन्दा बढी संकलन गर्न सफल भएको छ।
भन्सार विभागले यस कार्यालयका लागि चालु आवमा राजस्व संकलनकाे लक्ष्य २३ अर्ब १५ करोड तोकिदिएको थियो। कार्यालयको अभिलेख अनुसार आर्थिक वर्षको अन्तिम दिनसम्म आईपुग्दा कूल राजस्व असुली २३ अर्ब ७५ करोड रुपैयाँ पुगेको छ, जुन लक्ष्यको तुलनामा १०२.६ प्रतिशत हो।
कार्यालयले गएको चार वर्षयता पहिलो पटक लक्ष्यभन्दा बढी राजस्व संकलन गर्न सफल भएको हो। यसअघि आव २०७४/७५ मा लक्ष्यको तुलनामा १००.१ प्रतिशत राजस्व संकलन भएको थियो भने बीचका ३ आर्थिक वर्षमा लक्ष्य अनुरूप राजस्व संकलन हुन सकेको थिएन। गत आव २०७७/७८ को तुलनामा यस आवको राजस्व असुली ३६.१२ प्रतिशतले वृद्धि भएको छ जुन समग्र राष्ट्रिय राजस्व वृद्धिको तुलनामा समेत बढी रहेको छ।
भन्सार जाँचपासका क्रममा हुने वस्तु वर्गीकरण तथा मूल्यांकनको कार्यमा गरिएको सुधार, अवैधरूपमा हुनसक्ने चोरी निकासी पैठारी नियन्त्रणमा गरिएको कडाइ, भन्सार चोरी पैठारी सम्बन्धमा लामो समयदेखि पेश भई फैसला हुन बाँकी रहेका मुद्दाको फर्छ्यौट, बक्यौता बेरूजु असुली तथा कानून बमोजिम जफत भएका र पुराना मालवस्तुको लिलामी लगायत प्रयासका कारण लक्ष्यभन्दा बढी राजस्व संकलन भएकाे कार्यालयले जनाएकाे छ।
साथै यात्रुले झिटी गुण्टा आदेशबमोजिम राजस्व छुट पाउनेभन्दा बढी परिमाणमा ल्याउने गरेको सुन तथा सुनका गहना र मोबाईललगायतका अन्य मालवस्तुलाई भन्सार राजस्वको दायरामा ल्याउनका लागि गरिएको विशेष प्रयासबाट समेत समग्र राजस्व संकलनमा महत्वपूर्ण योगदान पुगेको जनाइएकाे छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
