काठमाडौं– सहिद स्मारक ए डिभिजन लिगका चार क्लबले नेपाल सुपर लिग (एनएसएल) प्रति असन्तुष्ट जनाएपछि दोस्रो संस्करणको एनएसएल अन्योलमा परेको छ।
तत्कालीन अखिल नेपाल फुटबल संघ (एन्फा) अध्यक्ष र एनएसएलको आयोजक नेपाल स्पोर्ट्स म्यानेजमेन्ट एण्ड इभेन्ट कम्पनीसँगको सम्झौता नै त्रुटिपूर्ण भएको भन्दै खारेजका लागि एन्फा पदाधिकारी र असन्तुष्ट क्लब निचोडमा पुगेका थिए। आइतबार एन्फाले आयोजकसँग अनौपचारिक बैठक गरेको छ। बैठकपछि एन्फाले विवाद समाधान नभएसम्म दोस्रो संस्करणको नेपाल सुपर लिग नहुने जनाएको छ।
कोरोना महामारीकाबीच सफलतापूर्वक पहिलो संस्करणको नेपाल सुपर लिग (एनएसएल) सम्पन्न भइसकेको छ। दोस्रो संस्करणका लागि मिति तोकिए पनि सहीद स्मारक ए डिभिजन लिगका चार क्लबले असन्तुष्ट जनाउँदा अहिलो अन्योलमा परेको हो।
खेलाडी स्थानान्तरणको विषयदेखि फिफा र एफसीमा क्लब सिफारिस सम्बन्धमा केही प्रश्न चार ए डिभिजन क्लबले उठाएपछि उब्जिएको समस्या दोस्रो संस्करण आयोजनाका लागि बाधक बनेको हो।
अभिभावक संस्था अखिल नेपाल फुटबल संघ (एन्फा) मा अहिले नेतृत्व परिवर्तन भएको छ र नयाँ नेतृत्वले सम्झौता स्पष्ट नभएको र त्रुटिपूर्ण भएको बताएको छ। तत्कालीन अध्यक्ष कर्माछिरिङ शेर्पा र एनएसएल आयोजकबीचको सम्झौता स्पष्ट नभएको नयाँ नेतृत्वले औंल्याएको र सोहीबारे आयोजकलाई आइतबार एन्फा मुख्यालयमा बसेको अनौपचारिक बैठकमा जानकारी गराएको महासचिव किरण राईले बताए।
सम्झौता त्रुटिपूर्ण रहेको भन्दै खारेज गर्न सिफारिस गर्ने विषयमा आइतबार एनएसएलका प्रमुख कार्यकारी निर्देशक (सिइओ) सुदीप शर्मा र निर्देशक श्रीयान्स कार्की बुझ्न एन्फा मुख्यालय पुगेका थिए। त्यसो त दोस्रो संस्करणको एनएसएलका लागि अक्सन पनि सम्पन्न भइसकेको छ।
पहिलो संस्करणमा भन्दा तीन बढी टोलीले सहभागिता जनाउँदै छन्। दुई पटक मिति तोकिए पनि दोस्रो संस्करणको एनएसएल हुने अझै अन्योल छ। त्रुटिपूर्ण सम्झौतालाई परिमार्जन गरेर विवाद समाधान भएपछि मात्र दोस्रो संस्करणको एनएसएल हुने महासचिव किरण राईले बताए।
बैठकपछि बोल्दै एनएसएलका निर्देशक श्रीयान्स कार्कीले प्रतियोगिता आयोजना सम्बन्धमा साउन २ गते बस्ने एन्फा कार्यसमितिको बैठकपछि निर्धारण हुने जानकारी दिए। एनएसएल खारेज भन्दा पनि अन्योल भएका बुँदामा स्पष्ट हुँदै अगाडि बढ्ने गरी बैठमा छलफल भएको निर्देशक कार्कीले बताए। निर्देशक कार्कीले नेपाल फुटबलको विकासका लागि सम्झौता परिमार्जनसहित अगाडि बढ्न तयार रहेको बताएका छन्।
‘ए’ डिभिजन लिगका क्लबहरूसँगको सम्झौता बाँकी छँदै एनएसएलका टिमहरूले मार्की खेलाडीको रूपमा खेलाडी अनुबन्ध गरेपछि विवाद सुरु भएको थियो। उक्त विवाद उत्कर्षमा पुगेपछि अहिले आयोजना नै अन्योलमा परेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
