पहिरोले अवरुद्ध दशरथचन्द राजमार्ग सञ्चालन

समाज

रासस सोमबार, असार २०, २०७९ ०९:५२

फाइल तस्बिर।

बैतडी– पहिरोले अवरुद्ध बनेको दशरथचन्द राजमार्ग पूर्णरूपमा सञ्चालनमा आएको छ। राजमार्गअन्तर्गत बैतडीको खोड्पे नजिकै आरुबाटा भन्ने स्थानमा पहिरो खसेपछि आइतबार दिउँसो ३ बजेदेखि राजमार्ग अवरुद्ध भएको थियो।

अवरुद्ध बनेको राजमार्ग सोमबार बिहान ४ बजेदेखि पूर्णरूपमा सञ्चालनमा आएको जिल्ला प्रहरी कार्यालयका बैतडीका प्रवक्ता, प्रहरी निरीक्षक लोकराज जोशीले जानकारी दिए। राति ९ बजे एकतर्फी सञ्चालनमा आएको भए पनि पूर्णरूपमा भने सोमबार बिहान मात्रै खुलेको हो।

सडक डिभिजन कार्यालयसँगको समन्वयमा लगिएको डोजरले पहिरो पन्छाएपछि सडक सञ्चालनमा आएको हो। राजमार्ग अवरुद्ध बनेपछि अलपत्र परेका यात्रु सडक खुलेसँगै आ–आफ्नो गन्तव्यमा गएका छन्।