काठमाडौं– लामो समयसम्म तरलता अभावको समस्यामा परेका बैंकहरू अहिले कर्जा निक्षेप अनुपात (सीडी रेसियो) व्यवस्थापन गर्नतर्फ लागेका छन्।
बैंकहरू सीडी रेसियो व्यवस्थापन गर्न लाग्दा कर्जा लगानी प्रायः ठप्प जस्तै बनेको नेपाल बैंकर संघका अध्यक्ष तथा कृषि विकास बैंकका कार्यकारी अधिकृत अनिल उपाध्यायले बताए।
उपाध्यय भन्छन्, ‘बैंकहरूको सीडी रेसियो औसतमा ९० प्रतिशतभन्दा तल आइसकेको छ। धेरै बैंकहरू यसलाई व्यवस्थापन गर्नतर्फ लागेका छन्। बैंकहरूले दैनिक आफ्नो सीडी रेसियो साइजमा ल्याउन लागिपरेका छन्। असार मसान्तसम्म जसरी व्यवस्थापन गर्नुपर्ने राष्ट्र बैंकको व्यवस्था भएका कारण बैंकहरू अहिले त्यतैपट्टि लागेका हुन्।’
उनले अहिले बैंकमा पैसा उठाउने चटारो रहेको बताए। ‘त्यसमा पनि राष्ट्र बैंकको नीतिले निर्धारण गरेको सीडी रेसियो व्यवस्थापन गर्नुपर्ने अर्को चुनौती छ।’
बैंकहरूले सामान्य समयमा पनि ऋण असुल गर्ने र पोर्टफोलियो व्यवस्थापन गर्ने बेला भएको अध्यक्ष उपाध्यायको भनाइ छ। यतिबेला कसरी लगानी उठाएर सबैभन्दा धेरै नाफा कमाउने भन्नेतर्फ नै बैंकहरू लागेको उनले बताए। उनी भन्छन्, ‘अहिले बैंकहरू खराब कर्जा घटाउनतर्फ लागेका छन्। यसकारण पनि कर्जा लगानी प्रायः ठप्प छ।’
मंगलबारसम्म आउँदा समग्रमा बैंकिङ क्षेत्रको सीडी रेसियो ८९.१४ प्रतिशतको हाराहारीमा रहेको नेपाल राष्ट्र बैंकले जानकारी दिएको छ। समग्रमा बैंकहरुको सीडी रेसियो ९० प्रतिशतभित्र रहे पनि शुक्रबारसम्म आउँदा १२ वटाभन्दा धेरै बैंकको सीडी रेसियो ९० प्रतिशतभन्दा माथि रहेको नेपाल बैंकर संघका कार्यकारी अधिकृत (सिईओ) अनिल शर्माले बताए।
कर्जा लगानी ठप्प बन्दा निक्षेप संकलन भने केही बढ्न सफल भएको उनको भनाइ छ। अहिले बैंकिङ क्षेत्र कर्जा प्रवाह गर्नभन्दा पनि व्यवस्थापन गर्नतिर लागेका कारण तरलता अभावको समस्या केही साम्य भएको उनी बताउँछन्। उनी भन्छन्, ‘तरलता अभावको समस्या समाधान भएको छैन। तर, व्यवस्थापन भइरहेको छ।’
जेठ मसान्तसम्म १३ बैंकको सीडी रेसियो सीमामाथि
जेठ मसान्तसम्म आउँदा १३ वाणिज्य बैंकको सीडी रेसियो नेपाल राष्ट्र बैंकको सीमाभन्दा माथि रहेको छ। जेठ मसान्तसम्म सबैभन्दा धेरै सीडी रेसियो सेन्चुरी बैंकको रहेको छ। तीन बैंकको सीडी रेसियो ९५ प्रतिशतभन्दा माथि रहेको बैंकर संघको तथ्यांकले देखाउँछ।
यी बैंकको सीडी रेसियो जेठ अन्तिमसम्म ९५.८७ प्रतिशत रहेको नेपाल बैंकर संघले जानकारी दिएको छ। यसैगरी, प्राइम बैंकको सीडी रेसियो पनि ९५.५७ प्रतिशत रहेको छ। नेपाल बंगलादेश बैंकको पनि सीडी रेसियो ९५.२५ प्रतिशत रहेको छ।
यसैगरी दुई बैंकको सीडी रेसियो ९४ प्रतिशतभन्दा माथि रहेको छ। कुमारी बैंकको सीडी रेसियो ९४.३७ प्रतिशत र बैंकअफ काठमाडौंको सीडी रेसियो ९४.२७ प्रतिशत रहेको छ।
यसैगरी, जेठ मसान्तसम्म नेपाल क्रेडिट एण्ड कमर्स (एनसीसी) बैंकको सीडी रेसियो ९२.३८ प्रतिशत र ग्लोबल आइएमई बैंकको सीडी रेसियो ९१.८४ प्रतिशत रहेको छ।
नेपाल बैंक लिमिटेडको सीडी रेसियो ९१.९८ प्रतिशत, सनराईज बैंकको ९१.०४ प्रतिशत, कृषि विकास बैंकको ९१.०५ प्रतिशत, सिद्धार्थ बैंकको ९१.५८ प्रतिशत र हिमालयन बैंकको सीडी रेसियो ९१.११ प्रतिशत रहेको छ। यस्तै एभरेष्ट बैंकको ९०.३५ र सिटिजन्स बैंकको ९०.१९ प्रतिशत रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749307650.png)
-1749200817.png)
