पोखरा- गण्डकी प्रदेश सभामा बजेटमाथि छलफल नगरी पास गर्ने तयारी गरिएको भन्दै नेकपा एमालेले मुख्यमन्त्री कृष्णचन्द्र नेपाली पोखरेलको राजीनामा मागेको छ।
एमाले गण्डकी प्रदेशको संसदीय दलले पत्रककार सम्मेलन गर्दै मुख्यमन्त्री पोखरेलको राजीनामा मागेको हो। अर्थमन्त्री रामजी बरालले असार १ गते बजेट प्रस्तुत गरे पनि हालसम्म छलफल हुन सकेको छैन।
असार ५ मा प्रदेश सभामा छलफल सुरू गर्ने बताइएको थियो। नेकपा एमाले संसदीय दलका नेता पृथ्वी सुब्बा गुरुङले संसद् छलेर बजेट अर्थ तथा विकास समितिमा छलफल गर्न लागिएको आरोप लगाएका छन्। उनले भने, 'बजेट संसदमा छलफल थाल्नुपर्छ। संसद छलेर समितिमा छलफल गर्नु कसरी कानुनी हुन्छ? संसदीय प्रणालीमा नौटंकी चल्दैन।'
बजेट कार्यान्वयन गर्ने समय भइसक्दा पनि छलफल प्रारम्भ नभएको बताउँदै नैतिकतामा प्रश्न उठेकाले राजीनामा दिनुपर्ने उनले बताए। विधिविपरित चल्ने सरकारले राजीनामा दिनुपर्ने उनको भनाइ छ।
बजेटमाथिको छलफल गठबन्धनभित्रै विवाद रहेकाले रोकिएको हो। सांसदले योजना छनोट गर्न सक्ने निर्वाचन क्षेत्र पूर्वाधार विकास कार्यक्रम अर्थमन्त्री बरालले बजेटमा नसमेटेपछि विवाद सुरु भएको हो।
गण्डकीमा निर्वाचन क्षेत्रलाई दुई करोडका दरले ७२ करोड विनियोजन गर्ने गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821305.jpg)
-1786602170.png)
-1786513116.png)
