काठमाडाैं-फिफा कतार विश्वकप २०२२ फुटबल हेर्नका लागि अखिल नेपाल फुटबल संघ (एन्फा) लाई टिकट पठाइएको छ। एन्फाका महासचिव किरण राईका अनुसार आगामी नोभेम्बर २१ देखि सुरु हुने विश्वकपका लागि एन्फालाई बिहीबार टिकट प्राप्त भएको हो।
एन्फाका एक पदाधिकारीका अनुसार २८२ वटा टिकट प्राप्त भएको छ। तर, महासचिव राईले भने कति वटा टिकट एन्फामा आएको हो त्योबारे आफूलाई जानकारी नभएको बताए। ‘टिकट आएको छ भन्ने मैले पनि सुनेको हो। तर, बुझ्न पाएको छैन। भोलि कार्यालय गएर बुझेर भनौंला,’ उनले नेपाल लाइभसँग भने।
उनका अनुसार प्रत्येक ४–४ वर्षमा आयोजना हुने विश्वकपका लागि निश्चित संख्यामा एन्फालाई टिकट आउने गरेको छ। यसपटक पनि त्यसरी नै एन्फालाई टिकट प्राप्त भएको हो। प्राप्त टिकट बिक्रीको अधिकार एन्फा स्वयंले पाएको छ। तर, टिकटको मूल्य निर्धारण भने गरिएको छैन। यसबारे एन्फाले नै खुलेर जानकारी दिएको छैन।
फिफा विश्वकपको उद्घघाटन खेल नोभेम्बर २१ मा अल बायत स्टेडियममा हुनेछ। कतारमा हुने प्रतियोगिताअन्तर्गत प्रारम्भिक चरणमा ८ समूहमा विभाजित रहेर ३२ राष्ट्र प्रतिस्पर्धा गर्नेछन्। खेलको तालिका र खेलस्थल पनि सार्वजनिक भइसकेको छ। विश्वकप फुटबल मध्यपूर्वमा र यो समयमा हुन लागेको पहिलो पटक हो।
सन् २०२२ को विश्वकप फुटबल सञ्चालनका लागि सन् २०१० मा मतदानमा कतारले बाजी मारेको थियो। उसले अमेरिका, दक्षिण कोरिया, जापान र अस्ट्रेलियालाई पछाडि पारेर यो अवसर आफ्नो पोल्टामा पारेको थियो।
विश्वकप फुटबल २०२२ का लागि छनोट चरणका खेलहरू तीन वर्षअघि नै सुरु भएको थियो। विश्वकपमा सहभागी हुने ३२ राष्ट्रमा युरोपका १३ देश छन्। चार पटक विश्वविजेता जर्मनी, दुई पटक विश्व विजेता फ्रान्स, एक पटक विश्वविजेता स्पेन र इंग्ल्यान्डसहित डेनमार्क, बेल्जियम, क्रोएशिया, सर्बिया, नेदरल्यान्ड्स, स्विट्जरल्यान्ड, पोर्चुगल, पोल्यान्ड र वेल्स कतारमा खेल्नेछन्।
एशियाबाट ६ देश विश्वकप खेल्ने छ। जसमा जापान, अस्ट्रेलिया, दक्षिण कोरिया, इरान, साउदी अरब र कतार छन्। अफ्रिकाबाट घाना, सेनेगल, ट्यूनिसिया, मोरक्को र क्यामरून सहभागी छन्। त्यस्तै, दक्षिण र उत्तर अमेरिकाबाट समान चार टोलीले कतारमा हुने विश्वकप खेल्ने छन्।
दक्षिण अमेरिकाबाट हालसम्म सबैभन्दा बढी पटक विश्वकप उचालेको ब्राजिल, दुई पटकको विश्वविजेता अर्जेन्टिना र उरुग्वे अनि इक्वेडर प्रतिस्पर्धामा उत्रिँदैछन्। उत्तर अमेरिकाबाट भने क्यानडा, मेक्सिको, अमेरिका र कोस्टारिका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
