काठमाडौं- न्यूरोड टिम (एनआरटी)ले मछिन्द्र फुटबल क्लबबाट ‘ए’ डिभिजन लिग खेलेकका मिडफिल्डर विशाल राई र डिफेन्डर रन्जित धिमाल अनुबन्ध गरेको छ।
मलेसियामा हुने टुवान याङ टेरुतमा (टीवाईटी) कप फुटबल प्रतियोगिताको तयारीमा रहेको एनआरटीले विशाल र रन्जितलाई अनुबन्ध गरेको हो। एनआरटीले टीवाईटी कप फुटबल प्रतियोगिताका लागि आफ्नो तीन विदेशी खेलाडीलाई निरन्तरता दिएको छ।
‘ए’ डिभिजन लिग र मोफसलका केही गोल्डकप खेलेर स्वदेश फर्किएका स्टेफन समिर विनोङ, मेसुके ओलुमोउ र आन्द्रे थिएरी वियक वियकलाई एनआरटीले टीवाईटी कपको लागि फिर्ता बोलाएको हो। उनीहरू बुधबार बिहान नेपाल आइपुगेको क्लबले जनाएको छ।
स्टेफन र मेसुके फरवार्ड हुन्। वियक डिफेन्डर हुन्। एनआरटीले डिफेन्डर छिरिङ गुरुङ, मिडफिल्डर गौरव श्रेष्ठ र अट्याकीङ रुमेश बर्तौलालाई समेत अनुबन्ध गरेको छ।
त्यस्तै, एनआरटीले संकटाबाट खेलेका मिडफिल्डर सुवास गुरुङ, थ्री स्टारबाट खेलेका सञ्जोक राईलाई अनुबन्ध गरेको छ। एनआरटीले जावलाखेलका भारतीय मिडफिल्डर निकालोस फर्नान्डेज र क्यामरुनका गोलकिपर टोलो ल्यान्ड्रीलाई समेत अनुबन्ध गरेको छ।
टीवाईटी कपमा एनआरटीले मलेसियाको सुपर लिग क्लब पेनाङ एफसी र इन्डोनेसियाको लिग टु क्लब कारो एफसीसँग प्रतिस्पर्धा गर्नेछ।
प्रतियोगिता अन्तर्गत एनआरटीले ३० जुनमा कारो एफसीसँग खेल्ने छ। यस्तै, २ जुलाईमा पेनाङ एफसीसँग प्रतिस्पर्धा गर्ने छ। लिगको अंकको आधारमा विजेता र उपविजेता टोलिको टुंगो लाग्ने छ।
प्रतियोगिता पेनाङका सहर प्रमुख मिस्टर याङले पद बहाली ग्रहण गरेको पहिलो वार्षिकोत्सवको अवसरमा आयोजना हुन लागेको हो। प्रतियोगिता २८ जुनदेखि २ जुलाईसम्म हुनेछ।
प्रतियोगिताको विजेताले १० हजार मलेसियन रिङगेट पुरस्कार जित्नेछ। उपविजेता टोलीले ५ हजार मलेसियन रिङगेट पुरस्कार जित्नेछ।
‘ए’ डिभिजन लिगको तयारीस्वरूप एनआरटीले ‘प्री सिजन’ खेलका लागि मलेसिया भ्रमण गर्न लागेको हो। एनआरटीले मलेसिया जानुअघि नेपालमै केही अभ्यास खेल पनि खेल्नेछ। एनआरटीले २५ जुनमा दशरथ रंगशालामा संकटा क्लबसँग मैत्रीपूर्ण खेल खेल्ने छ।
यस्तै, एनआरटीले थाइल्यान्डमा ३ मैत्रीपूर्ण खेल खेल्नेसमेत जनाएको छ। जसमध्ये एक खेल थाई लिग वान क्लब चेनबुरी एफसीसँग खेल्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
