काठमाडाैं-अखिल नेपाल फुटबल संघ (एन्फा) ले राष्ट्रिय टोलीबाट बाहिर राखेका सबै खेलाडीलाई स-सम्मान फिर्ता बोलाउने निर्णय गरेको छ।
बुधबार सातदोबाटोस्थित एन्फा मुख्यालयमा नवनिर्वाचित अध्यक्ष पंकजविक्रम नेम्वाङको अध्यक्षतामा बसेको कार्यसमितिको पहिलो बैठकले मुख्य प्रशिक्षक अब्दुल्लाह अल्मुताइरीले टोलीबाट बाहिर राखेका सबै खेलाडीलाई ससम्मान फिर्ता बोलाउने निर्णय गरेको कार्यसमितिका सदस्य अनिल मल्लले जानकारी दिए।
एएफसी एसियन कप छनोटको तयारीमा रहेका नेपाली राष्ट्रिय टोलीका मिडफिल्डर रोहित चन्दलाई प्रशिक्षक अल्मुताइरीले पटक–पटक क्याम्प छोड्न निर्देशन दिएको भन्दै विशाल राई, अनन्त तामाङ, विशाल श्रेष्ठ, अञ्जन विष्ट, सुजल श्रेष्ठ र विमल घर्तीमगरलगायतका १० खेलाडीले वैशाख १३ गते ‘विद्रोह’ गरेका थिए।
उनीहरुलाई माल्दिभ्समा व्यावसायिक फुटबल खेलिरहेका नियमित कप्तान तथा गोलरक्षक किरणकुमार चेम्जोङले पनि सामाजिक सञ्जालबाट साथ दिएका थिए। प्रशिक्षक अल्मुताइरीले वैशाख १८ गते एन्फाका महासचिव तुलाधरलाई एक पत्र लेख्दै असन्तुष्ट खेलाडीलाई राष्ट्रिय टोलीमा नराख्ने बताएका थिए।
किरणसहित १० सिनियर खेलाडी टिमबाहिर रहँदा अल्मुताइरीले नयाँ खेलाडीलाई मौका दिएका थिए।
एसिया कप तेस्रो चरणको छनोटमा समूह ‘ए’ मा रहेको नेपालले जोर्डनसँग २, कुवेतसँग ४-१ र इन्डोनेसियासँग ७-० को हार बहोरेको थियो। प्रतियोगितामा एक मात्रै गोल कुवेत विरूद्व दर्शन गुरूङले गरेका थिए।
नेपाली टोलीको कप्तानी नवयुग श्रेष्ठ र पुजन उपरकोटीले गरेका थिए।
मल्लका अनुसार एन्फा कार्यसमितिको बैठकले मुख्य प्रशिक्षक अल्मुताइरीका विषयमा छानबिन गर्न गठित समितिकाे प्रतिवेदनलाई ध्यानमा राख्दै अन्तर्राष्ट्रिय सम्बन्ध नबिग्रिने गरी सम्बन्धित सबै पक्षसँग छलफल र समन्वय गर्न महासचिव किरण राईलाई जिम्मेवारी दिने निर्णय गरेको छ।
एक वर्षका लागि नेपाल आएका अल्मुताइरीले विभिन्न विवादका बीच आफ्नो नेपाल बसाईलाई गत वर्ष सम्झौता नवीकरण गर्दै सन् २०२४ सम्मलाई पुर्याएका थिए।
तर, उनले कर्माछिरिङ शेर्पाबाहेकको टिमसँग सहकार्य नगर्ने बताएका थिए। सोमबार राति १२ बजे चुनावको पूर्ण नतिजा नआउँदा नै उनले इन्स्टाग्राममा स्टोरी राख्दै नेपाल नफर्कने संकेत गरेका थिए। यद्यपि, उनले त्यो स्टोरी केही समयमै हटाएका थिए।
अध्यक्षमा निर्वाचित नेम्वाङले जितपछि सञ्चारकर्मीलाई प्रतिक्रिया दिँदै खेलाडी-प्रशिक्षक विवाद छानबिन समितिको प्रतिवेदन हेरेर कार्यसमितिको बैठकबाट निर्णय गर्ने बताएका थिए। ‘प्रशिक्षकको विषय पहिलो कार्यसमितिको बैठकबाट निर्णय गर्छौं। छानबिन समितिको प्रतिवेदन बृहत् रूपमा छलफल गरेर त्यो समस्याको समाधान गर्छाै,’ उनले भनेका थिए।
एन्फाले खेलाडी र प्रशिक्षकबीचको विवाद पत्ता लगाउन भिक्टर राणाको संयोजकत्वमा तीन सदस्यीय छानबिन समिति बनाएको थियो। जुन समितिले ४ जेठमा एन्फालाई प्रशिक्षक अल्मुताइरी र व्यवस्थापक मधुसुदन उपाध्यायको विकल्प खोज्न सुझाव दिएको थियो।
यसअघि १० साउन ०७८ मा अल्मुताइरीले तत्कालीन वरिष्ठ उपाध्यक्ष नेम्वाङका कारण आफू एन्फामा राजीनामा दिन जाँदैछु भनेर फेसबुकमा स्टाटस राखेका थिए। तर, उनले राजीनामा भने गरेका थिएनन्।
हाल भने मुटुको समस्याको कारण अल्मुताइरी कुवेतमै छन्। उपचारका लागि उनले एन्फाको अघिल्लो नेतृत्वसँग तीन महिनाको छुट्टी लिएका छन्।
प्रशिक्षक अब्दुल्लाह कतार फुटबल संघ (एफए)को अनुदानमा नेपाल आएका हुन्। उनको खर्च कतार एफएले नै बेहोर्ने गरेको छ। उनको नेपाल बस्नेदेखि लिएर यातायात खर्च नेपाल सरकारमार्फत् एन्फाले हेर्दै आएको छ।
निर्वाचनताका नै नेम्वाङ समूहले प्रशिक्षक अल्मुताइरीको बर्खास्तीको माग राखेको थियो। तर, तत्कालीन कर्मा नेतृत्व भने अल्मुताइरीलाई निकाल्न आनाकानी गर्दै आएको थियोे।
स्रोतका अनुसार अल्मुताइरीलाई बर्खास्ती गरे एन्फाले करिब १० हजार डलर जरिवाना तिर्नुपर्ने हुन्छ। त्यसका लागि समेत वर्तमान नेतृत्व तयार रहेको बुझिन्छ। तर, नेतृत्वले कतार एफएसँग सहकार्य गर्दै अल्मुताइरीको विकल्पमा अर्काे प्रशिक्षक माग्न सक्ने आंकलन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
