काठमाडौं– असार ७ गते (मंगलबार) बिहान साढे ९ बजे काठमाडौ जिल्ला अदालतका प्रमुख न्यायाधीश राजकुमार खतिवडाले आफ्ना सहकर्मीहरु न्यायाधीशलाई आकास्मिक छलफलका लागि बोलाए। गोला तान्नु अघि प्रमुख न्यायाधीशले बोलाएपछि सबै न्यायाधीश खतिवडाको चेम्बरमा जम्मा भए।
उक्त बैठकमा न्यायाधीश राजकुमार कोइराला सहभागी थिएनन्। प्रमुख न्यायाधीश खतिवडाले कोइराला र नेपालका बारका पूर्व कोषाध्यक्ष (कानुन व्यवसायी) रुद्र प्रसाद पोखरेलका बीचमा १० करोड लेनदेनको कुरा भएको जानकारी गराए। उनको विषयमा कामु प्रधानन्यायाधीश दीपककुमार कार्कीसँग पनि कुरा भएकोले छानबिनमा जाने कुरा पनि खतिवडाले सुनाए।
१० करोडको लेनदेनमा मुछिएका न्यायाधीश कोइरालालाई मंगलबारदेखि नै मुद्दाको सुनुवाइबाट अलग गरिएको छ।
कोइराला २१ साउन २०७२ मा जिल्ला न्यायाधीश बनेका थिए। सरकारी वकिल रहेका कोइराला त्यतिबेला न्याय परिषद्का सदस्य रहेका रामप्रसाद सिटौलाको कोटाबाट जिल्ला न्यायाधीश बनेका थिए। कोइराला जिल्ला अदालत काठमाडौं आउनुअघि मोरङ, म्याग्दी लगायत जिल्ला अदालतमा थिए। उनलाई प्रधानन्यायाधीश (हाल निलम्बित) चोलेन्द्र शमशेर राणाले काठमाडौं जिल्ला अदालत ल्याएका थिए।
प्रधानन्यायाधीश राणा, पूर्वमहान्यायाधिवक्ता बडालदेखि प्रमुख न्यायाधीश खतिवडासम्म जोडिए
जिल्ला न्यायाधीश कोइराला र कानुन व्यवसायी पोखरेलको बीचमा भएको टेलिफोन कुराकानीको अडियोमा हाल निलम्बनमा रहेका प्रधानन्यायाधीश राणा, पूर्व महान्यायाधिवक्ता रमेश बडाल, जिल्ला अदालत काठमाडौंका प्रमुख न्यायाधीश राजकुमार खतिवडा र काठमाडौं जिल्ला अदालतबाट न्याय परिषद्मा तानिएका अम्बिका निरौलाको नाम लिएको सुनिन्छ। न्यायाधीश निरौला विवादित फैसलापछि परिषद्को छानबिनमा रहेका छन्।
सिभिल बचत तथा ऋण सहकारी संस्था लिमिटेडका वचतकर्ताको निक्षेप (बचत रकम) हिनामिना गरेको अभियोगमा हाल पुर्पक्षका लागि थुनामा रहेका इच्छाराज तामाङ सहितलाई धरौटीमा छुटाउने विषयमा न्यायाधीश कोइराला र कानुन व्यवसायी पोखरेलबीच कुराकानी भएको हो।
न्यायाधीश कोइराला र कानुन व्यवसायी पोखरेलबीच भएको टेलिफोन कुराकानीको अडियोमा पोखरेलले कोइरालालाई १० करोड धरौटी माग गरी इच्छाराजलाई रिहा गर्ने आदेश जारी गर्न अफर गरेको सुनिन्छ।
कोइरालाले त्यस्तो आदेश जारी गर्दा आफू बर्बाद हुने चिन्ता व्यक्त गरिरहँदा कानुन व्यवसायी पोखरेलले माथि (प्रधानन्यायाधीश राणा)बाटै मिलाउन सकिने बताएका छन्। प्रधानन्यायाधीश राणाले १ नम्बर (जिल्ला अदालतका प्रमुख न्यायाधीश)लाई अह्राउने र त्यसको सबै चाँजोपाँजो आफूले मिलाउने पोखरेलले कोइरालालाई आश्वासन दिएको अडियोमा सुनिन्छ।
इच्छाराजलाई १० करोड धरौटीमा छाड्दा आफूहरुले २ करोड रुपैयाँ जति लिन सकिने विषयमा उनीहरुबीच कुराकानी हुन्छ।
नेकपा एमालेनिकट कानुन व्यवसायी पोखरेलले एमाले कानुन विभागमा रहेर काम गरिसकेका छन्। नेपाल बार एसोसिएसनको अगुवाइमा प्रधानन्यायाधीश राणाविरुद्ध आन्दोलन थाल्दा पोखरेल राणाको पक्षमा थिए। उनले राणाको विरुद्ध आन्दोलनमा उत्रिएका कानुन व्यवसायीलाई 'भ्रष्टाचारी'को समेत संज्ञा दिने गरेका थिए।
न्युज २४ टेलिभिजनले उक्त प्रकरणको अडियो सार्वजनिक गरेपछि बुधबार कामु प्रधानन्यायाधीश दीपककुमार कार्कीले बुधबार न्याय परिषद्को आकस्मिक बैठक बोलाएका छन्।
उक्त रकमको डिल भने २०७८ पुसमा भएको थियो। सिभिल सहकारीका निक्षेपकर्ताको निक्षेप हिनामिना गरेको आरोपमा इच्छाराज तामाङविरुद्ध प्रहरीको केन्द्रीय अनुसन्धान ब्यूरो (सीआईबी)ले अनुसन्धान सकाएर जिल्ला सरकारी वकिलमार्फत् जिल्ला अदालतमा मुद्दा दर्ता भएपछि थुनछेक बहस चलिरहँदा उनीहरुबीच आदेशलाई लिएर डिल भएको बुझिएको छ।
न्यायाधीश कोइरालाई घुसको अफर गर्ने कानुन व्यवसायी पोखरेलमाथि नेपाल बार एसोसिएसनले कारबाहीको तयारी गरेको छ। नेपाल कानुन व्यवसायी परिषद ऐनको व्यवस्थाअनुसार छानबिन गरेर उनीमाथि कारबाही गर्ने तयारी भइरहेको नेपाल बार एसोसिएसन स्रोतले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
