काठमाडौं– अखिल नेपाल फुटबल संघ (एन्फा)को वर्तमान नेतृत्वलाई विदेशी मुद्रा अपचलन तथा ‘कागजपत्र कीर्ते’को आरोप लागेको छ।
सामाजिक सञ्जाल फेसबुकमा फिफा विश्वकप २०२२ को छनोटअन्तर्गतको अवे खेल खेल्नका लागि सन् २०१९ मा राष्ट्रिय टोली अस्ट्रेलिया पुग्दा विदेशी मुद्रा अपचलन भएको पत्र सार्वजनिक भएको हो।
नेपाली टोली अस्ट्रेलिया लैजाने क्रममा व्यवस्थापक मधुसुदन उपाध्यायले विदेशी मुद्रा अपचलन तथा ‘कागजपत्र कीर्ते’ गरेको आरोप लागाइएको छ। उनले एन्फाबाट १० लाख ९५ हजार एक सय १४ रुपैयाँ पेश्की निकाले पनि राष्ट्र बैंकको अनुमति लिएर मात्र विदेशी मुद्रा सटही गर्नुपर्ने बाध्यकारी कानुन मिचेको उल्लेख छ।
टोली नेपाल फर्किइसकेपछि मुद्रा अपचलन गरेको हल्ला फैलिएसँगै एन्फामा असन्तुष्ट पक्षले छानबिन हुनुपर्ने आवाज उठाएको बताइएको छ। तर, एन्फाभित्र नै विरोध सुरु भएपछि उपाध्यायले अध्यक्ष कर्माछिरिङ शेर्पा र महासचिव इन्द्रमान तुलाधरसँग मिलेर पेश्की माग गरिएको निवेदन सट्टा गरेको आरोप लगाइएको छ।
उपाध्यायले एन्फा अध्यक्षलाई सम्बोधन गरेर लेखेको पहिलो पत्रमा क्यानबेरामा होटल खर्चका लागि १२ हजार ३ सय २२, २०१९ अक्टोबर ११ को बिहानको खानाका लागि ६ सय, टिम मिटिङका लागि हल चार्ज २ सय र भैपरी खर्चका लागि सात सय गरी कूल १३ हजार ८ सय २२ अस्ट्रेलियन डलरको तत्कालीन विनिमय दर (नेपाली १० लाख ६४ हजार दुई सय ९४ रुपैयाँ) माग गरेका छन्। जसमा एन्फा अध्यक्ष शेर्पाले ‘श्री महासचिव नियमानुसार नगद निकास गर्ने’ भनेर तोक लगाएका छन्।
अर्को पत्रमा उपाध्यायले क्यानबेराको टिम होटलको भुक्तानी गर्नुपर्ने रकम नगदबाट भुक्तानी गर्न नमिल्ने जानकारी प्राप्त भएकोले अस्ट्रेलियन नेपाल फुटबल संघका अध्यक्ष बिजेन बाटाजुले आफ्नो कार्डबाट तिर्ने र त्यो बराबरको नेपाली रकम दिने गरी भुक्तानी हुने ब्यहोरासमेत जानकारी गराएका छन्।
पछिल्लो पत्रमा अध्यक्ष शेर्पाले ‘श्री महासचिव निवेदकले उल्लेख गरेबमोजिम मिलाउने’ भनेर तोक लगाउँदा अघिल्लोभन्दा फरक बेहोरा उल्लेख छ। दुवै पत्र उपाध्यायले २०७६ साल असोज ६ गतेको मितिमा लेखेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
