काठमाडौं– नेपाली महिला टोलीले सदाबाहर एकै आरोप खेपिरहन्छ– कमजोर टोलीमाथि मात्रै हावी हुन्छन्। हुन पनि हो, नेपाली टोलीको पछिल्लो रेकर्ड हेर्ने हो भने यो तथ्यलाई गलत मानन्न सकिँदैन।
शुक्रबारदेखि मलेसियामा सुरु भएको एसीसी महिला टी–२० च्याम्पियनसिपका सुरुआति दुई खेलमा पनि नेपाल तुलनात्मक रुपमा कमजोर देखिएका भुटान र कुवेतविरुद्ध हावी भयो। पहिलो खेलमा भुटानलाई ५० रनले हराएको नेपालले दोस्रो खेलमा कुवेतविरुद्ध २५ रनको सहज जित निकाल्यो।
नेपालका लागि यी दुई टोली नौलो होइन। नेपाल र भुटानबीच महिला टी–२० आईमा यसअघि एक खेल भएको थियो। गत पुषमा आईसीसी महिला टी–२० विश्वकप एसिया क्षेत्र छनोटमा नेपालले भुटानलाई ८ विकेटले हराएको थियो।
यस्तै, नेपाल र कुवेतबीच यसअघि दुई महिला टी–२० आई खेल भएको थियो। नेपाल दुवै खेलमा विजयी भएको थियो। गतवर्ष टी–२० विश्वकप छनोटमा नेपाल कुवेतलाई २७ रनमा अलआउट गर्दै ९ विकेटले विजयी भएको थियो।
त्यसैले पनि नेपाली खेलाडी यी दुई टोलीको बारेमा जानकार थिए। त्यसैअनरुप कप्तान रुविना क्षेत्री बेलबासे र उपकप्तान इन्दु बर्माको योजना मैदानमा बलियो देखियो। यी दुई खेलाडीले भुटान र कुवेतका विपक्षी खेलाडीलाई मैदानमा सहजै खुलेर खेल्न दिएनन्।
जारी प्रतियोगिताको उपाधि जित्ने लक्ष्य बोकेर मलेसया पुगेको नेपाली टोलीका लागि यो दुई खेलको जित महत्त्वपूर्ण छ। यी दुई खेलमा जित हात पारेसँगै नेपालले सेमिफाइनल पुग्ने सम्भावना बलियो बनाएको छ।
ओपनर चल्नै सकेनन्
मलेसिया उड्नु अगाडि पनि नेपाली महिला राष्ट्रिय क्रिकेट टोलीका मुख्य प्रशिक्षक जगत टमाटाले ब्याटिङमा सुधार गरेको दाबी गरेका थिए। उनले अफ्रिकी राष्ट्र युगान्डासँगको ५ टी–२० आई सिरिजका सुरुआति ३ खेलमा कमजोर ब्याटिङका कारण पराजय भोगेको स्वीकार गर्दै जारी प्रतियोगितामा यसमा सुधार देखिने आश्वासन दिएका थिए।
‘युगान्डासँगको सिरिजपछि एकदिन बिराएर हामीले अभ्यासलाई निरन्तरता दिइरहेका थियौं। पाँच–पाँच घण्टा सधैं अभ्यास गरिरहेका थियौं। यो बीचको अवधिमा हामीले ब्याटिङमा सुधार गर्न सकेका छौं,’ उनले भनेका थिए।
तर, नेपालको पछिल्लो दुई खेल हो भने नेपाली ओपनिङले खासै कमाल देखाउन सकेका छैन। भुटानविरुद्धको खेलमा एक रनमा आउट भएकी बिन्दु रावलले कुवेतविरुद्ध पनि जमेर खेल्न सकिनन्। उनी ११ रनमै अनावश्यक शर्ट खेल्ने क्रममा मर्याम ओमरको बलमा मरिम्मा हैदरको हातबाट क्याच आउट हुन पुगिन्।
यता, ज्योति पाण्डेले पनि बिन्दुलाई सुरुआति दुई खेलमा बलियो साथ दिन सकेकी छैनन्। भुटानसँग खाता खेल्न नै नसकेकी उनले कुवेतविरुद्ध २४ बलमा १ चौकासहित १५ रन बनाइन्।
नेपालले युगान्डासँगको सिरिजमा ‘पावर प्ले’मा निकै सुस्त सुरुआत गरेको थियो। टी–२० क्रिकेटमा पावर प्लेको प्रदर्शन निकै महत्त्वपूर्ण हुन्छ। त्यो समय सर्वाधिक आक्रामक ब्याटिङ गर्नुपर्ने हुन्छ।
युगान्डासँगको ब्याटिङक्रमले भने आक्रामक ब्याटिङ कठिन नै देखिएको थियो। यो अवस्थामा प्रशिक्षक टमाटाले ब्याटिङ लाइनमा केही परिवर्तन गर्ने अनुमान गरिएको थियो। तर, भुटान र कुवेतसँगको खेलमा पनि पुरानै कमजोरी सुधार हुन् सकेन।
उनीहरुले पावर प्ले मै विकेट गुमाउन पुगे। अझै भनै पावर प्लेलाई खुलेर खेल्नुपर्ने बिन्दु र ज्योतिले प्रशिक्षक टमाटाले भनेजस्तो खेल प्रदर्शन गर्न सकेका छैनन्।
रुविना र इन्दुकै भर
दुई खेलको तुलना गर्ने हो भने कप्तान रुविना क्षेत्री बेलबासे र उपकप्तान इन्दु बर्माले नेपाली टोलीलाई केही राहत दिलाएका छन्। उनीहरु टोलीको मात्रै होइन, मैदानमा आफ्नो जिम्मेवारीलाई पनि न्याय दिरहेका छन्।
भुटानविरुद्धको खेलमा छैठौं स्थानमा क्रिजमा पुगेकी रुविनाले २२ बलमा १ चौकासहित २१ रन बनाएकी थिइन्। यस्तै, इन्दुले पनि नेपाललाई खेल जिताउन २६ बलमा १ चौकासहित २० रनको योग्दान दिएकी थिइन्।
उनीहरुले आफ्नो लयलाई शनिबार कुवेतविरुद्धको खेलमा पनि कायम राख्न सफल भए। ३१–४ को अवस्थामा क्रिजमा पुगेकी इन्दुले ३३ बलमा २ चौकासहित २८ रनको अविजित इनिङ्स खेलिन्। उनले कप्तान रुविनासँग मिलेर ६० रनको साझेदारी गर्दै नेपालको स्कोर निर्धारित २० ओभरमा १०७ रन पु¥याएकी थिइन्।
उनीहरुबीच पाँचौं विकेटका लागि ६० रनको कीर्तिमानी साझेदारी भएको थियो। यो नै नेपाली महिला टी–२० आई क्रिकेटमा पाँचौं विकेटका लागि भएको उच्च साझेदारी हो।
यसअघि २०१९ मा महिला टी–२०आईमा पाँचौं विकेटका लागि अप्सरी बेगम र सरिता मगर तथा यसै प्रतियोगितामा भुटानविरुद्ध रुविना र काजोल श्रेष्ठले समान ३२ रनको साझेदारी गरेका थिइन्।
पछिल्लो दुई वर्षमा किर्तिपुरस्थित टियु क्रिकेट मैदानको पिच ब्याटिङ गर्न धेरै सहयोग पुग्ने देखिन्छ। तर, महिला टोलीले युगान्डासँग एक सय रनमै संघर्ष गरेको थियो। मलेसिया भ्रमणमा रहेको टोलीले हालसम्म ‘रन चेज’ गर्नु परेको छैन।
भुटान र कुवेतसँग खेल्दा नेपाल सुरुआतमै पहिला मैदान उत्रिन पाएको छ। त्यही पनि पछिल्लो दुई खेललाई हेर्ने हो भने नेपाललाई एक सय रन कटाउन नै मुस्किल परिरहेको छ।
भुटानसँगको खेलमा नेपालले निर्धारित २० ओभरमा ९ विकेट गुमाउँदै ९४ रन बनाएको थियो भने कुवेतसँग ४ विकेट गुमाएर १०७। नेपालले समूह ‘ए’ मा अब हङकङ र बहराइनसँग खेल्न बाँकी छ।
प्रशिक्षक टमाटाको लक्ष्य यी दुई टोलीलाई हराउँदै समूह विजेता बनेर फाइनल पुग्ने छ। त्यसैले नेपालले यी दुई टोलीसँग जित निकाल्न रुविना र इन्दुको इनिङ्स महत्त्वपूर्ण हुने छ।
बलिङमा एकरुपता
नेपाली क्रिकेटको जुनसुकै समूहमा बलियो मानिने भनेकै बलिङ हो। नेपालले अहिलेसम्म खेलेका प्राय: खेलमा बलिङबाट नै विपक्षी टोलीमाथि दबदबा कायम गरेको छ। मलेसिया उड्नु अगाडि पनि प्रशिक्षक टामाटाले यस्तै सुनाएका थिए। उनले भनेका थिए, ‘स्पिनर हाम्रो सन्तुलनमा छ। तीव्र गतिका बलरमा थोरै काम गर्न छ। ब्याटरले पनि राम्रो गरेको छ। हामीले सबै काम गरेका छौं।’
उनले भनेजस्तै जारी प्रतियोगिता नेपालको बलिङमा दबदबा कायमै देखिएको छ। विशेषगरी नयाँ खेलाडी संगीता राईले प्रशिक्षक टामाटाको भनाइअनुसार प्रदर्शन गरिरहेका छन्। भुटानविरुद्धको खेलमा २.५ ओभर बलिङ गर्दै ६ रन खर्चेर ४ विकेट लिएकी उनले कुवेतविरुद्ध पनि १ विकेट हात पारिन्।
यता, अस्मिना कर्माचार्य, इन्दु बर्मा र सीता रानामगरले पनि बलिङ लाइनअपलाई बलियो बनाउँदै नेपाली टोलीलाई जित दिलाउन महत्त्वपूर्ण भूमिका खेलिरहेका छन्। उनीहरुको कसिलो प्रदर्शनको अगाडि विपक्षी टोली निरिह देखिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768716527.png)
-1768712852.png)
-1764146706.png)
-1768395492.png)
