काठमाडौं– सेनामा भर्तीका लागि भारतीय सरकारले ल्याएको 'अग्निपथ योजना'को विरुद्धमा विभिन्न राज्यमा हिंसात्मक प्रदर्शन चर्किएको छ। जारी प्रदर्शनका कारण भारतका विभिन्न राज्यमा गरी ३०० भन्दा बढी ट्रेनको आवागमन प्रभावित भएको छ।
पछिल्ला दिनहरुमा जारी प्रदर्शनका क्रममा प्रदर्शनकारीहरुले विशेष गरी ट्रेन स्टेशन तथा ट्रेनहरुमा क्षति पुर्याएका छन्। तेलंगाना, बिहार तथा उत्तर प्रदेशमा प्रदर्शनकारीहरुले ट्रेन तथा ट्रेन स्टेशनमा आगजनी गरेका छन्। यस्तै, हरियाणा, हिमाञ्चल, उत्तराखण्ड, राजस्थान लगायतका राज्यमा पनि पनि प्रदर्शनले हिंसाको रुप लिएको अधिकारीहरुले जानकारी दिएका छन्।
'अग्निपथ योजना'को प्रदर्शन उग्र भएपछि बिहारका १२ जिल्लामा ४८ घण्टाका लागि मोबाइल र इन्टरनेट सेवा बन्द गरिएको भारतीय सञ्चारमाध्यमहरुले जनाएका छन्। यस्तै, हरियाणा राज्यको १ जिल्लामा एसएमएस सेवा बन्द गरिएको छ।
भारत सरकारले आगामी ९० दिनमै करिब ४० हजार जनालाई सेनामा भर्ती गर्ने भनेर नयाँ 'अग्निपथ योजना' ल्याएको हो। जसअन्तर्गत साढे १७ वर्ष उमेर पुगेका र २१ वर्ष (२ वर्ष बढाएर २३ वर्ष) उमेर नकटेका किशोर/युवालाई सेनामा भर्ती गरिने लक्ष्य छ।
यसरी भर्ना हुनेहरुलाई ६ महिनासम्म तालिम प्रदान गरिने छ। शैक्षिक योग्यता १० तथा १२ कक्षा पास भएका व्यक्तिले आवेदन दिन पाउने व्यवस्था गरिएको छ। यो योजनाअन्तर्गत ४ वर्षका लागि सेनामा भर्ना गरिने छ।
भर्ना भएको पहिलो वर्ष प्रतिमहिना ३० हजार भारु पारिश्रमिक हुने छ। यस्तै, चोथो वर्ष ४० हजार प्रतिमहिना पारिश्रमिक हुने छ। ४ वर्षको सेवाकालीन अवधिको मूल्याङ्कन गरेर भर्ना भएकामध्ये २५ प्रतिशतलाई सेवामा नियमित गरिने र बाँकी ७५ प्रतिशतलाई बिदा गरिने योजना छ।
खास गरेर ४ वर्षे सेवा अवधिको प्रावधानलाई लिएर युवाहरु प्रदर्शनमा उत्रिएका हुन्। लामो समय पूर्वतयारी तथा मेहनत गरेर सेनामा भर्ती भएपछि ४ वर्ष मात्रै सेवामा रहन पाइने भएपछि युवाहरुले विरोध जनाएका हुन्।
प्रदर्शनमा उत्रिएकाहरुले पछिल्लो २ वर्षदेखि रोकिएको नियमित भर्नालाई पनि बहाल गरिनुपर्ने माग अगाडि सारेका छन्।
प्रदर्शन उग्र भएपछि बिहारका १२ जिल्लामा ४८ घण्टासम्म मोबाइल र इन्टरनेट सेवा बन्द गरिएको भारतीय सञ्चारमाध्यमले जनाएका छन् । हरियाणाको १ जिल्लामा एसएमएस सेवा समेत बन्द गरिएको छ ।
अग्निपथ योजनालाई लिएर राजनीतिक दलका नेता र विशेषज्ञको मत पनि बाँडिएको छ। कसैले अग्निपथलाई युवा र सेनाको लागि धेरै राम्रो योजना भनेका छन् भने कसैले यसलाई युवाको भविष्यमाथिको खेलवाड र राष्ट्रिय सुरक्षाका लागि गम्भीर चुनौती भएको भनेर समेत टिप्पणी गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
