काठमाडौं– नेपाली राष्ट्रिय टोलीकी कप्तान रूविना क्षेत्रीले आसन्न एसीसी महिला टी–२० क्रिकेट च्याम्पियनसिपलाई ‘प्रेसर’को रुपमा नलिएको भन्दै नतिजा दिनेगरी खेल्ने बताएकी छन्।
मंगलबार नेपाल क्रिकेट संघ (क्यान)ले एसीसी महिला टी–२० क्रिकेट च्याम्पियनसिप खेल्न जाने टोलीलाई बिदाइ गरेको थियो। उक्त बिदाइ कार्यक्रममा बोल्दै उनले क्रिकेट खेल्न थालेको धेरै वर्ष भएपनि नतिजा दिन नसकेको भन्दै यसपटक राम्रो गर्ने बताइन्।
‘खेलेको यत्रो वर्ष भइसकेको छ। तर, रिजेल्ट दिन नपाउँदा हामीलाई पनि दु:ख लागिरहेको छ। तर, हार्छौं भनेर कोही बाहिर खेल्न जाँदैनन्। हामीमा पनि जित्छौं भन्ने आस छ। त्यसकै लागि बिहान ७ बजेदेखि बेलुका ३ बजेसम्म कडा अभ्यास गरिरहेका छौं। त्यसैले राम्रो नतिजा दिन सक्छौं भन्नेमा आत्मविश्वासी छु,’ उनले भनिन्।
उनले अफ्रिकी राष्ट्रसँगको ५ टी२० आई सिरिजले पनि यो प्रतियोगिताको लागि सहयोग पुगेको बताइन्।
‘क्यानले घरेलु मैदानमा आयोजना गरेको सिरिजले हामीलाई धेरै सहयोग पुगेको छ। यसका लागि क्यानलाई धन्यवाद। युगान्डाविरुद्धको सिरिजले हामी कुन स्थानमा छौं भन्ने देखिएको छ,’ उनले भनिन्।
क्यानले कीर्तिपुरस्थित टियू क्रिकेट मैदानमा आयोजना गरेको ५ टी२० आई सिरिजका सुरुआती ३ खेलमा नेपाल पराजित भएको थियो। तर, बाँकी दुई खेलमा भने जित हासिल गर्दै सिरिज ३–२ ले सक्काएको थियो।
टोलीका मुख्य प्रशिक्षक जगत टमाटाले सबैले कठिनाइका बाबजुद धेरै मेहनत गरेको बताउँदै सबैको लक्ष्य उपाधि नै हात पार्ने नै रहेको बताए।
‘हामी सबैको एउटै गोल भएकाले हामी च्याम्पियन हुन्छौं भन्ने हो। वर्षायाम भएकाले तयारी सहज थिएन, त्यही पनि हामीले मेहनत गरेका छौं। कति मेहनत गरेका छ भन्ने खेलाडीहरूलाई थाहा छ, अब नतिजा उनीहरूमै निहीत छ,’ उनले भने।
बिदाइ कार्यक्रममा बोल्दै राष्ट्रिय खेलकुद परिषद् (राखेप)का सदस्यसचिव टंकलाल घिसिङले उत्कृष्ट प्रदर्शन दिन कुनै कसर बाँकी नराख्न आग्रह गरे।
‘यहाँहरू एकदमै महत्त्वपूर्ण प्रतियोगिता खेल्न जाँदै हुनुहुन्छ। विभिन्न प्रतियोगिता र स्तरहरूमा यहाँहरूले सिक्दै आउनुभएको छ। त्यो सिकेको कुरालाई यस प्रतियोगितामा खन्याउनु हुनेछ र विजयी भएर फर्किनु हुन्छ भन्ने विश्वास लिएको छु,’ उनले भने।
आगामी असार ३ गतेदेखि ११ गतेसम्म मलेसियामा हुने प्रतियोगिताका लागि क्यानले रूबिना क्षेत्रीको कप्तानीमा १५ सदस्यीय टोलीको नाम सार्वजनिक गरिसकेको छ।
प्रारम्भिक टोलीमा रहेका १९ खेलाडीबाट नेपालले अन्तिम टोलीको घोषणा गरेको हो। टोलीमा कप्तान रूबिनासँगै उपकप्तान इन्दु वर्मा, सीता रानामगर, ज्योति पाण्डे, कविता कुँवर, अस्मिना कर्माचार्य, कविता जोशी, ममता चौधरी, मनिषा उपाध्याय, डोली भट्ट, विन्दु रावल, संगीता राई, अप्सरी बेगम, काजोल श्रेष्ठ र सबनम राई छनोट भएका छन्।
प्रतियोगितामा नेपाल समूह ‘बी’ मा परेको छ। नेपालको समूहमा बहराइन, भुटान, हङकङ र कुवेत छन्। त्यसैगरी, समूह ‘ए’ मा आयोजक मलेसिया, ओमान, कतार, सिङ्गापुर र संयुक्त अरब इमिरेट्स (युएई) छन्। समूह चरणका शीर्ष दुई टोलीले सेमिफाइनल खेल्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
