काठमाडौं– शिक्षा, विज्ञान तथा प्रविधि मन्त्री देवेन्द्र पौडेलले कागज आपूर्ति हुन नसक्दा समयमै पाठ्यपुस्तक उपलब्ध गराउन नसकिएको बताएका छन्। मंगलबार प्रतिनिधि सभा बैठकमा सांसदहरुले उठाएका प्रश्नको जवाफ दिँदै पौडेलले समयमै कागज आपूर्ति नहुँदा पाठ्यपुस्तक छपाइमा ढिलाइ भएको र विद्यार्थीहरुमाझ समयमै वितरण गर्न नसकिएको बताएका हुन्।
पाठ्यपुस्तक छाप्ने कागज अन्तर्राष्ट्रिय बजारबाट ल्याउनुपर्ने र सोको आपूर्ति हुन नसक्दा छपाइमा ढिलाइ भएको मन्त्री पौडेलको भनाइ छ। पाठ्यपुस्तक छाप्ने जिम्मेवारी पाएको जनक शिक्षा सामग्री लिमिटेडका कर्मचारीहरु स्थानीय तह निर्वाचनमा जानुपर्ने स्थिति भएका कारण पनि असर परेको उनले उल्लेख गरे।
मन्त्री पौडेलले पाठ्यपुस्तक उपलब्ध गराउन १५ दिन मात्रै ढिला भएको दाबी गरे। 'हामीकहाँ पुस्तक छाप्नका लागि प्रस्तावित भएर सर्टिफाइड भएको कागज अन्तर्राष्ट्रिय बजारबाट ल्याउनुपर्छ। समयमै पाठ्यपुस्तक पुर्याउन हामीले ध्यान दियौँ। तर, दुर्भाग्य कागजको आपूर्ति समयमा हुन सकेन,' मन्त्री पौडेलले भने, 'निर्वाचन आयोगले निर्णय गरेको चुनावमा जनक शिक्षा सामग्रीका कर्मचारीहरु पनि चुनावमा जानुपर्ने बाध्यात्मक स्थिति भयो। त्यसले गर्दाखेरी सहजतापूर्वक १५ दिन पाठ्यसामग्री पुर्याउने कुरा ढिला भएको कुरा म यहाँहरुलाई जानकारी गराउन चाहान्छु।'
मन्त्री पौडेलले बालविकास शिक्षकलाई संघीय सरकारबाट २ हजार रुपैयाँ थप गरी १० हजार उपलब्ध गराउन बजेट व्यवस्था गरिएको बताए। हाल विद्यालयमा कार्यरत पुर्व प्राथमिक शिक्षक, कर्मचारीको विवरण अध्यावधिक गरी कर्मचारी व्यवस्थापनको सेवा शर्त निर्धारणका लागि कार्य अघि बढाइएको जानकारी दिदैँ सो सेवा शर्त निर्धारण भएपश्चात सोही अनुरुप कर्मचारीको तलब निर्धारण हुने गरी अर्थ मन्त्रालयसँग समन्वय गरी आवश्यक व्यवस्था मिलाईने मन्त्री पौडेलको भनाइ छ।
संघीय शिक्षा ऐनको मस्यौदा तयार भैसकेको र सहमतिका लागि कानुन, न्याय तथा संसदीय व्यवस्था मन्त्रालय र अर्थ मन्त्रालयसँग आवश्यक छलफल भैरहेको मन्त्री पौडेलले जानकारी दिए। सहमतिपछि सदनमा प्रस्तुत गरिने उनको भनाइ छ।
मन्त्री पौडेलले विद्यालय तह पूरा गर्दा विद्यार्थीमा कुनै प्रकारको व्यावसायिक सीप प्रदान गरी शिक्षालाई रोजगारमूलक बनाउन १ लाख विद्यार्थीलाई सीपमूलक तालिम प्रदान गरिने बताए। त्यस्तै, युवालाई छोटो अवधिको रोजगारमूलक तालिम दिने कार्यक्रम सञ्चालनका लागि बजेट व्यवस्था गरिएको पनि उनले जानकारी दिए।
विद्यालय तहमा नै विद्यार्थीलाई व्यवसायप्रति आकर्षित बनाउन सिक्दै कमाउदै कार्यक्रम चालु वर्ष १४० विद्यालयमा शुरु गरिएको र आगामी वर्ष थप १०० विद्यालयमा विस्तार गर्नेगरी थप बजेट विनियोजन गरिने मन्त्री पौडेलको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792052881.png)
-1786602170.png)
