काठमाडौं- रियल मड्रिड र क्याटलान क्लब बार्सिलोनाबीचको नयाँ सिजन अघिको ‘एल क्लासिको’ २३ जुलाईमा हुने भएको छ। नयाँ सिजन सुरु हुनुअघि अमेरिका भ्रमणमा रहँदा यी दुई टोलीले लस भेगासमा २३ जुलाईमा खेल्ने तय भएको हो। यी दुई बीचको खेल एलिजाइन्ट स्टेडियममा हुने जनाइएको छ।
अमेरिकी भूमिमा बार्सिलोना र रियलले दोस्रोपटक खेल्न लागेका हुन्। गत सिजनमा रियल र बार्सिलोना हार्ड रक स्टेडियममा खेलेका थिए।
नयाँ सिजनको लागि बार्सिलोनाले हालसम्म कुनै खेलाडी अनुबन्ध गरेको छैन। तर, बार्सिलोनाले जर्मन क्लब बायर्न म्युनिखका पोलिस फरवार्ड रोवर्ट लेवान्डोस्की भित्र्याउने प्रयास गरिरहेको छ।
यता, रियलले यो सिजन फ्रान्सेली स्टार केलियन एमबाप्पे र नर्वेजियन एर्लिङ ब्राउट हालान्डलाई अनुबन्ध गर्ने प्रयास गरेको थियो। तर, एमबाप्पेले पेरिस सेन्ट जर्मेन (पीएसजी) नै बस्ने इच्छा जाहेर गरेका थिए। यता, हालान्ड भने इङ्ग्लिस प्रिमियर क्लब म्यानचेस्टर सिटीमा आवद्द भइसकेका छन्।
यी दुई टोली ४१ पटक आमनेसामने भइसकेका छन्। जसमा बार्सिलोना १६ तथा रियल १५ खेलमा विजयी भएको छ। १० खेल बराबरीमा सकिएको छ।
रियलसँग खेलेको चार दिनपछि बार्सिलोनाले इटालियन क्लब युभेन्ट्ससँग २६ जुलाईमा डालासमा खेल्नेछ। यी दुई खेलका अलवा बार्सिलोनाले अमेरिका टूरमा १९ जुलाईमा इन्टर मियामी एफसी र ३० जुलाईमा न्युयोर्क रेडबुल्ससँग खेल्ने तालिका छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790151426.jpg)
-1786602170.png)
-1789631269.jpg)
