काठमाडौं– सुनिल क्षेत्रीको नेतृत्वमा रहेको भारतीय फुटबल टोलीले शनिबार एएफसी एसियन कप २०२३ छनोटको तेस्रो चरण अन्तर्गत समूह ‘डी’मा अफगानिस्तानसँग प्रतिस्पर्धा गर्दै छ। भारत र अफगानिस्तानबीचको यो खेल नेपाली समयअनुसार राति ८: ४५ बजेबाट सुरु हुनेछ।
तेस्रो चरणको पहिलो खेलमा भारतले कम्बोडियालाई २–० ले हराएको थियो। यता, अफगानिस्तान आफ्नो पहिलो खेलमा हङकङसँग २–१ ले पराजित गरेको थियो। भारतविरुद्धको यो खेल अफगानिस्तानका लागि ‘गर या मर’को हुनेछ। अफगानिस्तान पराजित भएको खण्डमा प्रतियोगिताबाट बाहिने छ।
३७ वर्षीय सुनिल अफगानिस्तानलाई हराएर भारतको स्थिति बलियो बनाउन चाहन्छन्। लगातार दोस्रोपटक एसिया कपमा पुग्न भारतको निर्भरता सुनिलमा थुप्रिएको छ। सक्रिय फुटबल खेलिरहेका सुनिलले ८२ गोल अन्तर्राष्ट्रिय गोल गरिसकेका छन्। उनले अन्तर्राष्ट्रिय गोलमा अर्जेन्टिनी स्ट्राइकर लिओनल मेसीलाई पछ्याइरहेका छन्। मेसीले हालसम्म ८६ गोल गरेका छन्। यदि सुनिलले यी दुई खेलमा चार गोल गरे भने उनले मेसीको कीर्तिमान बराबरी गर्नेछन्।
भारतको सर्वाधिक गोलकर्ता रहेका सुनिलले १२७ क्याप जित्दा ८२ अन्तर्राष्ट्रिय गोल गरेका छन्। उनी विश्वको सर्वाधिक गोलकर्ताको सूचीमा छैटौं स्थानमा रहेका छन्। उनीभन्दा अघि क्रिस्टियानो रोनाल्डो (११७), अली दाई (१०९), मोख्तर दाहरी (८९), मेसी (८६) र फेरेन्क पुस्कास (८४) रहेका छन्।
भारतीय फुटबल टोलीका मुख्य प्रशिक्षक इगोर स्टिम्याक आफू सुनिलमाथि नै निर्भर रहेको बताउँछन्। ‘सुनिलले लगातार राम्रो खेल प्रदर्शन गरिरहेका छन्। उनको कप्तानीमा पनि खोट लगाउने ठाउँ छैन। तर, हामीसँग उनीबाहेक अन्य खेलाडी पनि छन्, जो हाम्रो लागि महत्त्वपूर्ण छन्,’ उनले अफगानिस्तानसँगको खेलअघि भने।
अफगानिस्तानको लागि यो गर वा मरको खेलमा भारतको ब्याकलाइनले महत्त्वपूर्ण भूमिका खेल्नेछ। कम्बोडियाविरुद्धको खेलमा रोशन सिंह, सन्देश झिंगान, अनवर अली र आकाश मिश्राले उत्कृष्ट प्रदर्शन गरेका थिए। उनीहरुको अलावा लिस्टन कोलेको, मनवीर सिंह, उदन्त सिंह, आशिक कुरुनियान र रोशन सिंहले पनि उत्कृष्ट खेल प्रदर्शन गर्दै आइरहेका छन्।
अफगानिस्तानका प्रशिक्षक अनुस दस्तगीरले भारतलाई बलियो चुनौती दिने बताए। ‘विश्वकप छनोटमा हामीले भारतसँग १–१ को बराबरी खेलेका थियौं। त्यसैले उनीहरुले कुन स्तरमा खेल्छन् भन्ने थाहा छ,’ उनले भने, ‘हङकङसँगको खेलमा हामीले सुरुमै गोल खान पुग्यौं। त्यसपछि पुनरागमन गर्न सकेनौं। अब भारतसँगको खेलमा यस्तो गल्ती गर्ने छैनौं।’
भारतले छनोट चरणको अन्तिम खेलमा हङकङसँग खेल्ने छ। शनिबार नै हङकङ र कम्बोडियाले पनि प्रतिस्पर्धा गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
