चितवन– चितवन राष्ट्रिय निकुञ्ज आसपासका क्षेत्रमा एकै दिन दुई ठाउँमा बाघले आक्रमण गरेको छ। ती घटनामा दुई जना घाइते भएका हुन्।
जिल्ला प्रहरी कार्यालय चितवनका अनुसार शुक्रबार दिउँसो ४ः२० बजेको समयमा भरतपुर महानगरपालिका–२३ स्थित हरियाली सामुदायिक वनमा बाघले आक्रमण गरेको छ। भरतपुर २४ का ४३ वर्षीय राजेश वाइवालाई बाघले आक्रमण गरेको हो।
स्थानीय ६० वर्षीय कृष्णबहादुर लामासँगै राप्ती नदी हेर्न गएको समयमा वाइवालाई बाघले आक्रमण गरेको प्रहरीले जनाएको छ। घाइते वाईवाको चितवन मेडिकल कलेज भरतपुरमा उपचार भइरहेको छ। उनको छाती र कुममा चोट लागेको छ।
शुक्रबार बिहान ६ बजे तरकारी टिप्न खेतमा जाने क्रममा राप्ती नगरपालिका–१ का ४३ वर्षीय इन्द्रबहादुर थिङ (वाइवा) लाई अर्को बाघले आक्रमण गरी घाइते बनाएको थियो।
घाइते थिङको भरतपुर अस्पतालमा उपचार भइरहेको छ। राप्तीमा आक्रमण गर्ने बाघलाई निकुञ्जले नियन्त्रणमा लिएको छ। चितवन राष्ट्रिय निकुञ्जको प्राविधिकसहितको टोलीले आजै नियन्त्रणमा लिएको हो।
उक्त टोलीले सोही क्षेत्रबाट बाघलाई डार्ट गरेर नियन्त्रणमा लिएको निकुञ्जका सूचना अधिकारी गणेशप्रसाद तिवारीले बताइ। उनका अनुसार बस्ती नजिकको झाडीबाट बाघलाई नियन्त्रणमा लिइएको हो।
उक्त बाघलाई निकुञ्जको सौराहा सेक्टरमा रहेको खोरमा राखिने छ। उक्त भाले बाघको उमेर भने खुलेको छैन। यसअघि नियन्त्रणमा लिइएका दुई वटा बाघ कसरास्थित खोरमा राखिएको छ। चितवनमा पछिल्लो समय बाघको आक्रमण बढेको छ। निकुञ्ज र मध्यवर्ती क्षेत्रमा गएको ११ महिनामा बाघको आक्रमणबाट १५ जनाको मृत्यु भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
