काठमाडौं– फिफा कतार विश्वकप २०२२ को टिकट कटाउनबाट एक कदम टाढा उभिएका युक्रेनका चर्चित फुटबलर ओलेक्जेन्डर जिनचेन्कोले स्कटल्याण्डविरुद्धको प्लेअफअघि पत्रकार सम्मेलनमा आँसु झारे।
यस क्रममा उनले विश्वकपमा आफ्नो देशको प्रतिनिधित्व गर्नु आफू र आफ्ना सहकर्मीका लागि कत्तिको महत्त्वपूर्ण छ भनेर बताउन खोजिरहेका थिए।
म्यानचेस्टर सिटीलाई इङ्लिस प्रिमियर लिगको उपाधि जिताउन महत्त्वपूर्ण भूमिका खेलेका डिफेन्डर जिनचेन्को अहिले युक्रेनी समर्थकहरुका लागि आफ्नो टोली विश्वकपमा पुग्न जरुरी रहेको बताउँछन्।
स्कटल्याण्डसँगको खेलअघि उनले भनेका थिए, ‘यसबेला म र मेरो टोली देशवासीलाई खुशी दिन चाहन्छौं। उनीहरूलाई अहिले यसको धेरै आवश्यकता छ।’
हामी सबैलाई थाहा छ, युक्रेनमा अहिले के भइरहेको छ। त्यसैले उनीहरु सबै मैदानमा लड्ने मुडमा देखिन्छन्, जसरी रुसी सेनाविरुद्ध लडिरहेका छन्।
जिनचेन्कोका अनुसार युक्रेनीहरू सधैं युद्ध अन्त्य होस् भन्ने चाहन्छन्। साथै युद्धग्रस्त क्षेत्रबाट युक्रेनले विश्वकपमा स्थान बनाओस् भन्ने पनि। उनले भने, ‘धेरै युक्रेनीहरूले यो खेल हेर्न पाउनेछन्। सिङ्गो देश हाम्रो पछाडि उभिएको छ र हामीलाई समर्थन गरिरहेका छन्।’
युद्धग्रस्त युक्रेनले बुधबार राति स्कटल्याण्डलाई ३–१ ले पराजित गर्दै प्लेअफको फाइनलमा पुगेको थियो। यो खेल मार्चमा हुने तय थियो। तर, रुसले युक्रेनमा गरेको आक्रमणका कारण खेल स्थगित भएको थियो। अब विश्वकपमा स्थान बनाउन युक्रेनले आज आइतबार ह्याम्पडेन पार्कमा वेल्ससँग खेल्नेछ।
खेल वेल्सको कार्डिफ सिटीमा नेपाली समयअनुसार ९ः४५ बजे हुनेछ। विश्वकप छनोट प्लेअफ फाइनलमा वेल्सले युक्रेनको आतिथ्य गर्दा वेल्स दोस्रोपटक विश्वकप खेल्ने लक्ष्यमा हुनेछ।
युक्रेनी राष्ट्रपति भ्लादिमिर जेलेन्स्कीले युक्रेनी टोलीलाई फाइनल खेल्ने टोलीलाई शुभकामना दिसकेका छन्। यता, प्रशिक्षक अलेक्जान्डर पेट्राकोभले टोलीको तयारी निकै कठिन भएको बताए।
यस्तो अवस्थामा टोलीका हरेक खेलाडीलाई आफ्नो आमाबुवा, परिवार, आफन्तको चिन्ताले सताएको उनको भनाइ छ। ‘उनीहरुलाई यस खेलका लागि तयार पार्न निक्कै मुस्किल पर्यो। उनीहरुको मस्तिष्कमा देशमा के हुने हो? भन्ने चिन्ता छ,’ उनले भने।
उनका अनुसार युद्धका कारण ९ खेलाडीले मात्रै खेल्ने मौका पाएका छन्। अन्यले भने नियमित फुटबल खेल्न पाएका छैनन्। ‘युक्रेनको २६ सदस्यीय टोलीमा जिनसेन्को र अन्य ९ खेलाडीले युद्धको समयमा बाहिरका क्लबहरू खेल्ने मौका पाए। बाँकी खेलाडीले डिसेम्बरदेखि घरेलु मैदानमा कुनै पनि प्रतियोगिता खेल्ने मौका पाएका छैनन्,’ उनले भने।
पछिल्लो एक महिनादेखि टोलीले देशबाहिर तयारी गर्ने मौका पाएको छ। युक्रेनले पछिल्लो पटक २००६ को विश्वकप खेलेको थियो। उसले विश्वकप नखेलेको पनि १६ वर्ष भइसकेको छ।
योसँगै वेल्स पनि विश्वकपमा छनोट हुन आतुर छ। वेल्सले ६४ वर्षदेखि विश्वकप खेलेको थियो। वेल्सले यसअघि सन् १९५८ मा पहिलोपल्ट विश्वकप खेलेको हो। त्यसयता वेल्स विश्वकपमा छनोट हुनै सकेको छैन।
यो खेलको विजेताले आगामी नोभेम्बरमा कतारमा हुने विश्वकपमा इङ्ग्ल्याण्ड, अमेरिका र इरानको समूहमा सामेल हुनेछ। वेल्सका ग्यारेथ बेलले यो खेल एउटा ठूलो खेल भएको बताउँदै जित नै आफ्नो लक्ष्य रहेको बताए।
‘हामी अहिलेसम्म एकपल्ट मात्र विश्वकपमा पुगेका छौं। हामी एक कदम अगाडि बढ्न चाहन्छौं,’ उनले भने, ‘युक्रेनको पछिल्लो अवस्थाबारे हामी जानकार छौं। युक्रेनी सबैमा हाम्रो सम्मान छ। तर, हामी फुटबल खेल खेल्न गइरहेका छौं र जित्न चाहन्छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1775812183.jpg)
-1764146706.png)
-1779545841.jpg)
