काठमाडौं- ब्राजिलका फुटबल लेजेन्ड पेलेले रूसी राष्ट्रपति भ्लादिमिर पुटिनलाई युक्रेनमा आक्रमण अन्त्य गर्न अनुरोध गर्दै खुलापत्र लेखेका छन्।
युक्रेनी राष्ट्रिय फुटबल टोलीले विश्वकपको प्लेअफ सेमिफाइनलमा स्कटल्याण्डसँग खेल्नु अघि पेलेले इन्स्टाग्राममार्फत् खुला पत्र सार्वजनिक गरेका हुन्।
युद्धग्रस्त युक्रेनको राष्ट्रिय टोलीले बुधबार राति सम्पन्न फिफा कतार विश्वकप २०२२ छनोटमा स्कटल्याण्डलाई ३–१ ले हराउँदै अघिल्लो चरणको यात्रा कायमै राखेको थियो। अब उसले बुधबार प्लेअफ फाइनमा वेल्सको सामाना गर्ने छ।
‘आज युक्रेनले कम्तिमा ९० मिनेटको लागि त्यो त्रास भुल्न खोजेको छ, जसले अझै पनि आफ्नो देशलाई घेरेको छ। म आजको खेललाई अनुरोध गर्ने अवसरको रूपमा प्रयोग गर्न चाहन्छु, आक्रमण रोक्नुहोस्। यो निरन्तर हिंसाको कुनै औचित्य छैन,’ उनले लेखेका छन्।
उनको सन्देश युक्रेन द्वन्द्वको १००औं दिनको नजिक सार्वजनिक भएको हो। युक्रेनको राजधानी किएभलाई कब्जा गर्ने प्रयास गर्ने प्रयास असफल भएपछि रुसी सेना देशको पूर्वीक्षेत्रमा लडिरहेको छ।
तीन पटकको विश्वकप विजेता पेलेले द्वन्द्वले पीडा, डर र आतंकबाहेक केही नल्याउने भन्दै यसले दुई राष्ट्रलाई अलग बनाउने चेतावनी दिएका छन्।
‘यो द्वन्द्व खराब, अव्यावहारिक छ। यसले पीडा, डर, आतंकबाहेक केही ल्याउँदैन। युद्धले केवल राष्ट्रहरू अलग मात्र गर्छ। त्यो राम्रो विचार हुनै सक्दैन,’ उनले पत्रमा भनेका छन्।
पेलेले सन् १९७७ मा फुटबलबाट सन्यास लिएका थिए। आफ्नो २१ वर्ष लामो फुटबल जीवनका क्रममा उनले १,३६३ खेलमा १,२८१ गोल गरेर विश्व कीर्तिमान बनाएका थिए। सो अवधिमा उनले ब्रजिलका लागि ९१ खेलमा ७७ गोल गरे।
तीनवटा विश्वकप जित्ने उनी एक मात्र खेलाडी हुन्। ब्रजिलले सन् १९५८, १९६२ र १९७० मा विश्वकप फुटबल जितेको थियो। पेलेले विश्वकपका कुल १४ खेलमा १२ गोल गरे।
पेलेलाई फिफाले शताब्दी खेलाडीको उपाधि दिएको थियो। हाल उनी अस्वस्थ छन्। गत सेप्टेम्बरमा पेलेको कोलोन ट्युमरको शल्यक्रिया गरिएको थियो। अहिले किमोथेरापी चलिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768457877.png)
-1764146706.png)
-1768395492.png)
