काठमाडौं– आशाले भरिएको अर्को सिजन या निराशाले भरिएको यो सिजन? रोयल च्यालेन्जर्स बैंग्लोरको इन्डियन प्रिमियर लिग (आईपीएल)को यात्रालाई कसरी हेर्न चाहनुहुन्छ?
बैंग्लोर लगातार तीन वर्षदेखि प्लेअफमा प्रवेश गरेको छ। पछिल्ला दुई सिजनमा एलिमिनेटरमा हार बेहोरेको बैंग्लोर यसपटक चुनौतीलाई पार गर्दै दोस्रो क्वालिफायरसम्म पुग्यो।
तर, निर्णायक मानिएको खेलमा राजस्थान रोयल्ससँग ७ विकेटले पराजित भयो। मुख्य ब्याटर विराट कोहली, ग्लेन म्याक्सेवल र फाफ डु प्लेसिसज महत्वपूर्ण खेलमा सस्तैमा आउट भए।
बैंग्लोरका रजत पाटिदारले सर्वाधिक ५८ रन बनाउनुबाहेक अन्य खेलाडीले प्रशंसा गर्न योग्य रन बनाउन सकेनन्। जसकारण बैंग्लोर १५७ रनमा समेटियो।
बैंग्लोरका क्रिकेट निर्देशक माइक हेसन पनि राजस्थानविरुद्धको खेलमा ब्याटिङ नचलेको स्वीकार गर्छन्। ‘१७५–१८० को स्कोर बनाएको भए बैंग्लोरले राजस्थानलाई बलियो चुनौती दिन सक्थ्यो। तर, राजस्थानका बलरअघि बैंग्लोरका ब्याटर चलेनन् र खेल गुमायौं,’ उनी भन्छन्।
राजस्थानका तीव्र गतिका बलर प्रसिद्ध कृष्णले बैंग्लोरविरुद्ध उत्कृष्ट खेल प्रदर्शन गरे। उनले ४ ओभरमा २२ रन खर्चेर ३ विकेट लिए। यता, ओबेद म्याकोयरले २ विकेट लिए।
म्याकोयरले गति परिवर्तन गर्दै ब्याटरहरूलाई सेट हुन दिएन। यता, कृष्णले पनि बैंग्लोरका खेलाडीहरूलाई खुलेर खेल्न दिएनन्। यी दुई बलरको शानदार बलिङका कारण बैंग्लोरले अन्तिम ५ ओभरमा ३५ रन मात्र बनाएको थियो भने ५ विकेट पनि गुमायो।
खेलपछि हेसनले भने, ‘हाम्रो ब्याटिङ अझ राम्रो हुन सक्थ्यो। १२३ रनमा ३ विकेट गुमाएका थियौं। त्यसपछि अझै ५ ओभर बाँकी थियो र हामी १७५–१८० सम्म पुग्न सक्थ्यौं। म्याक्सवेल र पाटिदार सेट थिए। हामीले त्यहाँ लगातार विकेट गुमायौं। म्याकोयर र प्रसिद्ध राम्रो बलिङ गरे र हामीलाई खुलेर खेल्न दिएनन्। हामीले अन्तिम पाँच ओभरमा ३० रन मात्र बनाउन सक्यौं।’
यद्यपि, हेसन डेथ ओभरमा बैंग्लोरको ब्याटिङलाई खराब भन्न नमिल्ने बताउँछन्। ‘हाम्रो ब्याटिङ सिजनभरका अन्तिम पाँच ओभरमा उत्कृष्ट रह्यो। सायद शीर्ष क्रमले हामीले सोचे जस्तो योगदान दिन सकेनन्। आजबाहेक सबै खेलमा हामीले डेथ ओभरमा राम्रो ब्याटिङ गरेका थियौं,’ उनले भने।
आफ्नो टोलीका कमजोरीहरूको बारेमा कुरा गर्दै हेसनले खेलाडीहरूले आफ्नो गल्तीबाट पाठ सिक्ने बताए। योसँगै उनले अब यो टोली दुई–तीन खेलाडीमा भर नपर्ने पनि दाबी गरे।
‘केवल दुई या तीन खेलाडीमा भर परेर तपाईं प्लेअफमा पुग्न सक्नुहुन्न। हामी हाम्रा रिटेन गरिएका खेलाडीहरूमा मात्र निर्भर थिएनौं। धेरै खेलाडीहरूले खेल जिताउन योगदान दिए,’ उनले भने।
हेसनले पछिल्लो चार–पाँच इनिङ्समा विराट कोहली राम्रो लयमा देखिएको पनि बताए। प्रतियोगिताबाट बाहिरिएपछि धेरै कुरामा काम गर्न सकिने उनले स्वीकार गरे, तर टोलीको एकतामा आफू खुसी रहेको प्रतिक्रिया दिए।
पाटिदारले प्रतिस्थापन खेलाडीको रुपमा टोलीमा स्थान बनाएका थिए। उनले टोलीमा स्थान बनाएपछि आफूलाई प्रमाणितसमेत गरे। दुई दिनअघि उनी प्लेअफमा शतक बनाउने पहिलो ‘अनक्याप्ड’ खेलाडी बने र त्यसपछि राजस्थानविरुद्ध अर्धशतक पनि बनाए।
यसबाहेक शाहबाज अहमदले यो सिजनमा सबै खेल खेले र आफ्नो अलराउन्डर प्रदर्शनले सबैलाई प्रभावित पारे। २०२१ मा पर्पल क्याप जितेका हर्षल पटेलले व्यक्तिगत कठिनाइहरूको सामना गरेपछि फर्केर किफायती बलिङ गरे।
यसबाहेक भारतीय टोलीमा फर्किने इच्छा लिएर मैदानमा उत्रेका दिनेश कार्तिकको फर्म भने हेर्नलायक देखिएको थियो। २२० को स्ट्राइक रेटमा रन बनाएका उनले डेथ ओभरमा पनि टोलीलाई बलियो साथ दिए।
विदेशी खेलाडीमध्ये जोस ह्याजलवुड र भानिन्दु हसरंगाले उत्कृष्ट प्रदर्शन गरे। सिजनका सकारात्मक पक्षहरूको बारेमा बोल्दै हेसनले भने, ‘पाटिदार, शाहबाज, लोमररजस्ता धेरै खेलाडीहरूले आफूलाई प्रमाणित गरे। हर्षल बलिङमा चम्किए। कार्तिकले राम्रो भूमिका निर्वाह गरे। ह्याजलवुडले उत्कृष्ट बलिङ गरे, बीचको ओभरमा धेरै विकेट लिएका कारण हसरंगासँग अहिले पर्पल क्यापका दाबेदार छन्। हामीलाई पावरप्लेमा अझै केही विकेट र अलि बढी रन चाहिन्छ। समग्रमा भन्दा यो सिजन सबै राम्रो भयो।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
-1786513116.png)
