काठमाडौं- बहराइनमा आयोजना हुने एएफसी यु–१७ एसियन कप छनोट खेलका लागि एएफसीले तालिका सार्वजनिक गरेको छ।
एएफसीले मंगलबार सार्वजनिक गरेको तालिका अनुसार नेपाल समूह एफमा परेको छ । चार टोली रहेको समूहमा नेपालसहित थाइल्यान्ड, भियतनामा र चाइनिज ताईपेइ रहेका छन् । एएफसीले जारी गरेको तालिका अनुसार नेपाल सम्मिलित समूहका छनोट खेल भियतनाममा अक्टोबर १ देखि ९ सम्म हुने तालिका रहेको छ।
सिंगल राउन्ड रोबिनको आधारमा हुने खेलको समूह विजेताले बहराइनमा आयोजना हुने एसियन कपमा स्थान बनाउने छन्। एएफसीले छनोट खेल्न लागेका एसियाली ४४ राष्ट्रलाई १० समूहमा विभाजन गरेर मंगलबार तालिका सार्वजनिक गरेको हो। १० समूह अन्तर्गत समूह डी सम्म पाँच टोली रहेका छन्।
यस्तै अन्य समूहमा चार टोली समावेश गरिएको छ। एसियाली पावर हाउस समूह ए मा अटाएको छ भने छिमेकी भारत समूह डीमा समावेश छ। सँगै अर्को दक्षिण एसियाली राष्ट्र माल्दिभ्स पनि समूह डी मा नै रहेको छ । यस्तै भुटान र बंगलादेश समूह इ मा छन् भने श्रीलंका समूह जे मा समावेश छ।
हरेक समूहको विजेताले बहराइनको यात्रा तय गर्नेछ। यस्तै समूहको दोस्रो हुने उत्कृष्ट ५ टोलीले समेत एसियन कप खेल्नेछ। एएफसी यु–१७ एसियन कपमा १६ टोलीले प्रतिस्पर्धा गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
