काठमाडौं- प्रतिनिधि सभाका सांसदहरूले पेट्रोलियम पदार्थमा भएको मूल्यवृद्धिको विषयमा संसद्मा जरूरी सार्वजनिक महत्त्वको प्रस्ताव दर्ता गराएका छन्।
प्रतिनिधि सभा सदस्य विशाल भट्टराई प्रस्तावक र सांसदहरू यज्ञराज सुनुवार, गणेश कुमार पहाडी, राजेन्द्र प्रसाद लिङ्देन र दुर्गा पौडेल समर्थक रहेर संसद् सचिवालयमा उक्त प्रस्ताव दर्ता गराएका हुन्।
जनताको ढाड सेक्नेगरी, प्रचलित नियम, कानुन, निर्देशिका विपरित, अन्य विकल्प हुँदाहुँदै बदनियतपूर्वक गरिएको मूल्यवृद्धिको विषयमा प्रतिनिधि सभामा ब्यापक छलफलको माग गर्दै प्रस्ताव दर्ता गरिएको हो।
नेपालको संविधानले परिकल्पना गरेको समाजवादउन्मुख स्वतन्त्र र समृद्ध अर्थतन्त्रको विकास गर्ने राज्यको आर्थिक उद्देश्यमा वर्तमान सरकारको अदूरदर्शीता र गैर जिम्मेवार गतिविधिका कारण आघात पुगेको प्रस्तावमा उल्लेख छ।
अर्थतन्त्रका प्रमुख परिसूचकहरु उत्पादन, उपभोग, बचत, लगानी, शोधान्तर बचत, भुक्तानी सन्तुलन, व्यापार, कुल गार्हस्थ उत्पादन, कुल राष्ट्रिय उत्पादन जस्ता पक्षमा सरकारले यथेष्ट ध्यान पुयाउन नसक्दा अर्थतन्त्र थप धरासायी हुन पुगेको सांसदहरूले उल्लेख गरेका छन्।
‘सरकारले नागरिकको जनजीविकाको विषयलाई ध्यान दिएर मुद्रास्फितिलाई रोक्नुको सट्टा दिनानुदिन खाना पकाउने ग्यास र डिजेल, पेट्रोल, मट्टितेल लगायतका जनताको जनजीविकासँग जोडिएका पेट्रोलियम पदार्थको स्वचालित मूल्य निर्धारण कार्यविधिअनुसार नेपालमा आयात हुने पेट्रोलियम पदार्थको बिक्री मूल्य बमोजिम पन्ध्र दिनमा एकपटक समायोजन गर्न सक्ने प्रावधान विपरीत बढाएको छ,’ प्रस्तावमा भनिएको छ।
उद्योग, वाणिज्य तथा आपूर्ति मन्त्रीले मूल्यवृद्धिका कारण जनताको जनजीविकामा पर्न गएको असरबारे जिम्मेवार भएर छलफल गर्नुको सट्टा बेमौसमी रुपमा नेपाल आयल निगमको निजीकरण गर्ने कुरा उठाइरहेको पनि उनीहरुले उल्लेख गरेका छन्।
पेट्रोलियम पदार्थको स्वचालित मूल्य निर्धारण कार्यविधिअनुसार नेपालमा आयात हुने पेट्रोलियम पदार्थको बिक्री मूल्य परल मूल्य बमोजिम १५ दिनमा एकपटक समायोजन गर्न सक्ने प्रावधानविरुद्ध गएर गरिएको मूल्यवृद्धि तत्काल फिर्ता गर्न सरकारसँग माग गर्न छलफल आवश्यक रहेको सांसदहरुले भनेका छन्।
खाना पकाउने ग्यास, पेट्रोल, डिजेल र मट्टितेल लगायतका पदार्थमा भइराखेको चुहावट, कमिशन र अत्यधिक करलाई न्यूनीकरण गर्न यी पदार्थमा भएको मूल्य घटाउन सरकारले गरेको प्रयासबारे स्पष्ट खाका सरकारसँग माग गर्न, खाना पकाउने ग्यास, पेट्रोल, डिजेल र मट्टितेल लगायतका पदार्थको मूल्य घटाउन सरकारले के कस्तो गृहकार्य गरिरहेको छ? यदी गृहकार्य गरिरहेको छ भने उक्त कार्यको प्रगतिसहित जनताले कहिले राहत पाउँछन्? स्पष्ट कार्ययोजना सरकारसँग माग गरिएको छ।
त्यस्तै खाना पकाउने ग्यास, पेट्रोल डिजेल र मट्टितेल लगायतका पदार्थको मूल्य वृद्धिले गर्दा गरिब, सीमान्तकृत, कमजोर आय स्रोत भएका वर्ग, विद्यार्थी लगायत आम जनताको दैनिक जनजीवनमा पार्ने असरबारे अर्थशास्त्रीय दृष्टिकोणबाट गरिएको बहुआयिक प्रभावसहितको विश्लेषणात्मक प्रतिवेदन सरकारसँग माग गर्न, मूल्य वृद्धिका कारण हुँदा खाने वर्गको जनजीवन सहज बनाउन सरकारले के कस्ता योजना लिएको छ? त्यसको जानकारी माग गर्न, सरकारले अब मूल्यवृद्धि नगर्नका लागि के कस्तो पहल लिएको छ ? यदी पहल लिएको छ भने उक्त पहलमा के कस्तो प्रगति भएको छ? सो बारे सरकारसँग जानकारी माग गर्न जरूरी सार्वजनिक महत्त्वको प्रस्ताव दर्ता गरेर छलफल गर्न सांसदहरूले माग गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
