काठमाडौं– अखिल नेपाल फुटबल संघ (एन्फा)को आसन्न निर्वाचनका लागि राजीवराज पौड्यालले उम्मेदवारी घोषणा गरेका छन्।
सोमबार पत्रकार सम्मेलन गर्दै ‘ए’ डिभिजन क्लब फ्रेण्ड्सका पूर्वअध्यक्षसमेत रहेका पौड्यालले उम्मेदवारी घोषणा गरेका हुन्। उनले मंगलबार मनोनयन दर्ता गर्नेछन्।
यसअघि नै एन्फाका वर्तमान अध्यक्ष कर्माछिरिङ शेर्पा र वरिष्ठ उपाध्यक्ष पंकज नेम्वाङले अध्यक्ष पदमा मनोनयन दर्ता गराइसकेका छन्।
शेर्पाले सोमबार दिउँसो प्यानलसहित उम्मेदवारी घोषणा गर्दै मनोनयन दर्ता गरेका हुन्। नेम्वाङले गत शुक्रबार उम्मेदवारी दर्ता गरेका थिए।
सोमबार शेर्पा प्यानलबाट अध्यक्ष, वरिष्ठ उपाध्यक्ष, चार उपाध्यक्ष र १२ सदस्यसहित १८ जनाले मनमेनयन दर्ता गराएका छन्।
वरिष्ठ उपाध्यक्षमा शिक्षित पराजुली रहेका छन्। यस्तै, विज्ञानराज शर्मा, उपेन्द्रमान सिंह, दीर्घबहादुर केसी र रत्नकुमार श्रेष्ठले उपाध्यक्षमा उम्मेदवारी दर्ता गराएका छन्।
बाँकी १२ जनाले सदस्य पदमा मनोनयन दर्ता गराएका छन्। सदस्यमा मनोनयन दर्ता गराउनेहरूमा फ्रेण्ड्स क्लबका अध्यक्ष दीपक थापा, सिराहका प्रविण यादव, साँगा क्लबका रुपेश अधिकारी, लम्जुङका लोकेन्द्र गुरुङ, बाग्लुङका पूर्वअध्यक्ष रामराजा गुरुङ, मकवानपुरका अध्यक्ष टिकाराम लामा, बाँकेका प्रदेशसिंह राठोर, जुम्लाका भरत बुढथापा, मछिन्द्र क्लबका उपाध्यक्ष अनिल श्रेष्ठ, च्यासल क्लबका अध्यक्ष रमेश व्यञ्जनकार, खुमलटार युथ क्लबका अध्यक्ष मणिराज विष्ट र टोखा क्लबका मनिष जोशीले मनोनयन दर्ता गराएका छन्।
एन्फा निर्वाचनबाट २१ जना निर्वाचित हुनेछन्। शेर्पा प्यानलबाट दुई महिला सदस्य र एक सदस्यको टुंगो लाग्न बाँकी छ।
एन्फा निर्वाचन कमिटीका सदस्यसचिव बद्री भट्टराईका अनुसार नेम्वाङ प्यानलबाट सदस्य पदका लागि सुर्खेतका रवीन्द्र चन्द र मोरङका दीपेन्द्र धिमालले पनि उम्मेदवारी दर्ता गराएका छन्।
यता, बाँकेका भोजराज शाही र कैलालीका अनिल मल्लले पनि सदस्य पदका लागि उम्मेदवारी दर्ता गराएका छन्।
तर, आगामी निर्वाचनका लागि वरिष्ठ उपाध्यक्ष पदमा उम्मेदवारी घोषणा गरेका वीरबहादुर खड्काले भने उम्मेदवारी दर्ता गराएका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
