काठमाडौं– राष्ट्रिय प्रजातन्त्र पार्टीबाट अलग भएर राप्रपा नेपाल गठन गरेका कमल थापाले वैशाख ३० मा भएको स्थानीय तह निर्वाचनमा अपेक्षा गरेअनुसारको नतिजा आउन नसकेको स्वीकार गरेका छन्।
थापाले तयार गरेको राजनीतिक प्रतिवेदनमा एमालेले तालमेल गरेपछि उदासिनता देखाएका कारण आफूहरूले अपेक्षा अनुसारको नतिजा प्राप्त गर्न नसकेको भन्दै दोषारोपण गरेका छन्।
थापाले निर्वाचनअघि एमालेको सूर्य चिन्ह लिएर स्थानीय निर्वाचनमा भाग लिने निर्णय गरेका थिए। थापाको पार्टीले कुनै पनि पालिकामा प्रमुख वा उपप्रमुखमा जित हात पार्न सकेन।
त्यस्तै एमालेले तालमेलका लागि सहयोग पनि नगरेकोप्रति लक्षित गर्दै उनले यस्तो टिप्पणी गरेका हुन्। अलग भएको राप्रपाले ४ पालिकामा प्रमुख र वडाध्यक्षसहित देशभरी नै सम्मानजनक मत पाएपछि थापाले यस्तो टिप्पणी गरेका हुन्।
राजधानीमा स्थानीय निर्वाचनको समीक्षा गर्न बसेको कार्य सम्पादन समितिको बैठकमा थापाले आफ्नो राजनीतिक प्रतिवेदन पेश गर्दै अहिलेको अवस्था बारे पनि टिप्पणी गरेका छन्।
‘चुनावमा हामीले नेकपा (एमाले)सँग सहकार्य गर्ने निर्णय ग¥यौं,’ थापाको प्रतिवेदनमा भनिएको छ, ‘व्यवहारिक र रणनीतिक रूपमा ठिक भएता पनि नेकपा (एमाले)को उदासिनताका कारण स्थानीयस्तरमा सहकार्य अपेक्षाकृत परिणाममुखि हुन सकेन ।’
हालै सम्पन्न स्थानीय तहको निर्वाचनमा आफूहरूको कुनै महत्वाकांक्षा र अपेक्षा नभएको तर पार्टी खडा भएको छोटो अवधिमा नै चुनावमा जानुपर्ने बाध्यात्मक अवस्थाले असर परेको उनको दावी छ।
‘हामीले चुनावमा भाग नलिन पनि सक्थ्यौं तर, चुनाव बहिष्कार गर्दा गलत सन्देश जान्थ्यो,’ थापाको प्रतिवेदनमा भनिएको छ, ‘प्रजातन्त्र र जन सर्वोच्चताको सिद्धान्तमा विश्वास गर्ने पार्टी भएको तथा सुदृढ स्थानीय स्वायत्त शासनप्रणाली राप्रपा नेपालको मुख्य एजेण्डा भएको कारणले गर्दा सांकेतिक रूपमा भए पनि हामीले चुनावमा भाग लियौं ।’
उनले यो चुनावमा प्राप्त अनुभवबाट पाठ सिकेर अब आगामी संसदीय निर्वाचनको तयारी गर्नुपर्ने पनि टिप्पणी गरेका छन् । राजनीतिक रूपमा जनविश्वास घट्दै जाँदा असुरक्षित महसुश गरिरहेका प्रमुख दलहरू स्वयं सिद्धान्तहिन गठबन्धन गरेर आफ्नो अस्तित्व र वर्चस्व रक्षा गर्न उद्यत रहेको आरोप उनले लगाएका छन्।
आगामी केही वर्ष नेपालमा गठबन्धनको राजनीति हावी हुने सम्भावना देखिएको उनको प्रतिवेदनमा उल्लेख छ। हिन्दुराष्ट्र पुनःस्थापना राप्रपा नेपालको मुख्य अजेण्डा भएको भन्दै उनले निकट भविष्यमा नै हिन्दुराष्ट्र पुनःस्थापनाको निम्ति पार्टीले देशव्यापी सशक्त अभियान सञ्चालन गर्ने उल्लेख गरेका छन्।
‘सकेसम्म सर्वपक्षिय राष्ट्रिय सहमतिको आधारमा वर्तमान संविधानमा संशोधन गरी पूर्ण धार्मिक स्वतन्त्रतासहितको हिन्दुराष्ट्र पुनःस्थापना गर्ने हाम्रो प्रयास हुनेछ,’ थापाको प्रतिवेदनमा भनिएको छ, ‘त्यस्तो सहमति जुट्न नसकेको अवस्थामा संविधान प्रदत्त अधिकार अनुरुप ‘धर्मनिरपेक्षता वा हिन्दुराष्ट्र’ भन्ने विषयमा जनताको प्रत्यक्ष अभिमत बुझ्न राष्ट्रिय जनमत संग्रह गरियोस् भन्ने मागसहित राप्रपा नेपालले जनसंघर्ष गर्नेछ ।’
आगामी संसदीय निर्वाचनबाट राप्रपा नेपाललाई कम्तिमा पनि राष्ट्रिय पार्टी बनाउने तत्कालीन उद्देश्य हुने थापाको प्रतिवेदनमा उल्लेख छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
