फाइल तस्बिर।
काठमाडौं- नेपाली कांग्रेसकी केन्द्रीय सदस्य तथा सांसद डा. डिला संग्रौलाले बलात्कारको घटनामा हदम्याद हटाउन आफूले संसद्मा पहल गर्ने जनाएकी छन्।
नेपाल लाइभसँग कुरा गर्दै प्रतिनिधि सभा सदस्य डा. संग्रौलाले नेपालको संविधान २०७२ ले प्रत्याभूत गरेको सम्मानपूर्वक बाँच्न पाउने हक, समानताको हक, महिलाको हक जस्ता मौलिक हक व्यवहारमा पूर्ण रुपमा लागू गर्न पनि बलात्कारको घटनामा हदम्याद हटाउन आवश्यक भएको बताइन्।
'हदम्याद नाघेको भन्दै जघन्य घटनाका दोषीले उन्मुक्ति पाए भने यो कानुनको उपहास हुनेछ। मैले यो अत्यन्तै गम्भीर विषयमा छलफल गरी कानुन संशोधन गर्न संसद्मा पहल गर्नेछु। घटनाको छानबिन गरी दोषीलाई सजाय दिन म नेपाल सरकारसँग माग गर्दछु,' उनले भनिन्।
मुलुकी अपराधसंहिता-२०७४ मा बलात्कार कसूरबारे उजुरीको हदम्याद तोकिएको छ।
उक्त कानुनअनुसार हाडनाता करणी सम्बन्धी घटनामा पीडितले जहिलेसुकै उजुरी दर्ता गर्न पाउँछन् तर त्यसबाहेक अन्य सबै किसिमका यौनजन्य हिंसा र दुर्व्यवहारको हकमा अपराध भएको मितिले एक वर्षभित्र उजुरी गरि सक्नु पर्छ।
झण्डै ८ वर्षअघि सौन्दर्य प्रतियोगिताका एकजना आयोजकले १६ वर्षीया एक किशोरीलाई पटकपटक बलात्कार गरेको घटना पीडितले नै सामाजिक सञ्जालमार्फत सार्वजनिक गरेकी छन्।
शुक्रबार बसेको प्रतिनिधि सभाको बैठकमा नेपाली कांग्रेसका महामन्त्री तथा सांसद गगन थापाले उक्त विषय उठाएपछि सभामुख अग्नि प्रसाद सापकोटाले उक्त घटनाबारे छानबिन गर्न सरकारलाई निर्देशन दिएका थिए।
त्यसपछि उक्त घटनाबारे छानबिन गर्न नेपाल प्रहरीले वरिष्ठ प्रहरी उपरीक्षक वसन्त कुँवरको संयोजकत्वमा एक अनुसन्धान समिति गठन गरेको छ।
मानवअधिकारवादी तथा विभिन्न राजनीतिकर्मीहरुले पनि बलात्कारको घटनामा हद म्याद हटाउन माग गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
