काठमाडौं- गत माघमा टीकापुर घटनामा दोषी ठहर भएका निलम्बित प्रतिनिधि सभा सांसद रेशम चौधरीले नागरिक उन्मुक्ति पार्टी गठन गरे।
श्रीमती रन्जिता श्रेष्ठको अध्यक्षतामा उनले पार्टी स्थापना गरेका थिए। चार महिनाको समयमा नै कैलालीमा संगठन विस्तार गरेको यो पार्टीले वैशाख ३० गते सम्पन्न स्थानीय तहको निर्वाचनमा कैलालीमा पहिलो राजनीतिक शक्तिका रुपमा स्थापित हुने देखिएको छ।
अहिलेसम्म सार्वजनिक भएको मतपरिणाम अनुसार कैलालीका १३ स्थानीय तहमध्ये ३ वटा स्थानीय तहमा फराकिलो मतान्तर सहित नागरिक उन्मुक्ति पार्टीले विजय हासिल गरेको छ। एउटा स्थानीय तहको अन्तिम मतगणना जारी छ। जानकी गाउँपालिकामा पनि नागरिक उन्मुक्ति पार्टीकै उम्मेदवारहरूको फराकिलो मतान्तर छ। त्यहाँ जित लगभग निश्चित भएको छ।
योसहित नागरिक उन्मुक्ति पार्टीको चारवटा स्थानीय तहमा उपस्थिति हुनेछ। १३ वटा स्थानीय तह मध्ये चारवटामा जित्दै नागरिक उन्मुक्ति पार्टी कैलालीमा पहिलो राजनीतिक शक्तिका रुपमा रहनेछ।
धनगढीको उपमहानगरमा स्वतन्त्र उम्मेदवार गोपाल हमालको अग्रता फराकिलो देखिएकाले त्यहाँ उनले नै जित्ने अनुमान गरिएको छ। अन्य ८ वटा तह मध्ये अहिलेसम्म नेपाली कांग्रेसले कैलारी गाउँपालिका र गोदावरी नगरपालिका गरेर दुई ठाउँमा जितेको छ। लम्की चुहा नगरपालिमा अग्रता लिइरहेको छ।
नेकपा एमालेले चुरे गाउँपालिका र बर्दगोरिया गाउँपालिकामा जित हासिल गरेको छ। नेकपा माओवादी केन्द्रले मोहन्याल गाउँपालिकामा जित निकालेको छ। गौरीगंगा नगरपालिकामा अग्रता लिइरहेको छ। नेकपा एकीकृत समाजवादीले घोडाघोडी नगरपालिकामा जित निकालेको छ।
कैलालीको टिकापुर
कैलालीको दोस्रो ठूलो शहरका रूपमा रहेको टिकापुर नगरपालिकामा पाँच दलीय गठबन्धन, नेकपा एमाले समेतका उम्मेदवारलाई पराजित गर्दै नागरिक उन्मुक्ति पार्टीले आफ्नो जित दर्ता गराएको छ।
टीकापुरमा नागरिक उन्मुक्ति पार्टीका रामलाल डगौरा थारु ९ हजार ६४२ मत ल्याएर प्रमुखमा निर्वाचित भएका हुन्। उनले पाँचदलीय गठबन्धनका उम्मेदवार नवराज रावललाई ३ हजारको फराकिलो मतान्तरले पराजित गरे।
यहाँ उपप्रमुखमा भने गठबन्धनका उम्मेदवार नेकपा माओवादी केन्द्रका खडकबहादुर शाह निर्वाचित भए। नागरिक उन्मुक्ति पार्टीका उम्मेदवार उल्कादेवी विश्वकर्मा भन्दा १५३ मत बढी ल्याएर निर्वाचित भए। शाहले ७ हजार ९५५ र विश्वकर्माले ७ हजार ८०२ मत प्राप्त गरे।
उपप्रमुखको मतगणना पुनः गर्नुपर्ने माग गर्दै नागरिक उन्मुक्ति पार्टीले जिल्ला निर्वाचन कार्यालय कैलालीमा निवेदन समेत दिएको छ।
टिकापुरको प्रमुखमा निर्वाचित थारू नेकपा माओवादी केन्द्र परित्याग गरेर नागरिक उन्मुक्ति पार्टीमा प्रवेश गरेका थिए। उनी २०७४ को स्थानीय तहको निर्वाचनमा टिकापुर नगरपालिका वडा नम्बर ७ बाट नेकपा माओवादी केन्द्रबाट फराकिलो मतान्तरसहित वडा अध्यक्षमा निर्वाचित भएका थिए।
२०७४ मा टीकापुरमा नेकपा एमालेले प्रमुखमा जित हासिल गरेको थियो। अहिलेको निर्वाचनमा नागरिक उन्मुक्ति पार्टीले एमालेबाट उक्त नगरपालिका खोसेर जित हासिल गरेको हो।
प्रमुख बाहेक टिकापुरका ९ वडामध्ये वडा नम्बर १ मा वडाध्यक्ष बाहेक ४ सदस्य जितेको छ। वडा नम्बर २ मा १ सदस्य र १ महिला सदस्य जितेको छ। वडा नम्बर ४ र ५ मा प्यानलसहित जितेको छ। वडा नम्बर ७ मा दुई सदस्य, १ महिला सदस्य, १ दलित सदस्य जितेको छ।
भजनी नगरपालिका
भजनी नगरपालिकामा पनि नागरिक उन्मुक्ति पार्टीले प्रमुख र उपप्रमुख सहित बहुमत जनप्रतिनिधि जितेको छ। त्यहाँ प्रमुखमा ८ हजार ९६६ मत ल्याएर केवल चौधरी निर्वाचित भएका छन्।
नेपाली कांग्रेस, नेकपा माओवादी केन्द्र र नेकपा एकीकृत समाजवादीको गठबन्धनका तर्फबाट माओवादी उम्मेदवार शेरबहादुर चौधरीलाई पराजित गर्दै केवल चौधरी निर्वाचित भएका हुन्। गठबन्धनका उम्मेदवारले ५ हजार १९८ मत प्राप्त गरे।
उपप्रमुखमा गठबन्धनबाट कांग्रेसका उम्मेदवार गोकेन्द्र भण्डारीलाई पराजित गर्दै राजु तिरुवाले ७ हजार ६२२ मत ल्याएर निर्वाचित भएका हुन्। गठबन्धनका उम्मेदवारले ४ हजार ४९० मत प्राप्त गरे।
२०७४ को निर्वाचनमा यो नगरको प्रमुख र उपप्रमुख नेकपा माओवादी केन्द्रले जितेको थियो। अहिले नागरिक उन्मुक्ति पार्टीले माओवादी केन्द्रबाट यो नगरपालिकाको नेतृत्वमा आफ्नो पक्षमा पारेको छ।
यसअघिको निर्वाचनमा यस नगरपालिकाबाट नेकपा माओवादी केन्द्रका शेरबहादुर चौधरी र उपप्रमुखमा नेकपा माओवादी केन्द्रकै छायाँ देवी देवकोटा निर्वाचित भएकी थिइन्।
अहिलेको स्थानीय तहको निर्वाचनमा प्रमुख र उपप्रमुख सहित नागरिक उन्मुक्ति पार्टीले वडा नम्बर १ र ३ मा प्यानल सहित विजयी हासिल गरेको छ। वडा नम्बर ६ मा दलित महिला सदस्य बाहेक सबै विजयी भएको छ। वडा नम्बर ७ मा २ खुल्ला सदस्य र एक महिला सदस्य जितेको छ। भने वडा नम्बर ८ मा वडाध्यक्ष बाहेकका चार सदस्यमा जित हासिल गरेको छ।
जोशीपुर गाउँपालिका
जोशीपुर गाउँपालिकामा पनि नागरिक उन्मुक्ति पार्टीले जित हासिल गरेको छ। जोशीपुर गाउँपालिकाको अध्यक्षमा चित्रबहादुर चौधरी ४ हजार ९०३ मत ल्याएर निर्वाचित भएका छन्। भने उपाध्यक्षमा उन्मुक्ति पार्टीकै रेखादेवी कठरीया ४ हजार ५८१ मत ल्याएर विजयी भएकी छन्।
गठबन्धनलाई पराजित गर्दै अध्यक्ष र उपाध्यक्ष दुवैमा उन्मुक्ति पार्टीले जित हासिल गरेको हो। गठबन्धनका तर्फबाट नेपाली कांग्रेसका बन्सराम बडायकले अध्यक्षमा ३ हजार ३६८ मत प्राप्त गरे। उपाध्यक्षमा नेकपा माओवादी केन्द्रका दिर्घराज बिनाडीले ३ हजार ९६१ मत प्राप्त गरे।
उपाध्यक्षमा नेपाली कांग्रेसले उम्मेदवारी दिएर अन्तिम सहमति गरेपनि उम्मेदवार किरण चौधरीले ३ हजार ११३ मत ल्याएका थिए। जोशीपुर गाउँपालिकामा ०७४ को स्थानीय तहको निर्वाचनमा नेपाली कांग्रेसले अध्यक्ष र उपाध्यक्ष दुवै जितेको थियो। कांग्रेसबाट अध्यक्षमा रामकृष्ण चौधरी र उपाध्यक्षमा गीता कठरिया निर्वाचित भएकी थिइन्।
जोशीपुरमा नागरिक उन्मुक्ति पार्टी अध्यक्ष र उपाध्यक्ष सहित वडा नम्बर १, ३, ४ मा प्यानल सहित विजयी भएको छ। भने वडा नम्बर २ मा एक वडा सदस्य, वडा नम्बर ५ मा दलित महिला सदस्य बाहेक सबै र वडा नम्बर ७ मा दलित महिला सदस्यमा जित हासिल गरेको छ।
जानकी गाउँपालिका
जानकी गाउँपालिकामा नागरिक उन्मुक्ति पार्टीले अग्रता लिइरहेको छ। ९ वडा रहेको यो गाउँपालिकामा ५ वडाको मतगणना सम्पन्न भइसकेको छ। अहिले ४ वटा वडाको मतगणना भइरहेको छ।
मतगणना सम्पन्न भएका वडामध्ये वडा नम्बर ५, ६ र ७ मा प्यानलसहित जित हासिल गरिसकेको छ। वडा नम्बर ८ मा एक वडा सदस्य निर्वाचित भएको छ। मतगणना बाँकी रहेका वडामा पनि अग्रता लिइरहेको छ।
पछिल्लो सार्वजनिक भएको मतपरिणाम अनुसार जानकी गाउँपालिमा उन्मुक्ति पार्टीबाट अध्यक्षका उम्मेदवार गणेश चौधरीले ४ हजार ४६६ मत प्राप्त गरेका छन्।
गठबन्धनका उम्मेदवार नेपाली कांग्रेसका परशुराम महत्तौंले ३ हजार ४५ मत पाएका छन्। चौधरीले महत्तो भन्दा १ हजार ४२१ मत बढी ल्याएका छन्। उपाध्यक्षमा पनि नागरिक उन्मुक्ति पार्टीकै लालमतीदेवी कठरियाले ३ हजार ९३० मत प्राप्त गरेकी छन्। दोस्रो स्थानमा रहेकी नेकपा एमालेकी उम्मेदवार गीता चौधरीले ३ हजार २८३ मत प्राप्त गरेकी छन्।
जानकी गाउँपालिकामा २०७४ को स्थानीय तहको निर्वाचनमा तत्कालीन मधेसी जनअधिकार फोरम, नेपाल लोकतान्त्रिकका प्रदिपकुमार चौधरी अध्यक्षमा निर्वाचित भएका थिए। भने उपाध्यक्ष पनि सोही पार्टीका उम्मेदवार उमा महत्तो निर्वाचित भएकी थिइन्।
कैलाली बाहेकका जिल्लामा पनि संगठन विस्तार गर्ने तयारी
कैलालीको सबैजसो स्थानीय तहमा उम्मेदवारी दिएको भए पनि नागरिक उन्मुक्ति पार्टीले कैलालीको पूर्वी क्षेत्रमा रहेका स्थानीय तहमा आफ्नो जित हासिल गरेको हो।
नागरिक उन्मुक्ति पार्टीको संगठन विभाग प्रमुख लक्ष्मण चौधरीले आफ्नो पक्षमा आएको मतपरिणामबाट ९० प्रतिशत सन्तुष्ट रहेको बताउँछन्।
‘हामीले जति मेहनत गरेका थियौं त्यस अनुसार सन्तुष्ट छौं,’उनले भने,‘बर्दगोरियामा पनि जित हुने अपेक्षा गरेका थियौं तर, कडा प्रतिस्पर्धा गर्न सफल भएका छौं।’
उनले कैलालीमा स्थानीय तहमा आफ्नो पार्टीले जित हासिल गरेसँगै घोषणापत्र अनुसार विकास निर्माणको कामसँगै सामाजिक सद्भावलाई कायम राखेर अघि बढ्ने बताए।
‘०७२ को घटनापछि राज्यले एकपक्षीय रुपमा रेशम चौधरीमाथी अन्यायपूर्ण व्यवहार गर्याे। ०७४ को अभिमतलाई राज्य निकास दिएन,’उनले भने,‘मतदातामा असन्तुष्टि पैदा भएको थियो। त्यो तोड्नका लागि पनि अहिले जनताले हाम्रो पार्टीलाई जनमत सुम्पिएका हुन्।’
उनले अब आफ्नो पार्टी कैलाली जिल्लामा मात्र नभइ अन्य जिल्लामा पनि संगठनलाई प्रभावकारी रुपमा विस्तार गरेर नयाँ रणनीतिका साथ अघि बढ्ने बताए।
नागरिक उन्मुक्ति पार्टीले अब हुने प्रदेश र संघीय निर्वाचनका लागि पनि तयारी अघि बढाइने जनाएको छ।
२०७२ भदौ ७ गते कैलाली कञ्चनपुरलाई ‘अखण्ड’ सुदूरपश्चिममा नराख्न र छुट्टै थरुहट प्रदेशको हुनुपर्ने भन्दै आन्दोलन भएको थियो। थारु समुदायले गरेको प्रदर्शनमा हिंसा भड्किएको थियो। त्यस क्रममा सातजना प्रहरी र एक नाबालक मारिएका थिए। त्यसको भोलिपल्टै टीकापुरमा थारु समुदायका घर, पसल लगायतमा आगजनी गरिएको थियो।
उनीहरूमाथि दमन भएको थियो। तर, यस घटनाको छानबिन गरेर दोषीलाई पक्राउ गरी मुद्दा चलाउने काम नभएको थारु समुदायको आरोप छ। नागरिक उन्मुक्ति पार्टीले पनि अहिले पहिचानको मुद्दालाई नै प्रमुखताको साथ उठाएको थियो।
टीकापुर घटनाका योजनाकारको आरोप लागेका रेशम चौधरी २०७४ को निर्वाचनमा राजपाबाट कैलाली १ बाट प्रतिनिधिसभा सदस्यमा फराकिलो मतको अन्तरले निर्वाचित भएका थिए। उनी आफू भूमिगत नै भएर निर्वाचन लडेका थिए। धेरैपछि उनले आफैं अदालतमा आत्मसमर्पण गरेका थिए।
जिल्ला अदालतले उनलाई पूर्पक्षका लागि थुनामा पठाउने आदेश गरेपछि उनी कारागार चलान भएका थिए। पछि उच्च अदालत दिपायलले पनि जिल्लाकै फैसला सदर गरेको थियो। दुईवटै अदालतको आदेशले पूर्पक्षका लागि काठमाडौंको डिल्लीबजार कारागारमा रहेका चौधरीको मुद्दा सर्वोच्च अदालतमासमेत विचाराधीन नै रहेको छ।
जसपामा विभाजन नहुँदा र त्यसपछिको अवस्थामा पनि उनले आफ्नो रिहाइका लागि प्रयास गरेका थिए। तर, पार्टीहरूबाट आवश्यक पहल हुन नसकेपछि उनले श्रीमती रन्जिता श्रेष्ठको नेतृत्वमा नागरिक उन्मुक्ति पार्टी गत माघमा गठन गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
