धनगढी– स्थानीय निर्वाचनको मिति नजिकिँएसँगै देशभर चुनावी माहोल उत्कर्षमा पुग्दैछ। मतदातालाई आफूतर्फ आकर्षित गर्न राजनीतिक दल तथा उम्मेदवारहरू जनताको घरदैलोमा पुग्नेदेखि, चुनावी सभा, र्याली, भेटघाटलगायत काममा व्यस्त छन्। दल तथा उम्मेदवारहरू आआफ्ना चुनावी प्रतिबद्धतापत्रसहित जनतामाझ पुगिरहेका छन्।
कैलालीको गोदावरी नगरपालिकामा पनि चुनावी माहोल तातेको छ। गोदावरी नगरपालिकामा सत्ता गठबन्धन र नेकपा एमालेबीच कडा प्रतिस्पर्धा देखिएको छ। स्वतन्त्र उम्मेदवार पनि दुबै दलका लागि चुनौती बनेका छन्।
गोदावरीमा सत्ता गठबन्धनबाट नेपाली कांग्रेसका नेता वीरेन्द्र भट्ट र नेकपा एमालेबाट गोकर्ण भट्ट उम्मेदवार बनेका छन्। स्वतन्त्रबाट टेक विक उम्मेदवार रहेका छन्।
सत्ता गठबन्धनका नेता भट्ट २०७४ सालको स्थानीय निर्वाचनमा नेकपा एमालेका उम्मेदवार हरिसिंह साउदसँग पराजित भएका थिए। २०७४ को निर्वाचनमा पराजित भए पनि यसपटक भने आफू विजयी हुनेमा ढुक्क छन््। उनले प्रत्येक वडालाई कृषिसँग जोडेर किसानलाई आत्मनिर्भर बनाउने बताए।
गोदावरी भ्रष्टाचारमा लुप्त नगरपालिकाका रुपमा चिनिएको बताउँदै उनले भ्रष्टाचार रोक्न भ्रष्टाचारमुक्त नगरपालिका, क्लिन नगरपालिका, ग्रीन नगरपालिका बनाउने मुख्य काम रहेको बताए।
नेकपा एमालेका उम्मेदवार गोकर्ण भट्टले गठबन्धनका कारण आफूलाई सहज भएको दाबी गरे। ‘जनता गठबन्धनको विरुद्धमा छन्। जनता परमादेशको सरकारले जुन व्यवहार गरेको छ । जुन कार्यशैली छ। त्यसप्रति एकदमै असन्तुष्ट छन्,’ उनले भने, ‘त्यसकारणले हामीलाई निर्वाचन जित्न एकदमै सहज छ।’
अहिले प्रचारप्रसारमा हाम्रा टोल, वडा कमिटी तथा जनवर्गीय संगठनका प्रतिनिधि, पार्टीका सदस्य सबै परिचालित भएको उनले बताए। अहिले जनताको बीचमा जा“दा आधारभूत रुपमा शिक्षाका कुराहरू माग भइरहेको उनले बताए।
गोदावरीलाई आधुनिकीकरण गर्न, सहरलाई व्यवस्थित बनाउने, सम्भव भएका ठाउ“मा सीसी क्यामराको जडान गर्ने, धार्मिक पर्यटकिय क्षेत्र गोदावरी, नायल ताललगायतको विकासका लागि विशेष पहल गर्ने र शिक्षा स्वास्थ्य, रोजगारका सवालमा रोजगारमूलक शिक्षाको व्यवस्था गर्ने तथा अहिले रहेका स्वास्थ्य केन्द्रलाई आधुनिकीकरण गर्नेलगायत अजेण्डा बोकेर अघि बढेको उनले बताए।
गोदावरी नगरपालिकामा दलित वस्ती धेरै छन्। स्वतन्त्र उम्मेदवार विक त्यसलाई आधार मानेर आफू बलियो रहेको बताउ“छन्। उनले विगतदेखि नै पार्टीहरूले उम्मेदवारी नदिएपछि अहिले स्वतन्त्र भएर उम्मेदवारी दर्ता गराएको बताए। २०७४ सालको निर्वाचनमा पनि नेकपा एमालेबाट उनी नगर प्रमुखको आंकाक्षी थिए। तर, सो समयमा पार्टीले हरिसिंह साउदलाई उम्मेदवार बनाएको थियो।
वैशाख ३० गते हुन लागेको निर्वाचनमा पनि विक उम्मेदवारीका आंकाक्षी थिए । तर, गठबन्धनका कारण नगरपालिकाको प्रमुखमा नेपाली कांग्रेसको भागमा परेको थियो। उनले पार्टीभित्रकै गतिविधिका कारण स्वतन्त्र उम्मेदवारी दिएको प्रतिक्रिया दिए। पार्टीभित्र र नगरपालिकाभित्रका जनतासँग राम्रो, सरल र सहज भएका कारण जनताले आफुलाई विश्वास गर्ने प्रतिक्रिया उनले दिए।
२०७४ को मतपरिणाम
२०७४ सालको स्थानीय तहको निर्वाचनमा गोदावरीमा ४१ हजार आठ सय २९ मतदाता थिए। चुनावमा भने २९ हजार सात सय ५३ मत खसेकोमा सात सय ७३ बदर भएको थियो। सो निर्वाचनमा नेकपा एमालेका उम्मेदवार विजयी भएका थिए।
२०७४ सालको निर्वाचनमा नेकपा एमालेका उम्मेदवार हरिसिंह साउदले नौ हजार आठ सय ७० मत प्राप्त गरि निर्वाचित भएका थिए भने उनका प्रतिद्वन्द्वी नेपाली कांग्रेसका उम्मेदवार वीरेन्द्र भट्टले आठ हजार चार सय ९७ मत पाएका थिए।
नेकपा माओवादी केन्द्रबाट उम्मेदवार रहेका गोकर्ण भट्टले छ हजार चार सय ८१ मत पाएका थिए भने राप्रपाका उम्मेदवार चन्द्रबहादुर सिंहले ७ सय ३२ र राष्ट्रिय जनमोर्चा शेरबहादुर लुहारले ५ सय २३ मत प्राप्त गरेका थिए।
गोदावरी नगरपालिकामा ५५ हजार बढी मतदाता पुगेका छन् । २०७४ सालको निर्वाचनमा गोदावरीमा ४१ हजार आठ सय २९ मतदाता थिए। सो नगरपालिकामा २४ वटा मतदान स्थल र ६७ वटा मतदान केन्द्र तोकिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
