काठमाडौं– स्थानीय तह निर्वाचनका लागि सत्ता गठबन्धनले गर्ने भनिएको चुनावी सभाहरु स्थगित भएको छ। कांग्रेस नेता रामचन्द्र पौडेल नेतृत्वको गठबन्धन दलको निर्वाचन अनुगमन संयन्त्रको वैशाख ८ गते बसेको बैठकले देशका प्रमुख ७ शहरमा संयुक्त चुनावी सभा गर्ने निर्णय गरेको थियो।
केन्द्रबाट अपेक्षा गरेजस्तो जिल्ला र स्थानीय तहमा गठबन्धन हुन नसकेका कारण निर्णय कार्यान्वयनमा समस्या परेको नेपाली कांग्रेसका एक नेताले बताए।
वैशाख १८ गतेदेखि सुरु हुने भनिएको गठबन्धनका दलहरुको संयुक्त सभा गर्ने निर्णय कार्यान्वयन नहुने देखिएपछि कांग्रेसले चुनावी सभाको छुट्टै सेड्युल तयार गरेको छ।
कांग्रेस नेता पौडेल नेतृत्वको संयन्त्रको बैठकले वैशाख १८ गतेदेखि २२ गतेसम्म देशका प्रमुख शहरमा चुनावी सभा गर्ने निर्णय गरेको थियो। वैशाख १८ गते धनगढी र सुर्खेत, वैशाख १९ गते बुटवल र पोखरा, वैशाख २० गते विराटनगर र जनकपुर तथा वैशाख २२ गते काठमाडौंमा संयुक्त सभा गर्ने निर्णय गरिएको थियो।
तर, संयन्त्रको बैठकले गरेको निर्णय कार्यान्वयन नहुने देखिएपछि कांग्रेसले चुनावी सभाको छुट्टै सेड्युल बनाएको हो। कांग्रेसले अब वैशाख २१ गतेदेखि २७ गतेसम्म देशका विभिन्न शहरमा चुनावी सभा गर्ने जनाएको छ।
कांग्रेसका मुख्य सचिव कृष्णप्रसाद पौडेलले वैशाख २१ गते मोरङमा चुनावी सभा हुने जनाएका छन्। यस्तै, वैशाख २२ गते धनुषा, २३ गते काठमाडौं, २४ गते कास्की, २५ गते रुपन्देही, २६ गते सुर्खेत र २७ गते कैलालीमा आमसभा गर्ने आयोजना गर्ने गरी सेड्युल तयार गरिएको पौडेलले जानकारी दिए।
पौडेलका अनुसार सबै सभाहरुको संयोजन पार्टीको सम्बन्धित जिल्ला कार्यसमितिहरुले गर्नेछन्।
अन्य शहरमा संयुक्त चुनावी सभा नहुने देखिए पनि काठमाडौंमा भने गठबन्धन दलका शीर्ष नेताले सम्बोधन गर्ने गरी सभाको तयारी भइरहेको कांग्रेसका नेताको भनाइ छ।
'हाम्रो पार्टीले वैशाख २३ गते काठमाडौंमा सभा गर्ने तय गरेको छ। त्यसै सभालाई संयुक्त सभा बनाउँ भन्ने हाम्रो प्रस्ताव छ,' कांग्रेसका एक नेताले भने, 'पार्टी (कांग्रेस)को काठमाडौं जिल्ला समितिले गठबन्धन दलका अरु नेताहरुले पनि सम्बोधन गर्नेगरी पनि सभा आयोजना गर्न सकिने जनाएको छ। अहिले यसैमा छलफल चलिरहेको छ।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
