काठमाडौं– पेरिस सेन्ट जर्मेन (पीएसजी) ले फ्रेन्च लिग वान फुटबलको उपाधिको लागि अर्को खेल कुर्नुपर्ने भएको छ।
दोस्रो स्थानको मार्सेलीले नान्टेसलाई ३–२ गोल अन्तरले हराएपछि पीएसजीले उपाधिका लागि कुर्नु पर्ने भएको हो।
मार्सेलीको जितमा दमित्री पयेतले दुई तथा अमाइन हरितले एक गोल गरे। यता, नेास्टेसको लागि आन्द्रे जिरोट र मार्सल कोकोले एक/एक गोल गरे। १० खेलाडीमा सिमित नान्टेसले खेलको २५औं मिनेटमा जिरोटको गोलमार्फत् अग्रता लिएको थियो।
तर, मार्सेली ३८औं मसिनेटमा दमित्रीको पेनाल्टीमार्फत् खेलमा फर्कियो। त्यसको २ मिनेटपछि नै कोकोले गोल गर्दै नान्टेसलाई २–१ को अग्रता दिलाए। तर, खेलको ५४औं मिनेटमा दिमित्रीले पेनाल्टीमार्फत् गोल गर्दै खेल २–२ को बराबरीमा ल्याए।
खेलको ७४औं मिनेटमा हरितले गोल गर्दै खेल ३–२ को स्थितिमा ल्याए। दोस्रो हाफको इन्ज्युरी समयमा कोकोले रातो कार्ड पाउँदा नान्टेस १० खेलाडीमा समेटिएको थियो।
जितसँगै मार्सेली ३३ खेलबाट ६२ अंक जोडेर दोस्रो स्थानमा उक्लिएको छ। पराजित नान्टेस समान खेलबाट ४७ अंक जोड्दै १०औं स्थानमा रहेको छ।
बुधबार राति नै सम्पन्न अर्को खेलमा पीएसजीले एन्जर्सलाई ३–० गोल अन्तरले हरायो। पीएसजीलाई जित दिलाउन केलियन एमबाप्पे, सर्जियो रामोस र मार्क्विन्होसले एक एक गोल गरे।
खेलको २८औं मिनेटमा एमबाप्पेले गोल गर्दै पीएसजीलाई सुरुआती अग्रता दिलाएका थिए। पहिलो हाफको इन्जुरी समयमा रामोसले गोल गर्दै टोलीको अग्रता २–० मा पुर्याए।
त्यसपछि ७७औं मिनेटमा मार्क्विन्होसले गोल गर्दै पीएसजीलाई ३-० को सहज जित दिलाए। यस्तै, खेलको इन्जुरी समयमा इडुवार्डोले रातो कार्ड पाएपछि पीएसजी १० खेलाडीमा समेटिएको थियो।
जितसँगै शीर्ष स्थानमा रहेको पीएसजीले ३३ खेलमा ७७ अंक जोडेको छ। यता, एन्जर्स समान खेलबाट १४औं स्थानमा रहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
