धनगढी-विभागीय टोली नेपाल शसस्त्र प्रहरी बलको एपीएफ क्लब कैलालीको धनगढीमा जारी प्रथम राष्ट्रिय मुख्यमन्त्री भीवाइसी महिला गोल्डकप फुटबल प्रतियोगिताको उपाधिनजिक पुगेकाे छ।
बुधबार पाँचौ दिन धनगढी रंगशालामा भएको पहिलो सेमिफाइनल खेलमा अर्को विभागीय टोली नेपाल आर्मी क्बलाई हराउँदै एपिएफ उपाधिनजिक पुगेको हो।
एपीएफ आर्मीलाई ३–२ ले हराउँदै फाइनलको यात्रा तय गर्न सफल रह्यो। एपीएफलाई उपाधि नजिक पुर्याउन सरु लिम्बुले उत्कृष्ट प्रदर्शन गर्दै दुई गोल गरिन्। यस्तै सावित्रा भण्डारीले एक गोल गरिन्। आर्मीका लागि सपना लामा र हेमा चौधरीले एक-एक गोल फर्काए।
एपीएफका लागि सरुले पहिलो हाफको २३ औं मिनेटमा पहिलो गोल गर्दै आफ्नो टोलीलाई अग्रता दिलाइन्। त्यसको ११ मिनेटपछि खेलको ३४ औं मिनेटमा सरुले नै व्यक्तिगत दोस्रो गोल गर्दै अग्रता दोब्बर बनाइन्। पहिलो हाफमा २–० ले अगाडि रहेको एपीएफले दोस्रो हाफमा गोल थप्यो। खेलको ७१ औं मिनेटमा सावित्राले गोल गर्दै अग्रता तेब्बर बनाइन्। खेलको ८७ औं मिनेटमा आर्मीका लागि सपना लामाले गोल गर्दै अग्रता घटाइन्। अतिरिक्त समयको ९२ औं मिनेटमा आर्मीका लागि हेमा चौधरीले अर्को गोल गर्दै गोल अन्तरलाई एकमा झारिन्। त्यसपछि गोल हुन नसकेपछि एपीएफ ३–२ को जित निकाल्दै फाइनलमा पुग्यो।
खेलमा उत्कृष्ट प्रदर्शन गर्दै दुई गोल गरेकी एपीएफकी सरु लिम्बु प्लेयर अफ द म्याच भईन्। उनले नगद ५ हजारसहित ट्रफी पाईन्। वनदेवी युवा क्लबको आयोजनामा भईरहेको प्रतियोगिताअन्तर्गत बिहीबार दोस्रो सेमिफाइनल खेल हुनेछ। बिहीबार हुने दोस्रो सेमिफाइनलमा आयोजक वनदेवी युवा क्लब र नेपाल पुलिस क्लब खेल्नेछन्।
बैशाख १० गतेसम्म सञ्चालन हुने गोल्डकपमा ३ विभागीयसहित ८ टिमको सहभागिता छ। गोल्डकपको विजयी टिमले ट्रफीसहित नगद ५ लाख र उपविजेताले ट्रफीसहित २ लाख ५० हजार रुपैयाँ पुरस्कार राशि प्राप्त गर्नेछन्।
प्रतियोगितामा वुमन अफ दी म्याचलाई ५ हजार, त्यस्तै विभिन्न विधाका उत्कृष्ट खेलाडीलाई १० हजार र प्रतियोगिताभरि उत्कृष्ट हुने खेलाडीले नगद ५० हजार रुपैयाँ प्राप्त गर्ने आयोजक क्लबका अध्यक्ष सुसन जोशीले बताए। धनगढीमा दिउँसो अत्यधिक गर्मी हुने भएकोले पहिलो पटक रात्रिकालीन प्रतियोगिता आयोजना गरिएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1773643707.png)
