काठमाडाैं-अखिल नेपाल फुटबल संघ (एन्फा)ले सहिद स्मारक ‘सी’ डिभिजन लिगमा सहभागी क्लबले तयारी खर्चस्वरूप पाउने पहिलो किस्ताको रकम एक साताभित्र उपलब्ध गराउने भएको छ।
बुधबार एन्फाका अध्यक्ष कर्माछिरिङ शेर्पाको संयोजकत्वमा बसेको बैठकले वैशाख ९ देखि सुरू हुने लिगमा सहभागी हुने १४ क्लबलाई तयारी खर्चस्वरुप पहिलो किस्तामा ५ लाख रूपैयाँ एक साताभित्र उपलब्ध गराउने निर्णय गरेको हो।
बैठकमा लिग कमिटीका निर्देशक सन्जिव मिश्रसहित ‘सी’ डिभिजन क्लबका प्रतिनिधिको उपस्थिति थियो। ‘वार्तामा एन्फाले उपलब्ध गराउनु पर्ने तयारी खर्चको पहिलो किस्ता एक हप्ताभित्र दिने सहमति भएको छ। तोकिएको समयमा पहिलो किस्ता नपाए लिग खेल्ने छैनौं,’ बैठकमा सहभागी एक क्लबका प्रतिनिधिले नेपाल लाइभसँग भने।
प्रतियोगिता नियमावलीअनुसार एन्फाले तयारीस्वरूप ‘सी’ डिभिजन क्लबलाई ९ लाख ५० हजार रूपैयाँ दिनुपर्छ। पहिलो किस्ता लिग सुरु हुनुअघि ५ लाख दिने गरिन्छ।
यस्तै, दोस्रो किस्ता लिग चलिरहँदा २ लाख ५० हजार र तेस्रो किस्ता लिग सकिएपछि २ लाख रूपैयाँ एन्फाले क्लबलाई उपलब्ध गराउनु पर्ने व्यवस्था छ। तर, एन्फाले पहिलो किस्ता उपलब्ध नगराएपछि क्लबहरूले संयुक्तरूपमा चैत २८ गते ज्ञापन पत्र बुझाएका थिए।
सोही दिन ३ बजे भएको व्यवस्थापकको बैठकमा क्लबहरूले त्यही अडानलाई दोहाेर्याएपछि एन्फा लिग सार्न बाध्य बनेको थियो। जसका कारण लिग झन्डै दुई साता धकेलिएको थियो।
यद्यपि, एन्फा सचिवालयले प्राविधिक कारणले लिग सार्नुपरेको बताएको छ। एन्फाले गत महिना सकिएको ‘बी’ डिभिजन लिगका १४ क्लबलाई समेत अहिलेसम्म सबै तयारी खर्च उपलब्ध गराएको छैन। ‘बी’ डिभिजन क्लबले तयारी खर्च १२ लाख ५० हजार रूपैयाँ पाउने गर्छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
