काठमाडौं– काठमाडौं महानगरपालिकाले आगामी दिनमा कुहिने र नकुहिने फोहरको संकलन तथा व्यवस्थापन छुट्टाछुट्टै गर्ने भएको छ। त्यसका लागि महानगरले फोहर व्यवस्थापकलाई कुहिने र नकुहिने फोहरलाई छुट्टाछुट्टै वर्गीकरण गर्न आग्रहसमेत गरेको छ।
सहज र वैज्ञानिक रूपमा फोहर व्यवस्थापन गर्नका लागि महानगरले कुहिने र नकुहिने फोहर छुट्टाछुट्टै सङ्कलन गर्ने निर्णय गरेको काठमाडौँ महानगरपालिकाका प्रवक्ता ईश्वरमान डङ्गोलले बताए। महानगरले अब हप्ताको तीन दिन कुहिने र हप्ताको एक दिन नकुहिने फोहर संकलन गर्ने निर्णय गरेको उनको भनाइ छ।
यो निर्णय लागू भएसँगै घरवालाले नै फोहर संकलन गर्ने सवारीसाधनसम्म कुहिने र नकुहिने फोहर छुट्टाछुट्टै ल्याउनुपर्ने उनले बताए। कुहिने र नकुहिने फोहर छुट्टाछुट्टै सङ्कलन गर्दा सोको व्यवस्थापनमा समेत सहज हुने बताउँदै उनले छुट्याइएको फोहर लिने गाडी पनि फरकफरक दिन आउने भएकाले व्यवस्थापन गर्न थप सहज हुने विश्वास व्यक्त गरे।
महानगरको निर्णय नमानेको अवस्थामा फोहरमैला व्यवस्थापन ऐन २०६८ अनुसार दण्डजरिवानासमेत गर्ने महानगरले जनाएको छ।
कुहिने र नकुहिने वर्गीकरण नगरी ल्याए सम्बन्धित व्यक्तिको घरमा फर्काइने बताउँदै उनले यसरी ल्याउने व्यक्तिलाई कारबाहीस्वरूप पाँच सय रुपैयाँ जरिवानासमेत गरिने बताए।
काठमाडौँ उपत्यकाबाट दैनिक एक हजार ४५ मेट्रिक टन फोहर उत्पादन हुने गर्दछ। उपत्यकाका १८ वटा नगरपालिकामध्ये भक्तपुर नगर क्षेत्रबाहेक अन्य सबै नगर क्षेत्रमा उत्पादन भएको फोहर सिसडोल ल्यान्डफिल साइटमा पु¥याउने गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
