काठमाडौं– विश्वव्यापी रुपमै दक्षिण भारतीय फिल्म क्षेत्र विस्तार भइरहेको छ। कुनै बेला नेपालमा बलिउडका फिल्मले पारेकोभन्दा ठूलो प्रभाव अहिले दक्षिण भारतीय फिल्म क्षेत्रले पारिरहेका छन्।
गत पुसमा प्रर्दशनमा आएको ‘पुष्पाः द राइज’हुँदै ‘आरआरआर’देखि बिहीबार प्रदर्शनमा आएको ‘केजिएफ २’लाई हेर्दा दक्षिण भारतीय फिल्मप्रति नेपालमा बढिरहेको क्रेज देख्न सकिन्छ।
विश्वबजारमा सैयौं करोडको आम्दानी गर्ने यी दक्षिण भारतीय फिल्ममा अभिनय गर्ने अभिनेताहरुको पारिश्रमिक पनि कम छैन।
दक्षिण भारतीय फिल्ममा प्रायः देखिने र चर्चित रहेका अभिनेताहरुमध्ये केहीको पारिश्रमिक सय करोडसम्म छ। उनीहरुमध्ये केहीले एउटै फिल्ममा काम गरेवापत सय करोड पारिश्रमिकसम्म लिने गरेका छन्।
कसले कति लिन्छन्?
दक्षिण भारतीय फिल्म क्षेत्रमा सबैभन्दा धेरै पारिश्रमिक लिने अभिनेताहरुमा थुप्रैको नाम आउँछ। तर, सबैभन्दा धेरै पारिश्रमिक लिनेहरुमा भने अभिनेता रजनीकान्त र प्रभास छन्।
रजनीकान्त दक्षिण भारतीय सिनेमाका एउटा युग हुन्। उनीप्रति दर्शकमा भएकौ श्रद्धाको भावना उनका फिल्म प्रदर्शन हुँदाको समयमा देखिन्छ। उमेरले बृद्ध हुँदै गए पनि रजनीकान्त फिल्ममा अझैं अभिनय गरिरहेका हुन्छन्।
भारतीय सञ्चारमाध्यममा आएका रिपोर्टकाअनुसार रजनीकान्तले एउटा फिल्म गरेवापत ९० देखि १०० करोड भारतीय रुपैयाँसम्म पारिश्रमिक लिने गरेका छन्। दर्शकमा रजनीकान्तप्रति भएको क्रेजका कारण निर्माताले पनि उनलाई यो रकम सहजै दिने गरेका छन्।
अर्का अनिनेता प्रभास पनि रजनीकान्त जत्तिकै धेरै पारिश्रमिक पाउने कलाकार हुन्। एसएस राजमौली निर्देशित फिल्म ‘बाहुबली’मा गरेको अभिनय पछि प्रभासको पारिश्रमिक पनि ह्वात्तै बढेको छ। हाल उनले एक फिल्म खेलेवापत सय करोडसम्म पारिश्रमिक लिने गरेका छन्।
केजिएफका लागि यशको पारिश्रमिक २५देखि ३० करोड
बिहीबारबाट सिनेमा हलमा प्रदर्शनमा आएको फिल्म ‘केजिएफ २’ले अहिले विश्वभर नै चर्चा कमाइरहेको छ।
फिल्मले पहिलो दिनको प्रदर्शनबाटै विश्वव्यापी रुपमा १४० करोड भारतीय रुपैयाँ आम्दानी गरेको छ।
त्यसो भए फिल्मका मुख्य अभिनेता रकि भाइ अर्थात् यशले अभिनयका लागि कति पारिश्रमिक पाए त?
सञ्चारमाध्यममा आएका रिपोर्टकाअनुसार १२० करोड भारतीय रुपैयाँको लगानीमा बनेको फिल्मका लागि यशले २५ देखि ३० करोड भारतीय रुपैयाँ पारिश्रमिक लिएका छन्।
यशको २०१८ मा प्रदर्शनमा आएको फिल्म ‘केजिएफ’ प्रदर्शनमा आउनुअघि कन्नड फिल्महरुमा मात्रै चर्चा थियो। तर, केजिएफ प्रर्दशनमा आएसँगै यशको चर्चा र फिल्ममा उनको माग पनि उत्तिकै बढेको छ।
‘केजिएफ २’को चर्चासँगै यशको पारिश्रमिकमा पनि अब बृद्धि हुने बताइएको छ।
‘विष्ट’का लागि विजयको पारिश्रमिक ७० करोड
बाल्यकालबाटै फिल्म क्षेत्रमा अभिनय सुरु गरेका विजय पछिल्लो समयका निकै चर्चित दक्षिण भारतीय अभिनेता हुन्।
१९९० को दशकमा उनी अभिनित फिल्म ‘पोभे उनाक्कगा’ हिट भएसँगै उनको पारिश्रमिकमा पनि बृद्धि भएको थियो।
उक्त फिल्मले सिनेमा हलमा सिक्भर जुब्ली मनाएको थियो। बुधबारबाट प्रदर्शनमा आएको दक्षिण भारतीय फिल्म ‘विष्ट’का अभिनेता विजय पनि धेरै पारिश्रमिक लिने कलाकारहरुमध्ये एक हुन्।
उनले पछिल्लो पटक आएको फिल्म ‘विष्ट’का लागि मात्रै ७० करोड भारतीय रुपैयाँ पारिश्रमिकको रुपमा लिएका छन्।
समाचारमाध्यमका अनुसार ‘विष्ट’ कुल १५० करोड भारतीय रुपैयाँको लगानीमा निर्माण भएको छ। फिल्मले दोस्रो दिनसम्मको प्रदर्शनमार्फत १३० करोड भारतीय रुपैयाँ पनि कमाइसकेको छ।
‘आरआरआर’का लागि राम चरण र जुनियर एनटिआरले लिए ४५ करोड
एसएस राजमौलीको पछिल्लो फिल्म ‘आरआरआर’ सिनेमा हलमा निकै हिट रह्यो। फिल्मले दुई साताको प्रदर्शनबीच १२ सय करोड भारतीय रुपैयाँभन्दा धेरैको आम्दानी गरेको थियो।
उक्त फिल्ममा दक्षिण भारतीय दुई अभिनेता रामचरण र जुनियर एनटिआरको मुख्य भूमिका छ। दुवै कलाकारले फिल्मका लागि ४५ करोड भारतीय रुपैयाँ पारिश्रमिक लिएको सञ्चारमाध्यमले जनाएका छन्।
अल्लु अर्जुनदेखि अजितकुमार लिन्छन् यति पारिश्रमिक
दक्षिण भारतमा अन्य अभिनेताहरु पनि छन् जो दर्शकमाझमा निकै चर्चित छन्। यी कलाकारको पनि पारिश्रमिक निकै धेरै रहेको छ।
अभिनेता पवन कल्याणले एउटा फिल्ममा अभिनय गरेवापत अहिले ६० देखि ६५ करोड पारिश्रमिक लिने गरेका छन्। त्यस्तै, अभिनेता महेश बाबु ५५ करोड, अल्लु अर्जुन ५० करोड र चिरञ्जिवीले २५ करोड पारिश्रमिक लिने गरेका छन्।
पछिल्लो समयमा चर्चामा आएका अभिनेता अजित कुमारले भने एउटा फिल्मका लागि २५ करोडसम्म पारिश्रमिक लिने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1753263770.jpg)
-1764146706.png)
