काठमाडौं- नेपाली कांग्रेसका नेता शेखर कोइरालाले अर्थतन्त्र ओरालो लागेका बेला गभर्नर निलम्बन गर्नु सरकारको गैरजिम्मेवारपन रहेको बताएका छन्। राजधानीमा आयोजित एक कार्यक्रममा बोल्दै उनले यसले झन् अप्ठ्यारोमा पार्ने बताएका छन्।
उनले भने, 'अर्थतन्त्र ओरालो लागेका बेला राष्ट्र बैंकको गभर्नर निलम्बन गरिएको छ। यो सरासर गैरजिम्मेवारपन हो। त्यसले झन् अप्ठ्यारो पार्छ।'
उनले राष्ट्र बैंकको गभर्नर निलम्बन गर्ने कुरालाई अन्तराष्ट्रिय संस्थाहरुले हेरिरहेको बताउँदै देश नै अप्ठ्यारोमा पर्ने बताए। थपे, 'विश्व बैंकले हेरिरहेको छ। एशियन बैंकले हेरेको छ। आइएमएसले हेरको छ। आर्थिक संस्थाहरुले हेरेका हुन्छन्।'
जुनसुकै लोकतान्त्रिक मुलुकमा राष्ट्र बैंकको गभर्नर र अर्थमन्त्रीबीच खटपट चल्ने बताउँदै त्यसलाई स्वभाविक रुपमा लिनुपर्ने उनको भनाइ। सरकारले गलत गरेको काम बैंकले रोक्ने उल्लेख गर्दै यो विषयले हानी गर्ने उनको भनाइ थियो।
'४० करोड रुपैयाँ विदेशी रकम नेपालमा आउँछ। त्यसको छानबिन रोकिएको हुन्छ। त्यसको छानबिन गर्ने निकाय राष्ट्र बैंक हो कि होइन? राष्ट्र बैंकले अर्डर गर्छ,' उनले भने, 'विलाशिताको सामान आयात नगर्नुहोस्। त्यो सूचना लिक भयो रे।विलाशिता मात्रै होइन। मरिच, सुपारी, छोहरा, मटरदाना किन चाहियो? त्यसले अरबौं रुपैयाँ बाहिरिन्छ। २ लाख ५० हजार किलो सुपारी किन चाहियो? जवाफ सरकार र अर्थमन्त्रालय दिनुपर्छ।'
गभर्नरका कमीकमजोरी नरहेको दाबी नगरेको बताउँदै उनले अर्थतन्त्र ओरालोमा भएका बेला यो कदम चालिनु गलत रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
