काठमाडौं– पाकिस्तान मुस्लिम लिगका नेता तथा पूर्वप्रधानमन्त्री नवाज शरीफका भाइ शाहबाज शरीफ देशको नयाँ प्रधानमन्त्रीमा निर्वाचित भएका छन्।
पाकिस्तानको संयुक्त विपक्षी दलले शाहबाजलाई प्रधानमन्त्रीका लागि संयुक्त उम्मेदवार बनाएको थियो। सोमबार राष्ट्रिय सभामा भएको मतदानमा शाहबाजले १७४ मत पाए।
यसअघि आइतबार अविश्वासको प्रस्ताव पारित भएपछि इमरान खानले प्रधानमन्त्री पदबाट राजीनामा दिनुपरेको थियो। शाह महमूद कुरैशीलाई उनको पार्टी पाकिस्तान तेहरिक-ए-इन्साफ (पीटीआई)ले उम्मेदवार बनाएको थियो। तर, सोमबार मतदान गर्नुअघि उनले आफ्नो नाम फिर्ता लिएका थिए।
इमरानको पार्टीले मतदानका क्रममा सदनको कार्यवाही बहिष्कार गरेको थियो। कुरैशीले एक मत पनि पाएनन्। शाहबाज पाकिस्तानका पूर्व प्रधानमन्त्री नवाज शरीफका भाइ हुन्। पाकिस्तानमा राजनीतिक रूपमा सबैभन्दा शक्तिशाली मानिने पञ्जाब प्रान्तबाट उनी मुख्यमन्त्री भइसकेका छन्।
भ्रष्टाचारको आरोपमा जेलबाट छुटेपछि उनी स्वदेश फर्किएका छैनन्। उनको लण्डनमा उपचार भइरहेको छ। यद्यपि, अहिले उनी पाकिस्तान फर्किन सक्ने बताइएको छ। नवाजको सरकारलाई हराएपछि मात्रै इमरान पाकिस्तानमा सत्तामा आएका थिए।
शाहबाजले धेरै पटक पाकिस्तानको सत्ता हातमा लिने अवसर पाए। तर, आफ्ना दाजु नवाजसँग हिँड्दा उनले आफ्नो बाटो परिवर्तन गरेनन्। पञ्जाब प्रान्तको मुख्यमन्त्री बन्नेदेखि राष्ट्रिय सभामा विपक्षी दलको नेता बन्नेसम्म शाहबाजको कथा निकै रोचक छ।
शाहबाजको राजनीतिक यात्रा सन् १९८८ मा पञ्जाब विधानसभाको सदस्य निर्वाचित भएपछि सुरु भएको थियो, तर विधानसभा विघटन भएपछि उनले आफ्नो कार्यकाल पूरा गर्न सकेनन्।
त्यसपछि शाहबाज राष्ट्रिय राजनीतिमा प्रवेश गरे। सन् १९९० मा उनी पाकिस्तानको संसदको राष्ट्रिय सभामा निर्वाचित भए। यो त्यो समय थियो, जब नवाज पाकिस्तानको प्रधानमन्त्री बनेका थिए। नवाज प्रधानमन्त्री हुँदा शाहबाज राष्ट्रिय सभामा रहे।
सेनाको बढ्दो दबाबका कारण नवाजले सन् १९९३ मा प्रधानमन्त्रीको कुर्सी छाड्नुपरेको थियो। सोही वर्ष, शाहबाज पञ्जाब विधानसभामा पुगे र १९९६ सम्म विपक्षी नेता बने। १९९७ मा उनी तेस्रो पटक पञ्जाब विधानसभामा निर्वाचित भए, र मुख्यमन्त्री बने।
शाहबाज पञ्जाबको मुख्यमन्त्री बनेको दुई वर्षपछि मात्रै पाकिस्तानमा सैनिक विद्रोह भयो। १२ अक्टोबर १९९९ को साँझ जनरल परवेज मुशर्रफले पाकिस्तानमा निर्वाचित सरकारलाई गिराए। यस्तो अवस्थामा शाहबाजलाई पनि पक्राउ गरिएको थियो।
अप्रिल २००० मा शाहबाज शरीफका दाजु नवाजलाई आजीवन कारावासको सजाय सुनाइएको थियो। उनलाई जनरल मुशर्रफको विमान अपहरण र आतंकवादको आरोपमा सजाय सुनाइएको थियो। करिब आठ महिनापछि पाकिस्तानको सैन्य सरकारले नवाजलाई माफी दियो र उनलाई परिवारका ४० सदस्यसहित साउदी अरब पठाइयो। यी ४० जनामध्ये नवाजका भाइ शाहबाज पनि थिए।
२३ अगस्ट २००७ मा पाकिस्तानको सर्वोच्च अदालतले शाहबाज र नवाज पाकिस्तान फर्केर राष्ट्रिय राजनीतिमा भाग लिन दिन आदेश दियो। नोभेम्बर २००७ मा शाहबाज पनि नवाजसँग पाकिस्तान फर्के। सन् २००८ मा नवाजको पार्टी पाकिस्तान मुस्लिम लिगले राम्रो प्रदर्शन गरे पनि सरकार बनाउन सकेन।
अर्कोतर्फ, २००८ मा शाहबाज चौथो पटक पञ्जाब विधानसभाको सदस्यको रूपमा निर्वाचित भए र अर्को पाँच वर्षको लागि पञ्जाबको मुख्यमन्त्री भए। पाकिस्तानमा सन् २०१३ मा आम निर्वाचन भएको थियो। नवाजको पार्टी पाकिस्तान मुस्लिम लिग पञ्जाबमा भारी जनादेशका साथ सत्तामा आयो, शाहबाज पञ्जाबको मुख्यमन्त्रीमा निर्वाचित भए। अर्कोतर्फ नवाजले प्रधानमन्त्रीको कुर्सी सम्हाले।
तर, २०१८ मा पीटीआई सबैभन्दा ठूलो पार्टी बन्यो र इमरान खान पाकिस्तानको प्रधानमन्त्री बने। चुनाव हारेपछि शाहबाज विपक्षी दलको नेतामा निर्वाचित भए। २०२० मा शाहबाज मनी लान्ड्रिङको मुद्दामा पक्राउ परे। लाहोरको कोट लखपत सेन्ट्रल जेलमा झण्डै सात महिना बिताएपछि उनी रिहा भए।
गत २४ मेमा शाहबाजले विपक्षी दलका नेताहरूलाई रात्रिभोजको लागि बोलाए। यो रात्रिभोज इस्लामाबादमा आयोजना गरिएको थियो। रात्रिभोजमा शाहबाजले पाकिस्तानमा सत्तामा रहेको इमरानलाई हटाउन एकजुट हुन अपील गरे।
यसपछि विपक्षीहरूले इमरानको सरकारलाई विभिन्न मोर्चामा घेराबन्दी गर्न जारी राखे। एकपछि अर्को गर्दै धेरै सहयोगीहरूले इमरान सरकारलाई दिएको समर्थन फिर्ता लिए र सरकार अल्पमतमा परिणत भयो।
इमरानले अमेरिकाको इशारामा आफूलाई षडयन्त्रमार्फत् सत्ताबाट हटाएको दाबी गरेका छन्। आइतबार राष्ट्रिय सभामा अविश्वासको प्रस्ताव पारित भएपछि उनलाई सत्ताबाट हटाइएको थियो। सोमबार राष्ट्रिय सभाको अधिवेशन सुरु हुनेबित्तिकै इमरानको पार्टीका सदस्यहरूले सामूहिक राजीनामाको घोषणा गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
