एन्फा निर्वाचन : ‘बी’ र ‘सी’को प्रतिनिधि छनोटमा विवाद, नेम्वाङ समूहका लामाले गरे मुख्यालयमै तोडफोड

फुटबल

नेपाल लाइभ शुक्रबार, चैत २५, २०७८ ०६:२९

काठमाडौं- आसन्न अखिल नेपाल फुटबल संघ (एन्फा) निर्वाचनमा अध्यक्षका आकांक्षी तथा वरिष्ठ उपाध्यक्ष पंकजविक्रम नेम्वाङ समूहले सातदोबाटोस्थित मुख्यालयमा तोडफोड गरेका छन्।

एन्फा मुख्यालयमा बिहीबारका लागि निर्धारित ‘बी’ र ‘सी’ डिभिजन क्लबको निर्वाचन प्रतिनिधि छनोट प्रक्रिया स्थगन गरिएपछि नेम्वाङ समूहले निर्वाचन समितिको कक्षमा तोडफोड गरेका हुन्।

तोडफोडबाट कार्यालयमा रहेको कम्प्युटर, प्रिन्टरलगायतका समाग्रीमा क्षति पुगेको छ। एन्फाको निर्वाचन तालिकाअनुसार मुख्यालयमा बिहीबार दुवै लिगका क्लबहरू उपस्थित हुँदाहुँदै अध्यक्ष कर्माछिरिङ शेर्पा नेतृत्वले आफू अनुकुल वातावरण नदेखिएकाले स्थगित गरेको भन्दै नेम्वाङ समूहका केन्द्रीय सदस्य दावा लामाले तोडफोड गरेका हुन्।

एन्फा विधान र निर्वाचन निर्देशिका अनुसार वर्तमान कार्यसमितिका पदाधिकारी र तलबी कर्मचारी आफ्नो संघको निर्वाचनमा प्रतिनिधिका रुपमा सहभागि हुन नपाउने व्यवस्था गरिएको छ।

तर, ‘सी’ डिभिजनको प्लानिङ्ग ब्वाइज युनाइटेड अध्यक्ष लामासहित पुल्चोक स्पोर्टस् क्लबका अध्यक्ष रविन्द्र जोशी र साँघा स्पोर्टस् एकेडेमीका वरिष्ठ उपाध्यक्ष रुपेश अधिकारीले निर्वाचन प्रतिनिधिको दाबी गरेका थिए।

निर्वाचन निर्देशिका र विधान विपरितको कार्यमा संलग्न भएको जनाउँदै ‘सी’ डिभिजन क्लब ओसीसका अध्यक्ष उत्तम बस्नेतले निर्वाचन समितिसमक्ष लिखित उजुरी दर्ता गरेका थिए। उक्त उजुरीमाथि छानबिन गर्दै निर्वाचन समितिले बिहीबारको निर्वाचन प्रक्रियालाई स्थगित गरेको थियो।

लामा र अधिकारी एन्फा कार्यसमितिका सदस्य हुन् भने जोशी एन्फामा तलबी कोषाध्यक्षको रुपमा कार्यरत छन्। यता, नेम्वाङ समूहका उपाध्यक्ष वीरबहादुर खड्काले अध्यक्ष शेर्पाले सचिवालयसँगको मिलेमतोमा प्रतिनिधि छनोटको प्रक्रिया स्थगित गरेको आरोप लगाएका छन्।

‘मताधिकार प्राप्त गर्न सबै क्लबहरू उपस्थित थिए। तर, अध्यक्षले सचिवालयसँगको मिलेमतोमा प्रतिनिधि छनोटको प्रक्रिया स्थगित गरे,’ उनको आरोप थियो।

यता, एन्फा महासचिव इन्द्रमान तुलाधरले प्रतिनिधि छनोट प्रक्रिया स्थगित भएको आफूलाई जानकारी नभएको दाबी गरे। यसअघि जेठ १५ गते कार्यसमिति चयनको निर्वाचन हुने भनिएको थियो।

तर, फिफा र एएफसीको प्रतिनिधि उक्त मितिमा नेपाल आउन नसक्ने कारण जनाउँदै एन्फाले निर्वाचन सारेको छ। एन्फाको नयाँ कार्यसमितिको लागि असार ६ गते मिति तोकिएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

विश्वको सबैभन्दा वृद्ध व्यक्तिको ११६ वर्षको उमेरमा निधन

एक पटक देशको नेतृत्व गर्ने इच्छा छ: विप्लव

समय नपुगी जन्मिएका बच्चाको आँखामा जोखिम उच्च