काठमाडौं– नाबालिक गायिकालाई बलात्कार गरेको अभियोगमा मुद्दा खेपिरहेका कलाकार पल शाहलाई जिल्ला अदालत नवलपरासीले पनि पुर्पक्षका लागि थुनामा पठाउने आदेश दिएको छ।
यसअघि तनहुँ जिल्ला अदालतले थुनामा राख्न आदेश दिएको थियाे। दुवै जिल्ला अदालतले एकै आदेश दिएपछि मुद्दाको किनारा नलागेसम्म शाह थुनामा रहने भएका छन्।
बुधबार न्यायाधीश अर्जुन अधिकारीको इजलासले शाहलाई तनहुँमै थुनामा राख्न आदेश दिएको हो। नवलपुरमासमेत परेको बलात्कारको उजुरी घटनामा थुनछेक बहसका लागि शाहलाई मंगलबार तहनुँबाट पठाइएको थियो।
शाहविरुद्ध एक नाबालिक गायिकाले तनहुँ र नवलपुरमा बलात्कार उजुरी दर्ता गराएकी थिइन्। तनहुँ अदालतले शाहलाई पुर्पक्षमा थुनामा राख्न आदेश दिइसकेको छ। नवलपरासी घटनाको भने थुनछेक बहसनै भएको थिएन।
थुनमा राख्ने आदेशसँगै तनहुँबाट आएका सुरक्षाकर्मीको टोलीले बुधबार राति ९ बजे शाहलाई फिर्ता लगेको जिल्ला अदालत नवलपरासीले जनाएकाे छ।
पीडित नाबालिक गायिकाको तर्फबाट ३ जना सरकारी वकिल र २ कानुन व्यवसायीले बहस गरेका थिए। शाहका तर्फबाट ९ जना कानुन व्यवसायी बहसमा उत्रेका थिए।
पीडित पक्षका कानुन व्यवसायी र सरकारी वकिलले शाहले बलात्कार गरेको यथेष्ट प्रमाण भएको दाबी गर्दै नाबालिक गायिकाको माग बमोजिम १२ देखि १४ वर्ष कैद सजाय हुनेपर्ने जिकिर गरेका छन्।
शाहले भने तनहुँ जिल्ला अदालतको आदेश बदर माग गर्दै साधारण तारेखमा रिहाको माग गर्दै उच्च अदालत कास्कीमा रिट दायर गरेका छन्। उक्त रिटको सुनुवाइ हुन बाँकी नै छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
