नेकपा माओवादी केन्द्रले सात भौगोलिक र तीन गैरभौगोलिकसहित १० प्रदेशको संचरना बनाएको छ। अरु सबै प्रदेशले कतै सर्वसम्मत कतै चुनावी प्रक्रियाबाट कमिटीलाई पूर्णता दिइसकेका छन्। तर, मधेस प्रदेशले लामो समयदेखि प्रदेश कमिटीलाई टुंगो लगाउन सकेको छैन। प्रदेश कमिटीको पूर्णतामा भइरहेको ढिलाइका विषयमा माओवादीको प्रदेश कमिटी इन्चार्ज गणेश साहसँग नेपाल लाइभले गरेको कुराकानी :
माओवादी केन्द्रका सबै प्रदेश कमिटीले पूर्णता पाउँदा पनि मधेस प्रदेशमा किन ढिलाइ?
मधेस प्रदेश विशेष अवस्थाबाट गुर्जिराखेको छ। लामोदेखि यहाँ प्रदेश समिति रिक्त भयो। अर्को मधेसमा विभिन्न पार्टीसँग विगत र पछिल्लो समय एकता भए। ती सबैलाई प्रदेश सम्मेलनबाट समायोजन गरेर टुंगो लगाउनु पर्ने थियो। तर, परिस्थितिबस त्यो टुंगो लगाउन सकेनौं। आगामी चैत १४ गतेको प्रदेश सम्मेलनबाट पदाधिकारी टुंगाउने प्रयास हुने छ।
मधेस प्रदेशमा नारायणकाजी श्रेष्ठ र मातृका यादवपक्षवीचको गुटको लडाइँले टुंगो लगाउन नसकिएको भनिएको छ नि?
त्यो कारण हुँदै होइन। जिल्लाबाट जुन किसिमले नामहरू आउनुपर्ने थियो। त्यो आउन ढिला भएको हो। त्यसलाई हाम्रै साथीहरुले व्यवस्थित गर्न सकेका छैनन्। हामीले पार्टीलाई समावेशी बनाउन खोजेका थियौं। नयाँ संचरना अन्तर्गतको कलस्टर बनाएका छौं। त्यसलाई समेत समावेश गरेर बनाउँदा खोज्दा अप्ठ्यारा भइरहेको छ।
त्यहाँ मातृका यादव वा नारायणकाजी गुटका कारणले होइन। अहिले सिनियर र नयाँको बीचमा बढी समस्या छ। सिनियर प्रदेश र केन्द्रीय समिति दुवैमा जान खोज्ने भयो। त्यसले गर्दा समस्या सल्टाउन सकेका छैनौं। यही चैत १४ गतेभित्र कमिटीलाई पूर्णता दिन्छौं। प्रदेश कमिटीले पूर्णता पाए लगत्तै स्थानीय चुनावमा केन्द्रित हुनेछौं।
त्यसो भए श्रेष्ठ र यादव गुटका कारण समस्या आएको होइन?
यो गुटबन्दीको समस्या भन्न मिल्दैन। त्यो अलग अलग धारबाट आएर एकता भएकाले मिलाउन समस्या भएको हो। त्यसलाई व्यवस्थित गर्ने हाम्रो जिम्मेवारी पनि हो। व्यवस्थित गर्न सकेका छैनौं।
त्यसो भए चैत १४ गते भित्रै टुंगो लगाउनुहुन्छ?
हामीले चैत १४ गतेभित्र मधेस प्रदेश कमिटीले पूर्णता दिन्छौं। त्यसमा ढुक्क भए हुन्छ। सकभर सर्वसम्मतको प्रयास गरिने छ। यदि भएन भने चुनावी प्रक्रियाबाट भएपनि टुंगो लगाउँछौं।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
