काठमाडौं- संवैधानिक निकायमा गरिएको नियुक्ति खारेजीको माग गर्दै परेका रिटमाथि सर्वोच्च अदालतको संवैधानिक इजलासमा सुनुवाइ भइरहेको छ।
शुक्रबारबाट संवैधानिक इजलासमा केपी शर्मा ओली सरकारका पालमा नियुक्त विभिन्न संवैधानिक अंगका ५२ पदाधिकारी नियुक्तिविरुद्ध परेको रिटमाथिको सुनुवाइ सुरु भएको थियो। उक्त दिन रिट 'हेर्दा हेर्दै'मा राखिएको थियो।
रिट कायममुकायम प्रधानन्यायाधीश दीपकुमार कार्की नेतृत्वको संवैधानिक इजलासमा सुनुवाइका लागि पेसी चढेको हो। इजलासमा कार्कीसहित न्यायाधीशहरू मीरा खड्का, हरिकृष्ण कार्की, विश्वम्भरप्रसाद श्रेष्ठ र ईश्वरप्रसाद खतिवडा रहेका छन्।
बुधबार जारी बहसमा अधिवक्ता दीपकविक्रम मिश्रले इजलासमा न्यायाधीश हरिकृष्ण कार्की बस्न नमिल्ने जिकिर गरेका छन्।
यसअघि प्रतिनिधि सभा विघटनविरुद्धको मुद्दामा कार्की इजलासमा नरहेको बताउँदै मिश्रले यो मुद्दा पनि तत्कालीन प्रधानमन्त्री केपी शर्मा ओलीविरुद्धको रहेकाले मिश्र इजलासमा बस्न नमिल्ने तर्क गरेका हुन्।
प्रतिनिधि सभा विघटनविरुद्ध दायर रिटहरुको सुनुवाइका क्रममा कार्की इजलासबाट बाहिरिएका थिए। केपी शर्मा ओली नेतृत्वमा अघिल्लो पटक गठन भएको सरकारका महान्यायाधिवक्ता रहेका कार्की संवैधानिक इजलासमा बस्दा स्वार्थ बाझिने भन्दै वरिष्ठ अधिवक्ताहरूले प्रश्न गरेसँगै त्यससमय उनी इजलासबाट बाहिरिएका थिए।
संवैधानिक निकायमा नियुक्ति खारेजीको माग गरिएको मुद्दा पनि केपी ओली विरुद्धो मुद्दा भएकाले सुनुवाइमा कार्की बस्न नमिल्ने मिश्रको जिकिर छ।
वरिष्ठ अधिवक्ता दिनेश त्रिपाठी, अधिवक्त ओमप्रकाश अर्याल लगायतले रिट दायर गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752390485.png)
-1749826086.png)
