काठमाडौं– प्रहरी वरिष्ठ उपरीक्षक (एसएसपी) अशोक सिंहलाई कारबाही गर्न सिफारिस गरिएको छ। महानगरीय प्रहरी परिसर काठमाडौंको प्रमुख भएको बेला सिंहले २ करोड २९ लाख रुपैयाँ रकम भरेको चेक नियन्त्रणमा लिएर कारबाही नगरी फिर्ता गरेको घटनामा सिंहमाथि कारबाही गर्न सिफारिस भएको हो।
तीन महिनासम्म उक्त चेक आफ्नो नियन्त्रणमा राखेर कारबाही नै नगरी सम्बन्धित व्यक्तिलाई फिर्ता दिएको घटना बाहिरिएपछि छानबिन गर्न प्रहरी हेडक्वार्टरले डीआईजी राजेशलाल कर्णको संयोजकत्वमा समिति गठन गरेको थियो। समितिमा कर्णसँगै एसपी आभूषण तिम्सिना र डीएसपी सन्तोष तामाङ थिए। तीन महिनासम्म चेक नियन्त्रणमा राख्नु र विनाकारबाही चेक फिर्ता गर्नु प्रहरी आचरण विपरितको काम भएको भन्दै कर्ण संयोजकत्वको टोलीले सिंहलाई विभिागीय कारबाही गर्न सिफारिस गरेको हो।
हराएको ७ थान चेकमा विभिन्न मिति उल्लेख गरी २ करोड २९ लाख रुपैयाँ भरेको र रकम हत्याउन खोजिएको भन्दै सिन्धुलीका राजकुमार बरालले गृह मन्त्रालयमा पुस ९ गते उजुरी दर्ता गराएका थिए।
उजुरीमा उल्लेख भएअनुसार बराल गत असोज २२ गते झापा घर भई काठमाडौं बस्ने सुभास भेटवाललाई भेट्न नयाँ बानेश्वर पुगेका थिए। त्यहाँ भेटवाललगायत ४/५ जना तास खेलेर बसेका थिए। बरालले उनीहरुसँग मदिरा पिउँदै तास खेले। त्यसपछि उनी घर लागे। भोलिपल्ट हेर्दा उनको झोलामा रहेको बैंक अफ काठमाण्डू, कमलादी शाखाको ७ थान चेक थिएन। त्यसपछि चेक हराएको भन्दै बरालले महानगरीय प्रहरी वृत्त नयाँ बानेश्वर र परिसर टेकुमा उजुरीसमेत दिए। बैंकलाई भनेर चेक ब्लक गर्न लगाए।
बरालको निवेदन परेपछि परिसर काठमाडौंले भेटवाललाई टेकु बोलाएको थियो। भेटवालले उक्त ७ थान चेकमा जम्मा २ करोड २९ लाख रुपैयाँ रकम भरेको विषय सार्वजनिक भयो। भेटवालले भने तास खेल्ने क्रममा उक्त चेक बरालले दिएको प्रहरीसमक्ष बताएको उजुरीमा उल्लेख छ। तर, आफूले चेक नदिएको, चेक चोरेर रकम भरी हत्याउने उद्देश्य राखिएको बरालको आरोप छ।
उक्त चेक महानगरीय प्रहरी परिसर काठमाडौंका तत्कालीन एसएसपी अशोक सिंहको आदेशमा असोज २५ गते मुद्दा शाखाका डीएसपी नरेन्द्र चन्दसमक्ष दाखिला गरिएको थियो। चेक नियन्त्रणमा लिने बेला डीएसपी चन्दको संलग्नता रहे पनि कारबाही नै नगरी फिर्ता गर्नक्रममा कुनै संलग्नता नदिएकाले चन्दलाई भने कारबाही गर्नु आवश्यक नरहेको समितिको निष्कर्ष छ।
एसएसपी सिंहको सरुवा भएपछि पीडितको जानकारीबिना नै भेटवाललाई प्रहरीले चेक फिर्ता दिएपछि सो विषय सार्वजनिक भएको हो। भेटवाललाई तिर्नुपर्ने कुनै रकम नै नभएको र खाली चेकमा रकम भरेर पैसा हत्याउन खोजेकोमा त्यसमा प्रहरीसमेतले साथ दिएको भन्दै छानबिनको माग गर्दै बरालले गृहमा उजुरी दिएका हुन् ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
