प्रतीकात्मक तस्बिर
काठमाडौं– मोरङमा १४ वर्षीया बालिकामाथि यौन दुर्व्यवहार गरेको आरोप लागेका शिक्षकलाई पक्राउ गर्न खटिएको प्रहरी टोली र स्थानीयबीच झडप भएको छ। झडपमा एक महिला प्रहरी जवानको मृत्यु भएको प्रहरीले जनाएको छ। झडपका क्रममा घाइते जवानको उपचारका क्रममा मृत्यु भएको प्रहरीको भनाइ छ।
सर्वपक्षीय छलफलमा भिडको आक्रमणमा परी प्रहरी जवान उर्मिला श्रेष्ठको ज्यान गएको हो। उपचारका लागि कोसी अस्पताल लैजाँदै गर्दा उनको बाटोमै ज्यान गएको मोरङ प्रहरीले जनाएको छ।
लेटाङ नगरपालिका– ५ स्थित शिक्षा विकास माविमा पढ्ने बालिकालाई सोही विद्यालयका शिक्षकले यौन दुर्व्यवहार गरेको भन्ने सूचनापछि प्रहरी टोली उक्त स्थानमा पुगेको थियो।
आरोपित शिक्षकलाई पक्राउ गर्न पुगेको प्रहरी टोलीमाथि आक्रोशित भीडले धारिलो हतियार प्रहार गर्दा महिला जवान घाइते भएकी थिइन्। घटनामा अन्य केही प्रहरीसमेत घाइते भएका छन्।
आक्रोशित भिडलाई नियन्त्रणमा लिन प्रहरीले केही सेल अश्रु ग्यास र हवाई फायरसमेत गरेको थियो।
अहिले स्थिति नियन्त्रणमा आएको र लेटाङ आसपासका क्षेत्रमा बिहान ७ बजेदेखि अर्को आदेश नभएसम्मका लागि कर्फ्यु लगाइएको प्रहरीले जनाएको छ। घटनाबारे थप अनुसन्धान भइरहेको प्रहरीको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1766648928.png)
