काठमाडौं– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ र नेता नारायणकाजी श्रेष्ठ पछिल्लो समय अक्सर पार्टी कार्यक्रममा सँगै देखिन्छन्। यसअघि प्रचण्ड र श्रेष्ठबीच तिक्तता बढ्दै गएपछि श्रेष्ठ पार्टी विभाजन गर्ने अवस्थामा पुगेको चर्चा हुने गरेको थियो।
श्रेष्ठको कदमबाट त्रसित बनेका प्रचण्ड हतारहतार उनलाई फकाउन हात्तिवन पुगे। दुई नेताबीचको छलफल र संवादपछि विश्वासको वातावरण बनेको हो। त्यसपछि पछिल्लो समय पार्टीका प्रायः कार्यक्रममा उनीहरु सँगै देखिन थालेका छन्।
प्रचण्ड र श्रेष्ठबीच व्याख्यात्मक रुपमा एमसीसी पारित भएपछि मतभेद सुरु भएको हो। एमसीसी पारित भएपछि गत फागुन १६ गते खुमलटारमा आयोजित पत्रकार सम्मेलनमा प्रचण्डले श्रेष्ठको आलोचना गरे। उनले आलोचना मात्रै गरेनन्। आफ्नै पार्टीका शीर्ष नेतालाई घुमाउरो भाषामा पार्टी छोडेर गएपनि हुन्छ भन्ने आशयको अभिव्यक्ति दिएको भन्दै दुई नेताबीच तिक्तता बढ्यो। प्रचण्डको अभिव्यक्तिलाई लिएर तत्कालीन एकता केन्द्र मसालमा तरंग पैदा भयो। श्रेष्ठ निकट नेताहरुले अपमान सहन नसक्ने भन्दै पार्टी विभाजन गरेर जान सुझावसमेत दिएका थिए।
अन्तमा प्रचण्डकै जोडवलमा दुई नेता तत्काल पार्टी एकतालाई बलियो बनाएर जाने निष्कर्षमा पुगे। श्रेष्ठसँग झस्किएका प्रचण्ड पछिल्लो समय पार्टीका धेरैजसो कार्यक्रममा उनलाई सँगै लिएर जान थालेका छन्। यसअघि प्रचण्ड र श्रेष्ठ कमैमात्र सँगै देखिने गरे पनि पछिल्लो समय त्यो क्रम बढ्दै गएको छ। गत फागुन २९ गते प्रदेश १ को विराटनगरमा आयोजित प्रशिक्षण कार्यक्रममा प्रचण्ड र श्रेष्ठसँगै पुगेका थिए। त्यसयता सुदूरपश्चिम प्रदेशको धनगढी, लुम्बिनी प्रदेशको बुटवल, उपत्यका विशेष प्रदेशको काठमाडौंमा भएको कार्यक्रममा दुबै नेता सँगै थिए।
सिन्धुली पार्टी कार्यालय उद्घाटनमा भने श्रेष्ठ पुगेनन्। उनी आफ्नो निर्वाचन क्षेत्र गोरखा पुगेर फर्किए। आइतबार पोखरामा आयोजित प्रशिक्षण कार्यक्रममा पनि प्रचण्ड र श्रेष्ठ दुवै सहभागी छन्। श्रेष्ठ पार्टीबाट निक्कै टाढा गएको महसुस भएपछि प्रचण्डले प्रायः कार्यक्रममा साथै लाने गरेको नेताहरु बताउँछन्। यसले दुबै नेताबीच विग्रँदै गएको सम्बन्ध सुमधुर हुँदै जाने र बाहिर आफूहरु एक छौं भन्ने सन्देश दिन खोजेको आकलन गरिएको छ।
उता दुवै नेतासँगै हुँदा प्रचण्डको थप आलोचना नहुने श्रेष्ठको बुझाइ छ। अरु यसले पार्टी नेता कार्यकर्तामा समेत सरकारात्मक रक्तसञ्चार हुने विश्वास नेताहरुको छ।
देउवा सरकार गठनदेखि चिसियो सम्बन्ध
प्रचण्ड र श्रेष्ठबीच प्रधानमन्त्री शेरबहादुर देउवा नेतृत्वको सरकार बनेदेखि नै सम्बन्धमा खटपट सुरु भएको थियो। देउवा सरकारमा श्रेष्ठले आफै नेतृत्व गरेर जान खोजेपछि समस्या भएको हो। अन्तमा उनलाई रोकेपछि पार्टीभित्र समस्या सुरु भएको माओवादी केन्द्रका एक नेताले बताए।
‘नारायणकाजी कमरेड सरकारमा जान खोज्नु भयो। प्रचण्डले रोक्न खोज्नुभयो। चुनाव हारेकालाई सरकारमा पठाउँदा राम्रो सन्देश जाँदैन भनेर रोकिएको हो,’ ती नेताले भने, ‘दोस्रो पटक माओवादीबाट मन्त्री हुँदा उहाँले अन्जना विसंख्येलाई पठाउन खोज्नुभयो। अध्यक्षले उहाँकै कोटाकी शशि श्रेष्ठलाई पठाउनुभयो। उहाँको गुटमा अध्यक्षले खेल्नुभयो भन्ने प¥यो त्यसपछि उहाँ चिढिनु भयो।’
पछिल्लो समय एमसीसी र अध्यक्षको अभिव्यक्तिलाई लिएर पार्टी विभाजन गर्ने मनस्थितिमा श्रेष्ठ पुगेका हुन्। श्रेष्ठले आफू निकट नेताहरुलाई छलफलका लागि काठमाडौं बोलाएपछि प्रचण्ड निक्कै झस्किएका थिए। पार्टी विभाजन रोक्न प्रचण्डले निक्कै मेहनत गर्नुप¥यो। दुई नेताबीचको बारम्बारको संवादपछि एउटै पार्टीमा बस्ने वातावरण बनेको हो।
अहिले दुबै नेताबीच सौहार्दपूर्ण संवाद हुँदै जान थालेपछि सम्बन्ध पनि सुधार हुँदै गएको छ। तत्कालिन एकता केन्द्र मसाल र नेकपा माओवादीबीच २०६५ मा पार्टी एकता हुँदा दुई नेताबीच सुमधुर सम्बन्ध थियो। श्रेष्ठ राष्ट्रिय सभामा निर्वाचित भएपछि सत्तामा जाने विषयलाई लिएर दुई नेताबीच सम्बन्धमा चिसोपन आएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1664177809.jpg)
-1764146706.png)
