काठमाडौं– शिक्षकबाट निजामती कर्मचारी हुँदै मन्त्रीसम्म भएका रामकुमार श्रेष्ठको घरजग्गादेखि बैंक मौज्दातसमेत जफत गर्नुपर्ने जिकिर अख्तियार दुरुपयोग अनुसन्धान आयोगले गरेको छ।
शिक्षक सेवामा प्रवेश गरेको मिति २०२६ चैत १८ गतेदेखि २०७२ पुस ८ गतेसम्मको सम्पत्ति विवरणको अनुसन्धान गर्दा श्रेष्ठले अकुत सम्पत्ति कमाएको देखिएपछि उनीविरुद्ध अख्तियारले विशेष अदालतमा मुद्दा समेत दायर गरिसकेको छ।
२०२६ देखि २०३५ सम्म शिक्षक र त्यसपछि निजामती सेवामा प्रवेश गरेका श्रेष्ठ २०६४ माघमा स्थानीय विकास मन्त्रालयको सचिवबाट सेवानिवृत्त भएका थिए। त्यसपछि उनी खिलराज रेग्मी अन्तरिम चुनावी मन्त्रिपरिषद्को अध्यक्ष भएको बेला २०६९ चैत ६ गतेदेखि २०७० माघ २९ गतेसम्म पर्यटन, शान्ति र खेलकुदमन्त्री समेत भएका थिए। उनै श्रेष्ठले ४ करोड ४५ लाख २७ हजार ६६६ रुपैयाँ बराबरको अकुत सम्पत्ति (स्रोत नखुलेको) कमाएको भन्दै उनीविरुद्ध गत फागुन १५ गते विशेष अदालतमा मुद्दा दायर भएको हो।
पूर्वमन्त्री श्रेष्ठसहित उनकी श्रीमती सरस्वती र छोरा सरोजविरुद्ध समेत मुद्दा दायर भएको छ। श्रेष्ठले कमाएको सम्पत्ति उनीहरुको नाममा समेत राखेको पाइएकाले उनीहरुविरुद्ध पनि मुद्दा दायर गरिएको अख्तियारले जनाएको छ।
काठमाडौंका घरजग्गादेखि बैंक मौज्दातसमेत जफत गर्न माग
स्रोत नखुलेको सम्पत्तिबाट घरजग्गा जोड्नुका साथैं बैंक मौज्दातसमेत राखेको भन्दै ती सम्पत्ति जफत गर्नुपर्ने राय अख्तियारले विशेष अदालतमा पेस गरेको छ। अख्तियारले पेस गरेको अभियोग-पत्रमा सरस्वती श्रेष्ठको नाममा काठमाडौं महानगरपालिका–२९ मा रहेको घर जफत गर्नुपर्ने उल्लेख गरिएको छ।
त्यस्तै, सरस्वतीकै नाममा रहेको काठमाडौं–२६ को जग्गा, छोरा सरोजको नाममा रहेको स्वयम्भूको जग्गा, सरस्वतीको नाममा रहेको मनमैजुको जग्गा, रामकुमार, सरस्वती, तारानाथ सुवेदी र कमला सुवेदीसमेतको नाममा रहेको चितवन, कबिलासको जग्गासमेत जफत गर्नुपर्ने राय अख्तियारले पेस गरेको छ।
त्यसैगरी, प्राइम कमर्सियल बैंक लिमिटेडमा सरस्वतीको खातामा मौज्दात रहेको १४ लाख ३४ हजार ९५१, नबिल बैंकमा रामकुमारको खातामा रहेको २ लाख ७९ हजार ७ सय १८ रुपैयाँ, कृषि विकास बैंकमा सरोजको नाममा रहेको १ लाख ४६ हजार ११३ रुपैयाँ, प्रबुद्द बचत तथा श्रण सहकारीमा रामकुमारको नाममा रहेको ५ लाख ९२ हजार ९२३ रुपैयाँ र फर्च्युन बचत तथा ऋण सहकारीमा संस्थामा सरस्वतीको नाममा रहेको ७ लाख ६० हजार ८०३ रुपैयाँ जफत गर्नुपर्ने जिकिर अख्तियारको छ।
यी सम्पत्ति जफत गर्दा पनि उनीहरुविरुद्धको बिगो दाबी नउठ्ने हुँदा बाँकी बिगो ३ करोड ७६ लाख ७६ हजार ७ सय १३ रुपैयाँ अचल सम्पत्तिबाट उठाउनुपर्ने अख्तियारको राय छ।
ग्यासदेखि क्रसरसम्म लगानी
अख्तियारले अकूत सम्पत्ति कमाएको भन्दै मुद्दा दायर गरेका श्रेष्ठ परिवारले ग्यास उद्योगदेखि क्रसरसम्म लगानी गरेको खुलेको छ। छोरा सरोजको नामबाट श्रेष्ठ सिन कन्सर्न प्रालिमा २०४७ सालदेखि नै लगानी गरेको खुलेको छ। सरोजकै नामबाट मनकामना चलचित्र प्रालिमा पनि लगानी गरेको रामकुमारको बयानबाट खुलेको अख्तियारले आरोप-पत्रमा उल्लेख गरेको छ।
श्रीमती सरस्वतीको नामबाट मनकामना क्रसर उद्योगमा २०५६ सालेदेखि लगानी गरेको अख्तियारको दाबी छ। त्यतिबेलै २० लाख रुपैयाँ लगानी भएको अनुसन्धानबाट खुलेको अख्तियारले जनाएको छ। सरस्वतीकै नामबाट पञ्चबुद्ध खनिज उद्योगमा २०६६ सालमा लगानी गरेको अनुसन्धानबाट खुलेको छ। त्यसबेला ५ लाख लगानी गरिएको थियो। उक्त रकम जग्गा खरिदमा लगानी गरेको आरोप-पत्रमा उल्लेख गरिएको छ। दोस्रो पटक पुनः १२ लाख रुपैयाँ उक्त खनिज उद्योगमा लगानी गरेको देखिएको अख्तियारको भनाई छ।
त्यसैगरी, सौजन्य ग्यास उद्योगमा पनि श्रेष्ठ परिवारले लगानी गरेको भेटिएको छ। गोरखकाली रबर उद्योग, अपि हाईड्रो पावर र विभिन्न जलबिद्युत कम्पनीहरुमा समेत श्रेष्ठ परिवारले लगानी गरेको छ।
रामकुमारको बयान– पुरानो भएकाले आय पुष्टि गर्ने प्रमाण छैनन्
२०२६ सालदेखि सरकारी सेवामा प्रवेश गरेकोले २०२६ सालदेखि २०४४ सालसम्मको अवधिको गोरखा आरुघाटको हाम्रो एकासगोलको घर व्यवहारमा भएको खर्च रकमका विषयमा मलाई थाहा छैन। सम्पूर्ण कारोबार र सबै खर्च मेरो बुवा टेकबहादुर श्रेष्ठले पैतृक कृषि आय र दोकान व्यापारबाट हुने आय आर्जनले गोरखा आरुघाटको हाम्रो घर व्यवहारमा हुने घर खर्च, विवाह, ब्रतबन्ध, शैक्षिक खर्च, सामाजिक कार्यहरुसमेतको सम्पूर्ण खर्चहरु पुर्याउने गर्नु भएकोले मेरो कमाई, तलब भत्ता खर्च गर्नु परेन। सबै बचत भयो।
मेरो धादिङ जिल्ला, सल्यानटारस्थित रहेको पैतृक खेतबाट प्रात हुन आएको एकासगोलको कृषि आयलाई अनुमानकै भरमा एकमुष्ट आय उल्लेख गरेको छु। अंशबण्डा हुनु पर्ने एकासगोलको कृषि आयलाई पुष्टि गर्ने कुनै सम्झौता वा आधार प्रमाणहरु केही छैनन्। विभिन्न व्यक्तिहरुलाई अधियामा कमाउन दिएको थियो। धेरै पुरानो भएकोले मसँग सो आय पुष्टि गर्ने कुनै आधार प्रमाणहरु छैनन्। यसैगरी, गोरखा, आरुघाट–१ स्थित एकासगोलको पैतृक घरहरुको घरभाडा पुष्टि गर्ने कुनै आधार प्रमाणहरु नभएतापनि घरभाडा मागदाबी लिई अनुमानित भाडा उल्लेख गरेको छु।
हामीहरुको एकासगोलको पैतृक सम्पत्ति आमा कृष्णकुमारी श्रेष्ठको नाममा छ। हालसम्म अंशबण्डा भएको छैन। आमा समय समयमा बिरामी भइरहनु हुन्छ। आर्थिक वर्ष २०५८/५९ देखि हामी तीन दाजुभाइहरु मानो छुट्टिएर अलग अलग बसी आ–आफ्नो पेसा व्यवसाय गर्दै आएका छौं।
म रामकुमार श्रेष्ठ, श्रीमती सरस्वती श्रेष्ठ, छोराहरु सरोज श्रेष्ठ, र रोशन श्रेष्ठको प्रिमियममा लगानी, मनकामना क्रसर उद्योग, पञ्चबुद्ध खनिज उद्योग, गोरखकाली रबर उद्योग, अपि हाइड्रो पावर, जलविद्युत कम्पनीहरुमा गरिएको लगानीसमेत रहेको छ।
अमेरिकामा रहेका मेरा छोराहरु सरोज श्रेष्ठ र रोशन श्रेष्ठले आफैंले कमाएको आम्दानी (डलर) ले अमेरिकामा खरिद गरेका २ वटा घरहरु छन्।
दैनिक भ्रमण भत्ता, निर्वाचनमा मतदान केन्द्रमा खटिँदाको भत्ता, नेपाल आयल निगमको मिटिङ भत्ता, लोकसेवा आयोगबाट प्राप्त उत्तर पुस्तिका जाँचेको भत्तासमेतको भत्ताहरुलाई अनुमानकै भरमा उल्लेख गरेको छु। धेरै पुरानो भएकोले मसँग सो आय पुष्टि गर्ने कुनै आधार प्रमाणहरु छैनन्। धेरै पुरानो कारोबार भएको, लेखा राख्ने व्यवस्था नभएको, सम्झनाको आधारमा बयान दिनुपर्दा केही सवालहरुको जवाफ फरक पर्न गएको छ। १३ पानेमा उल्लेखित विवरण सत्य तथ्यमा आधारित विवरणहरु हुन्। बयानको क्रममा बैंक स्टेटमेन्ट भिडाएर सवालजवाफ गर्दा फरक पर्न गएको हो। मैले माथि दफा दफामा मागदाबी लिएका पैतृक कृषि आय मेरो मात्र नभई एकासगोलका सबै अंशियारहरुको आय हो। बुबा २०४४ सालमा निधन भएपछि दोकानको सामान बिक्री गर्दा प्राप्त भएको रकम सगोलकै काममा खर्च भएको छ। हामी दाजुभाइहरु बुबाको निधनपछि स्वतन्त्र रुपमा आ–आफ्नो पेसा व्यवसाय गरी बसेका छौं।
मेरा छोराहरु सरोज श्रेष्ठ र रोशन श्रेष्ठ अमेरिकामा रहे बसेकोले उनीहरु बयान कार्यको लागि आउन सक्ने अवस्था नरहेको, नभएको र निजहरुको तर्फबाट सबै सवालहरुको जवाफ मैले माथि दफा दफामा लेखि लेखाई सकेकोले सोही ब्यहोरा जानकारी गराएको छु। म रामकुमार श्रेष्ठ र मेरो परिवारहरुका नाममा नेपाल सरहदभित्र भएका चल–अचल सम्पत्तिहरुको हकमा मेरो आयस्रोतले नखामेको अवस्थामा वा आयस्रोत पुष्टि हुन नसकेमा प्रचलित कानुन बमोजिम सम्पूर्ण कारोबारको जिम्मेवार म हुनेछु।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
