काठमाडौं- नेकपा एकीकृत समाजवादीको जारी केन्द्रीय समितिको तेस्रो बैठकमा अध्यक्ष माधवकुमार नेपालले राजनीतिक प्रतिवेदन प्रस्तुत गरेका छन्। बुधबार सुरु भइ बिहीबार सकिने भनिएको बैठकमा अध्यक्ष नेपालले विभिन्न ८ बुँदामा केन्द्रित भएर प्रतिवेदन प्रस्तुत गरेका हुन्।
'यतिबेला हाम्रा सामु आगामी निर्वाचनका दौरान आफ्ना विचार र योजनाहरू लिएर जनतामाझ जाने र उनीहरूको मत लिएर जनसमर्थन प्राप्त सुदृढ राजनीतिक शक्तिको रूपमा आफूलाई स्थापित गर्नुपर्ने चुनौती खडा छ। आजको ठोस परिस्थिति यही हो', तात्कालिक कार्ययोजनामा भनिएको छ।
अध्यक्ष नेपालले तात्कालिक कार्ययोजना अन्तर्गत ९ वटा बुँदा पनि प्रस्तुत गरेका छन्।
७.१. पार्टी कमिटीको पूर्णता र विस्तार : स्थानीय तहको निर्वाचन गाउँ तथा नगरपालिका र तिनका वडाहरूमा हुन्छ। जहाँ निर्वाचन हुने हो त्यहाँ पार्टी कमिटी भएन भने निर्वाचनमा प्रतिस्पर्धा गर्ने आधार नै हुँदैन। हामीले सबै वडामा त के सबै पालिकामा समेत पार्टी कमिटी निर्माण गरिसकेका छैनौं। कतिपय कमिटीहरूलाई यहाँसम्म कि प्रदेश कमिटीहरूलाई समेत पूर्णता दिएका छैनौं। यस्तो स्थिति अब रहिरहनु हुँदैन। गठन भैसकेका कमिटीहरूलाई यथाशीघ्र पूर्णता दिने र आगामी चैत १५ गतेभित्र सम्पूर्ण पालिका र वडाहरूमा पार्टी कमिटी गठन गरिसक्ने गरी जानु पर्दछ।
७.२. जनसङ्गठनहरूको विस्तार : पार्टी कमिटी मात्र होइन पार्टी सम्बद्ध जन सङ्गठनका कमिटीहरू पनि स्थानीय तहसम्म पुर्याउनु पर्दछ। कमसे कम पनि किसान, महिला र युवा सङ्घलाई वडा तहसम्म पुर्याउनु पर्दछ, विद्यार्थी सङ्गठनलाई मा वि तहसम्म पुर्याउनु पर्दछ, ट्रेड युनियनलाई प्रतिष्ठान तहसम्म पुर्या उनु पर्दछ, पेशागत सङ्गठनलाई सम्बन्धित पेशाको तल्लो तहसम्म पुर्याउनु पर्दछ र सामुदायिक सङ्गठनलाई सम्बन्धित समुदायका आधारभूत जनताको तहसम्म पुऱ्याउनु पर्दछ। यो काम पनि अगामी चैत १५ भित्रमा नै गरिसक्नु पर्दछ।
७.३. पार्टी प्रवेश अभियान : विभिन्न पार्टी परित्याग गरी हाम्रो पार्टीमा प्रवेश गर्ने लहर चलेकै छ। पार्टी प्रवेश गर्ने गराउने कार्यलाई अझै व्यवस्थित र प्रभावकारी ढङ्गले अभियानको रूपमा अगाडि बढाउनु पर्दछ। सबै कमिटीहरूले यसमा विशेष ध्यान दिएर पहल गर्नु पर्दछ।
७.४. जन परिचालन : सङ्गठन निर्माणका साथसाथै जन परिचालनका कामहरू पनि गर्न आवश्यक छ। स्थानीय तहमा जन चासो र सरोकारका विषयहरूलाई लिएर विभिन्न प्रकारका भेला, बैठक, गोष्ठी, अन्तरक्रिया, सेमिनार, सभा आदि गर्न सकिन्छ, गर्नु पर्दछ।
७.५. प्रशिक्षण अभियान : विचार पार्टी निर्माणको मूल आधार हो। त्यसैले विचार पार्टीको आत्मा हो। पार्टी विचार बिनाको भयो वा विचार शून्य भयो भने त्यसको चरित्र नै समाप्त हुन्छ। पार्टीले अँगालेको विचार आम पार्टी पंक्तिमा स्थापित गर्न सकिएन भने पार्टीमा वैचारिक एक रूपता नै हुँदैन। पार्टी पंक्तिमा विचार प्रवाह गर्ने विभिन्न प्रकारका प्रशिक्षणद्वारा नै हो। त्यसैले पार्टीका आम सिद्धान्त, नीति, विचार र समसामयिक विषयमा प्रकाश पार्ने गरी विभिन्न प्रकारका प्रशिक्षण अभियान चलाइरहनु पर्दछ।
७.६. प्रचारात्मक काम : प्रचार बिना राजनीतिक र साङ्गठनिक काम कहिल्यै पनि अगाडि जादैन। त्यसैले प्रचारको ठूलो महत्त्व छ। तर, यस महत्त्वपूर्ण कामलाई हामीले व्यवस्थित रूपमा अगाडि बढाउन सकेकै छैनौं। अब यस्तो स्थितिको तुरुन्तै अन्त्य हुनु पर्दछ। केन्द्रीय तहमा पार्टीको वेबसाइट एवं न्युज पोटल तुरुन्तै चाल गर्नु पर्दछ र प्रचारका अन्य प्रभावकारी योजना बनाएर कार्यान्वयन गर्नु पर्दछ। प्रदेश तथा स्थानीय कमिटीहरूले पनि प्रचारको ठोस योजना बनाएर कार्यान्वयन गर्नु पर्दछ। सबै पार्टी कमिटीले पार्टीको चुनाव चिह्नको प्रचार व्यापक रूपमा गर्ने कुरामा जोडका साथ लाग्नु पर्दछ।
आर्थिक सङ्कलन : आर्थिक श्रोत पार्टी निर्माणको एक महत्त्वपूर्ण आधार भएकाले आर्थिक सङ्कलन कार्य पनि पार्टी कामको एउटा मुख्य पक्ष हो। यस काममा ध्यान दिएन भने पार्टी निर्माण र विस्तार अभियान अगाडि बढ्न नै सक्तैन। त्यसैले पार्टी र जन सहगठनका हरेक कमिटीले आर्थिक सङ्कलन योजना बनाएर कार्यान्वयन गर्नु पर्दछ। निर्वाचनको बेला निर्वाचन परिचालनका लागि विशेष आर्थिक कोष निर्माण गर्ने योजना बनाएर कार्यान्वयन गर्न पर्दछ।
७.८. अभिलेख व्यवस्थापन : अभिलेख व्यवस्थित गर्ने कार्य पार्टी निर्माण र परिचालनको अर्को एक महत्त्वपूर्ण पक्ष हो। पार्टी निर्माण र परिचालन त गर्ने तर अभिलेख व्यवस्थित नगर्ने हो भने गरिएका कामको कुनै लेखाजोखा नै हुँदैन। अभिलेख व्यवस्थित भएन भने आफ्नो शक्तिको आकलन नै गर्न सकिँदैन। शक्ति आकलन बिना कुनै पनि प्रभावकारी अभियान सञ्चालन गर्न सकिँदैन। हाम्रो अभिलेख प्रणाली व्यवस्थित हुन सकेको छैन। प्रदेश तथा स्थानीय कमिटीहरूबाट केन्द्रमा आउनुपर्ने कार्य प्रगति प्रतिवेदनहरू नियमित रूपमा नआएकाले केन्द्रीय अभिलेख नै पनि व्यवस्थित गर्न सकिएको छैन। यस्तो अवस्थाको तुरुन्तै अन्त्य गर्नु पर्दछ। हरेक कमिटीले आफ्नो तहको अभिलेख व्यवस्थित गर्ने र माथिल्लो तहमा पठाउने काम नियमित रूपमा गर्नु पर्दछ । त्यसैगरी पार्टी कार्यालयहरूलाई व्यवस्थित गर्ने कार्य पनि गर्नु जरुरी छ।
७.९. निर्वाचनको तयारीः आगामी निर्वाचनको तयारी यतिबेलाको हाम्रो मुख्य काम हो। निर्वाचन तयारीका सन्दर्भमा गर्नपर्ने प्रमुख काम हुन्: निर्वाचन घोषणा पत्रको लेखन, निर्वाचन निर्देशिकाको निर्माण, उम्मेदवारका मापदण्डको निर्धारण र उम्मेदवार छनोट प्रक्रियाको निर्धारण तथा निर्वाचन परिचालन तथा सहयोग समितिको गठन। यी सब काम सम्पन्न गर्न सिंगो पार्टी पंक्ति केन्द्रित भएर लाग्नु पर्दछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
