काठमाडौं– यो साता सेयर बजार मापक नेप्से परिसूचक ७५.१८ अंकले घटेको छ। गत साता १०६.८२ अंकले बढेर २ हजार ८७६.७४ विन्दुमा पुगेको नेप्से यो साता घटेको हो। यो साता पाँच दिन कारोबार भएको नेप्से परिसूचक चार दिन बजार ओरालो लाग्दा एक दिन भने वृद्धि भएको छ। यो साताको पाँच दिनको कारोबारमा नेप्से परिसूचक ७५.१८ अंकले घटेर २ हजार ८०१.५६ विन्दुमा पुगेको छ।
साताको पहिलो कारोबार दिन आइतबार नै नेप्से परिसूचकमा गिरावट आएको थियो। आइतबार नेप्से ४०.५७ अंक घटेर २ हजार ८३६.१७ विन्दुमा झरेको थियो। त्यस्तै, सेन्सेटिभ इण्डेक्स ७.७३ अंक घटेर ५३१.९२ विन्दुमा झरेको थियो भने फ्लोट इण्डेक्स २.८ अंक र सेन्सेटिभ इण्डेक्स २.४८ अंक घटेको थियो।
नेप्से परिसूचक सोमबार १५.६९ अंकले बढेर २ हजार ८५१.८६ विन्दुमा पुगेको थियो। सोमबार कारोबारमा आएका २२४ कम्पनीको ९५ लाख १२ हजार ५८० कित्ता सेयर ५ अर्ब २ करोड २० लाख १७ हजार १८१ रुपैयाँ बराबरको सेयर खरिदबिक्री भएको थियो।
सोमबार कारोबारको दिन १५.६९ अंक बढेर बन्द भएको नेप्से मंगलबार भने १६.३० अंक घटेर २ हजार ८३५.५८ विन्दुमा पुगेकोे थियो। मंगलबार नेप्से परिसूचक ओरालो लागेपनि कारोबार रकम भने बढेको थियो। कारोबारमा आएका २३० कम्पनीको १ करोड २० लाख ५३ हजार कित्ता सेयर ६ अर्ब २८ करोड ७२ लाख रुपैयाँ बराबरको कारोबार भएको थियो।
मंगलबार १६.३० अंकले गिरावट आएको नेप्से परिसूचक बुधबार २२.११ अंक घटेर २ हजार ८१३.४७ विन्दुमा झरेको थियो। बुधबार कारोबारमा आएका २२३ कम्पनीको ६५ लाख २० हजार कित्ता सेयर ३ अर्ब ४७ करोड ११ लाख ९ हजार रुपैयाँको खरिदबिक्री भएको थियो।
साताको अन्तिम कारोबारको दिन बिहीबार नेप्से परिसूचक ११.९६ अंक घटेर २ हजार ८०१.५६ विन्दुमा पुगेकोे छ। त्यस्तै, सेन्सेटिभ इण्डेक्स १.७ अंक घटेको छ भने फ्लोट इण्डेक्स १.१६ अंक र सेन्सेटिभ फ्लोट इण्डेक्स १.०७ अंकले घटेको छ। बिहीबार कारोबारमा आएका २२७ कम्पनीको ६९ लाख ५० हजार कित्ता सेयर ३ अर्ब ८२ करोड ९५ लाख रुपैयाँ बराबरको खरिदबिक्री भएको छ।
बुधवारको तुलनामा नेप्से परिसूचकमा गिरावट आए पनि कारोबार रकममा भने सामान्य वृद्धि भएको छ। बुधबार ३ अर्ब ४७ करोड रुपैयाँ बराबरको सेयर खरिदबिक्री भएको थियो।
पछिल्लो एक सातामा नेप्से परिसूचकसँगै लगानीकर्ताको सम्पत्ति पनि घटेको छ। गत साता १ खर्ब ३६ अर्ब ७४ करोड रुपैयाँले वृद्धि भएकोे लगानीकर्ताको सम्पत्ति यो साता भने १ खर्ब ५ अर्ब ७३ करोड रुपैयाँले गिरावट आएको छ।
गत बिहीबार सेयर बजारमा रहेको लगानीकर्ताको सम्पत्ति मापक बजार पूँजीकरण कुल ४० खर्ब ६५ अर्ब ३७ करोड रुपैयाँ रहेको थियो। यो साता १ खर्ब ५ अर्ब ७३ करोड रुपैयाँले सम्पत्ति घटेर ३९ खर्ब ५९ अर्ब ६४ करोड रुपैयाँमा पुगेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
