पेरिस- फ्रान्सले खोप लगाएका युरोपेली संघबाहिरका यात्रुका लागि चाँडै नै कोभिड संक्रमण भएको वा नभएको परीक्षण गर्नुपर्ने प्रावधानलाई छिट्टै हटाउने भएको छ।
दैनिकरुपमा संक्रमणको संख्या घट्दै गएपछि फ्रान्सले यस प्रावधानलाई क्रमशः खुकुलो पार्दै हटाउन लागेको युरोप मामिलामन्त्री क्लेमेन्ट बेउनले मंगलबार बताएका हुन्।
'डिसेम्बर महिनामा फेरि हामीले ओमिक्रोन भेरिएन्टको परीक्षण गर्नुपर्यो। आगामी दिनहरूमा हामी खोप लागेका मानिसहरूका लागि परीक्षणको आवश्यकता छैन भनेर घोषणा गर्नेछौं,' बेउनले फ्रान्स २ टेलिभिजनसँग बताए।
हाल बेलायतलगायत ईयू बाहिरबाट आउने जो कोहीले पनि खोपको स्थिति जस्तोसुकै भए पनि ४८ घण्टा पहिले कोभिड संक्रमण परीक्षण गरेको रेकर्ड देखाउनुपर्ने व्यवस्था छ।
'यो हप्ता सम्भवतः सजिलो उपायका साथ, युरोपबाहिरबाट आइपुगेका खोप लगाएका मानिसहरूका लागि एउटा नयाँ युरोपेली नियम बन्नेछ,' उनले थपे।
युरोपेली सरकारका सदस्यहरू विशेषगरी युरोपेली समूह राष्ट्रभित्रको सिमाना पार गर्ने मानिसहरूका लागि आफ्नो यात्रा नियमहरू अझ राम्रोसँग समन्वय गर्न जनवरी २५ मा सहमत भएका हुन्।
ओमिक्रोन वृद्धिले इटाली र डेनमार्कले युरोप क्षेत्रका बासिन्दाहरूलाई पनि प्रवेश गर्नका लागि हालसालै कोभिड परीक्षण संक्रमण नभएको पुष्टि गर्ने कागजात पेस गर्ने प्रावधानलाई लागू गरेका थिए।
उनीहरूले आफ्नो मुलुकमा प्रवेशका लागि राखेका नयाँ प्रावधानहरू साथै खोप प्रमाण लागू गर्न उत्प्रेरित गरेपछि यस निर्णयले ब्रसेल्सका अधिकारीहरू बेखुसी बनेका थिए। यद्यपि, यसलाई पछि अन्य युरोपेली मुलुकहरूले पनि नक्कल गरेका थिए।
फ्रान्सेली अधिकारीहरूले यस महिनामा कोभिड प्रतिबन्धको शृंखला हटाउन थालेका छन्। फ्रान्समा फेब्रुअरी १६ देखि अवरूद्ध बनेका रात्रि क्लबहरू कन्सर्ट र खेलका साथसाथै बारलाई पुनः खोल्ने तयारी गरिरहेको छ।
सोमबार फ्रान्समा ४६ हजारभन्दा बढी संक्रमित भएको पुष्टि गरिएको थियो। यसै बर्षको जनवरीको मध्यतिर प्रतिदिन चार लाख ६५ हजारभन्दा बढी संक्रमणहरूको रेकर्ड गरेको फ्रान्समा ४६ हजार संक्रमित हुनुलाई सामान्य मानिन थालिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
